دھوکے کا گھر

28/03/2019 یاسر محمود آرائیں

ہماری مسجد کے امام ہوا کرتے تھے۔ انتہائی نیک شریف اور بزرگ۔ دن کا بیشتر وقت مسجد میں تنہا قرآن پاک کی تلاوت میں گزارتے۔ غربت کے باوجود ایمانداری سے زندگی بسر کی۔ شہر سے باہر دور ایک گاؤں میں ان کی رہائش تھی۔ پرانا سا ایک اسکوٹر آنے جانے کا واحد ذریعہ، اسی پر مسجد آتے اور واپس جاتے۔ سالہا سال سے جب سے ہوش سنبھالا یہی معمول دیکھا۔ مشقت بھری اس زندگی کے باوجود کبھی ملال یا تفکر کی پرچھائی ان کے چہرے پر نہ تھی۔

ہنس مکھ بہت، خوش و خرم زندگی بسر کی۔ آخر وقت تک اولاد تک کے محتاج نہ ہوئے۔ پرسوں کہیں سے بائک پر آ رہے، اچانک عقب سے ایک نو عمر بائک سوار لڑکے نے تیز رفتاری سے ٹکر مار دی۔ ٹکر مارنے والا لڑکا اور مولوی صاحب دونوں اس تصادم میں گرے۔ اس خوفناک تصادم میں مولوی صاحب کی ٹانگ کی ہڈی کھال اور گوشت چیرتی ہوئی باہر آ گئی اور ان کے کان سے خون بہنے لگا۔ لڑکا بھی شدید زخمی ہوا۔ ہسپتال پہنچے، لیکن پسماندہ علاقوں کے سرکاری ہسپتالوں کے حال سے دنیا واقف۔ تھوڑی بہت ٹریٹمنٹ کے بعد فورا کسی دوسرے ہسپتال لے جانے کا مشورہ دیا گیا۔ ابھی لے جایا رہا تھا کہ راستے میں قضا کا فرشتہ آیا اور ان کی روح نکال لے گیا۔

درویش نے زندگی میں انگنت حادثے دیکھے۔ بہت کٹی پھٹی، حتی کہ نا مکمل لاشیں بھی دیکھیں۔ خود کو بھی گولی لگی، یعنی موت کو قریبی دیکھا۔ اس کے باوجود کبھی ذہن پریشان نہ ہوا۔ دوست یار اس صفت کی وجہ سے مذاقا پتھر دل، بے رحم اور نجانے کن القابات سے نوازا کرتے تھے۔ نجانے کیوں مولوی صاحب کے جنازے میں ان کے چہرے کا آخری دیدار کرنے کے بعد ہاتھ پیر اب تک ٹھنڈے پڑے ہیں۔ ذہن میں عجیب خیالات امڈ رہے، سوچیں منتشر، چہرہ کرب اور فکر و غم کی تصویر بنا ہوا ہے۔

بائک پر بیٹھنے کی ہمت نہیں ہو رہی۔ گاڑی چلاتے اس کے اسٹیئرنگ پر گرفت ڈگمگا رہی ہے۔ سوچ رہا ہوں، نجانے کس حال میں آخری وقت آئے گا۔ خال ایسے لوگ ہوں گے جن کی تیاری موت سے قبل مکمل ہوتی ہے۔ مٹھی بھر ہیں، جو دو جمع دو چار کرنے کی سوچ کے بجائے اللہ کو راضی کرنے کی فکر میں پریشاں ہیں۔ اکثریت مجھ ایسوں کی۔ جو سارا دن بھاگم بھاگ، دنیاوی مشاغل کی بھرمار۔ قدرت کا عطا کیا بہت، پھر بھی ہل من مزید کے لیے۔ یہ پلاٹ میرا کیوں نہیں۔

ایسی گاڑی میں بھی لوں؟ کاروبار اک خاص سیزن تک محدود، بقیہ دنوں فارغ بیٹھ کر طبیعت پر جمود طاری کرنے کے بجائے کسی اور میداں میں ہاتھ پیر مار کر دیکھتے ہیں۔ سال میں ایک دو بار شمالی علاقوں کا سفر، قدرت کے حسین نظاروں کا دیدار۔ لائف میں کچھ ڈفرنٹ لانے کے بہانے۔ لیکن وہاں سے یہ سوچ لے آئے یار اس بار اپنے علاقے میں پلاٹ لینے کے بجائے بالائی علاقوں میں کہیں کسی پہاڑ کے دامن میں قدرتی نظاروں سے بھرپور جگہ دیکھ کر اپنا گھر کیوں نہ بنا لیں؟ ایبٹ آباد کے مضامات یا گلیات آئیڈیل ہو سکتے ہیں۔

جانتے ہیں ثبات صرف تغیر کو ہے زمانے میں۔ چہرے یہاں روز بدلتے ہیں۔ کون یہاں آب حیات پی کر بیٹھا ہے؟ روز کتنے جنازے دیکھتے ہیں۔ سکندر جیسا فاتح بھی گیا دونوں ہاتھ خالی لے کر گیا۔ ہمارے باپ دادا گئے وہ کیا ساتھ قبر میں لے کر گئے۔ سب کچھ یہیں رہ جائے گا، ساتھ جائیں گے تو نیک اعمال۔ نیکی بھی مگر حسن اخلاق اور حقوق العباد کے سوا کس کام کی؟ ماتھے پر جس کے برسوں پرانے سجدے کا نشاں وہ اتنا ہی کرخت اور بے ایماں۔

عمرہ یا حج جو کر آیا، آتے ہی ملاوٹ اور ٹھگی شروع کر دی۔ مسجدوں مدرسوں اور فلاحی اداروں کو چندہ دینے والوں کے ذرائع آمدن کی ہی ذرا تحقیق کریں۔ کوئی عزیز و اقارب یتمیوں اور بیواؤں کا مال ڈکار کر بیٹھا ہو گا۔ تو کوئی بہنوں کی وراثت پر سانپ بنا بیٹھا۔ الا چند ایک کے سوا۔ فلاں حضرت والا کے ہاتھ بیعت، فلاں کی جوتی سیدھی کا شرف۔ فلاں گدی نشیں سے مصافحہ۔ اپنے ملازمین سے مگر سلوک کتے سے بڑھ کر۔ مجال جو کبھی ماتھے پر شکن لائے بغیر ماتحت سے بات کی ہو۔ اپنے بچوں اور اپنے دوستوں کے بچوں کے لیے فاسٹ فوڈز پر بے دریغ لٹانے والے ہاتھ سے مجال جو کبھی نوکر کے بچے کی بیماری پر چند سو بطور قرض ہی نکلے ہوں۔

نظیر اکبر آبادی کی سنیں کیا خوب فرما گئے۔

ٹک حرص و ہوا کو چھوڑ میاں مت دیس بدیس پھرے مارا

قزاق اجل کا لوٹے ہے دن رات بجا کر نقارا

کیا بدھیا بھینسا بیل شتر کیا گو میں پلا سر بھارا

کیا گیہوں چانول موٹھ مٹر کیا آگ دھواں اور انگارا