میرے مطابق 

مشرق وسطی سے امریکا کی پسپائی

ایس ایم شاہ zzz
 
           

اقتدار کی ہوس نے انسان کو انسانیت سے کوسوں دور پہنچا دیا ہے۔ ساتھ ہی دن بہ دن اس میں شدت آتی چلی جا رہی ہے۔ یہ ایک ایسا نشہ ہے، جس کی لت لگنے کے بعد نہ کسی پر رحم آتا ہے، نہ کسی کے رونے کی آواز اس پر اثر انداز ہو سکتی ہے، نہ آئے دن اس کے سامنے سے اٹھنے والے جوانوں کے جنازے اس کے دل کو پگھلا سکتے ہیں۔ نہ ان جوانوں کے جنازوں پر بین کرنے والی بوڑھی ماؤں کی آہوں اور سسکیوں سے ان کے دلوں پر پڑے پردے چھٹ سکتے ہیں۔

ساتھ ہی یہ سنت الہیٰ رہی ہے کہ جس نے بھی ظلم و بربریت کی داستان رقم کی ہے، اسے تاریخ میں دوسروں کے لئے نشانہ عبرت بنا دیا گیا ہے۔ اس کی ایک طویل فہرست ہے، جس سے مستضعفین جہاں کے لئے ایک امید کی کرن نظر آتی ہے کہ ظلم و بربریت کی آخری حد تک پہنچنے کے بعد وہ ظالم اللہ کی گرفت سے کبھی نہیں بچے گا اور مظلوم ہمیشہ کے لئے مظلوم بنا بھی نہیں رہے گا بلکہ اکثر اوقات وہ اپنی زندگی میں ہی ان ظالموں کی تباہی کا منظر دیکھ لے گا۔

عصر حاضر میں اس جنگ میں امریکا سب سے آگے ہے۔ سپر طاقت بننے اور اسے برقرار رکھنے کے نشے نے اسے تمام انسانی و اخلاقی اقدار کو پامال کرنے پر مجبور کیا ہے۔ اس وقت امریکا کی مثال اس جنگلی بھیڑیئے کی سی ہے، جو مختلف جگہوں سے دوسرے حیوانات کو چیر پھاڑ کر کے، لا کر اپنے بچوں کو کھلاتا ہے۔ اس کے بچے خوش ہوتے ہیں اور ظاہری طور پر دیکھنے والا بھی اسے اچھا ہی سمجھ بیٹھتا ہے، لیکن اسے نہیں معلوم کہ اس کی ماں نے کہاں کہاں سے خون بہا کر اس تک یہ خوراک پہنچائی ہے۔

آج بعض افراد یہ کہتے ہوئے دکھائی دیتے ہیں کہ امریکا میں لوگ امن امان اور آسایش کی زندگی گزار رہے ہیں۔ شاید انھوں نے کبھی سوچنے کی کوشش نہیں کی کہ امریکا کتنے ملکوں کے باسیوں کو خون کے دریا میں نہلا کر وہاں کی معدنیات اور دوسرے قدرتی وسائل پر اپنے پنجے گاڑ کر اپنے شہریوں کو کھلا رہا ہے، دوسروں کا امن خراب کر کے اپنے یہاں امن برقرار کر رکھا ہے۔ دوسروں کا پیٹ کاٹ کر اپنے شہریوں کو کھلا رہا ہے۔ دوسروں کے گھروں میں صف ماتم بچھا کر خود اپنے ہاں خوشی کے شادیانے بجا رہا ہے۔ کیا اسی کا نام ترقی و تمدن ہے؟!

حال ہی میں امریکی صدر ڈونلڈ ٹرمپ نے شام سے اپنی فوجیوں کے انخلا اور افغانستان سے بھی اپنی فوج کم کرنے کا اعلان کیا ہے۔ آخر کیا وجہ ہے کہ اچانک امریکی صدر نے اتنا بڑا اعلان کر دیا ہے؟ اسی اعلان سے پہلے ہی امریکی ڈکٹیشن پر سعودی عرب یمن میں چار سالوں سے مسلسل بم باری اور قتل عام کا سلسلہ روکنے پر آمادگی ظاہر کرتے ہوئے اچانک جنگ بندی پر آمادہ ہو گیا ہے۔ امریکی صدر کا دعویٰ یہ ہے کہ ہم نے شام میں داعش کو شکست دی ہے، لہذا اب مزید یہاں رہنے کی ضرورت نہیں۔

داعش کا خالق کہہ رہا ہے کہ ہم نے داعش کو شکست دی ہے۔ ساتھ ہی ایسا گیم کھیلا کہ ترک صدر رجب طیب اردغان نے ان سے فون پر رابطہ کیا اور انھیں مطلع کیا کہ اب شام میں داعش کا خاتمہ ہوا ہے۔ اس پر امریکی صدر نے جواب میں کہا کہ پھر ہم اپنی فوج واپس بلا لیتے ہیں۔ ٹرمپ کے اس اعلان کے بعد ترک صدر نے کرد نشین علاقے میں متوقع فوجی آپریشن کو غیر معینہ مدت کے لئے ملتوی کر دیا۔

کیا یہ سارے معاملات بس فون پر ایک گفت گو ہی میں طے پائے اور ٹرمپ نے بلا تامل اتنا بڑا فیصلہ کر دیا؟! در حقیقت معاملہ بالکل برعکس ہے۔ امریکا کا ہدف یہ تھا کہ زیادہ سے زیادہ اسرائیل کو محفوظ بنایا جائے، کیوں کہ سب سے زیادہ اسرائیلی بارڈر شام سے ملتا ہے۔ بشار الاسد کی حکومت اس کی مخالف رہی ہے۔ گریٹر اسرائیل کے ہدف کو پایہ تکمیل تک پہنچانے کے لئے وہ داعش کو وجود میں لایا۔ اتحادیوں سمیت امریکا اور اسرائیل نے ہر طرح سے ان کی بھر پور مدد کی۔

سات سال تک یہی سلسلہ جاری رکھا۔ سیرین فوج، حزب اللہ لبنان، ایرانی القدس بریگیڈ وغیرہ نے بھر پور مزاحمت کی۔ ادھر روس بھی فضائی حملوں کے ذریعے داعش کے ٹھکانوں کو نشانہ بناتا رہا۔ یہاں تک کہ 70 فی صد سے زیادہ علاقوں پر شامی برسر اقتدار بشار الاسد کی حکومت کی رٹ دائر ہوئی۔ باقی 23 فی صد کرد نشین علاقے بھی داعش کے خلاف برسر پیکار ہوئے۔ باقی صرف 7 فی صد پر امریکا اور داعش کی رسائی رہی۔ امریکا کو احساس ہوا کہ اگر اب بھی اپنی فوج نہ نکالی گئی تو مقاومتی فوج انھیں خود نکل جانے پر مجبور کرے گی۔ لہذا اب بھی وقت ہے کہ کسی بہانے سے یہاں سے خلاصی پیدا کی جائے۔

سات سال تک کثیر سرمایہ خرچ کرنے کے بعد امریکی اور اسرائیلی مفادات پہلے سے زیادہ خطرے میں پڑ گئے۔ اب امریکا نے دیکھا کہ اگر اسرائیل کی خاطر مزید فوج یہاں رکھی جائے تو ہماری تباہی و بربادی کے علاوہ کچھ نہیں۔ لہذا یہاں اختیاری طور پر امریکا نے اپنی فوج نکالنے کا اعلان نہیں کیا بلکہ مجبور ہوکر اعلان کرنا پڑا ہے، تا کہ نام نہاد بچی کھچی آب رُو بھی نہ چلی جائے۔ اب اسرائیلی وزیراعظم اور سعودی وزیر خارجہ سمیت تمام اتحادی چلا رہے ہیں کہ اچانک امریکا نے نکلنے کا فیصلہ کرکے بہت بڑی غلطی کی ہے۔

عادل الجبیر نے تو یہاں تک کہ دیا کہ ہم اپنی فوج وہاں بھیجنے کے لئے امریکا سے مشاورت جاری رکھے ہوئے ہیں۔ اس کو ابھی تک یہ احساس نہیں کہ ہم نے چار سال تک امریکا کے کہنے پر یمن کے مسلمانوں کا قتل عام کیا، لیکن آخر کار شکست و ذلت کے علاوہ کچھ نہیں ملا۔ شام میں داعش پر اتنا سرمایہ لگایا، وہ سب بھی خاک میں مل گیا، پھر بھی دنیا کے سامنے اپنا بھرم رکھنے کے لئے اب مزید امریکی ڈکٹیشن پر عمل پیرا رہنے کا اظہار کر رہا ہے۔

دوسری جانب امریکا نے افغانستان سے بھی سات ہزار تک اپنی فوج کم کرنے کا اعلان کر دیا ہے۔ یہ بھی اس کا اختیاری فیصلہ نہیں بلکہ عرصہ دراز سے افغانستان سے اسے لینے کے دینے پڑ رہے ہیں۔ ساتھ ہی طالبان نے مذاکرات کے ضمن میں یہ شرط بھی رکھی ہے کہ امریکا کو افغانستان سے نکلنا ہو گا۔ یہاں بھی امریکا کو شکست کے علاوہ کچھ نہیں ملا۔ علاوہ ازیں امریکا کی ہمیشہ سے یہی کوشش رہی ہے کہ زیادہ سے زیادہ پاک و ہند کے درمیان روابط کو کم زور کیا جائے، تا کہ دونوں ممالک سے اپنے مفادات حاصل کیے جا سکیں، ایک طرف سے وہ انڈیا کو جدید ترین اسلحہ فراہم کر رہا ہے تو دوسری طرف آئے دن پاکستان پر الزامات کی بارش برسا رہا ہے۔ ساتھ ہی پاک ایران گیس پائپ لائن معاہدے میں بھی امریکا نے روڑے اٹکا کر ابھی تک اسے عملی ہونے نہیں دیا اور افغانستان میں زیادہ سے زیادہ انڈیا کا اثر و رسوخ بڑھا کر پاکستان کے لئے خطرات میں مزید اضافہ کیا۔ یہ سب کچھ اس کی بھول ہے۔

ہماری پاک فوج ہمہ وقت ان داعشیوں اور طالبانیوں کی ہر حرکت پر نظر رکھے ہوئے ہے۔ ہماری آئی ایس آئی دنیا کی نمبر ون ایجنسی ہے۔ امریکا کسی کا بھی وفادار نہیں۔ یہ ہمیشہ دوسروں کو نقصان پہنچانے میں اپنی بھلائی سمجھتا ہے۔ اسی ایجنڈے نے اسے عراق میں بھی ناکامی سے ہم کنار کیا ہے، یمن میں بھی ذلت آمیز شکست سے دو چار کیا ہے، شام سے بھی رسوا ہو کر نکلنا پڑا ہے، افغٖانستان سے بھی ذلیل ہو کر نکلنا ہی پڑے گا۔ آخر کار پوری دنیا پر اپنا تسلط جمانے اور سب کو اپنا زیر نگیں رکھنے کی نا کام کوشش ہی امریکا کی تباہی کا سبب بنے گی۔

پوری دنیا کے مظلوم لوگوں کا خون رنگ ضرور لائے گا۔ لہذا ضرورت اس امر کی ہے کہ پاکستان اب مزید امریکا پر اعتماد نہ کرے۔ ہم سایہ اسلامی ممالک ایک دوسرے کے ساتھ زیادہ سے زیادہ روابط بڑھائیں، داعش اور دوسرے دہشت گردوں کے شر سے محفوظ رہنے کے لئے ایک دوسرے کے ساتھ تبادل اطلاعات کرتے رہیں۔ مسلم ممالک کے ساتھ اتحاد اور امریکا سے بے نیاز رہنے ہی میں ہماری کام یابی کا راز مضمر ہے۔

ایس ایم شاہ zzz
Latest posts by ایس ایم شاہ zzz (see all)

 
           

Facebook Comments - Accept Cookies to Enable FB Comments (See Footer).