حنیف عباسی کو اڈیالہ سے اٹک جیل منتقل کر دیا گیا


مسلم لیگ نون کے رہنما اور ایفیڈرین کیس میں سزا کاٹنے والے حنیف عباسی کو اڈیالہ جیل سے اٹک جیل منتقل کر دیا گیا۔ جیل ذرائع کے مطابق حنیف عباسی کو آئی جی جیل خانہ جات کےحکم پر اٹک جیل منتقل کیا گیا، حنیف عباسی کی جیل سپرنٹنڈنٹ کے کمرے میں نواز شریف کے ہمراہ تصویر سامنے آنے پر انکوائری کمیٹی بنائی گئی تھی۔ ذرائع کا یہ بھی کہنا ہے کہ حنیف عباسی کو انکوائری کمیٹی کی تجویز پر اٹک جیل منتقل کیا گیا ہے۔

واضح رہے کہ سابق وزیر اعظم میاں نواز شریف، ان کےداماد کیپٹن (ر) محمد صفدراور بیٹی مریم نواز کی 19ستمبر 2018ء کو رہائی کے وقت اڈیالہ جیل میں ایفیڈرین کیس میں سزا کاٹنے والے حنیف عباسی کی میاں نواز شریف اور دوسروں کے ساتھ تصاویر کو بہت سے نیوز چینل پر براہِ راست دکھانے کے ساتھ ساتھ سوشل میڈیا پر بھی جاری کر دیا گیا تھا۔

ان تصاویر کے معاملے پر نوٹس لیتے ہوئے انکوائری کے لیے پنجاب حکومت کی طرف سے ڈی آئی جی جیل فیروز شوکت اور اے آئی جی ملک صفدر نواز پر مشتمل دو رکنی تحقیقاتی کمیٹی قائم کی گئی تھی، بتایا گیا ہے کہ اسی کمیٹی کی رپورٹ پر حنیف عباسی کو اڈیالہ جیل سے اٹک جیل منتقل کیا گیا ہے۔


Facebook Comments - Accept Cookies to Enable FB Comments (See Footer).