کرکٹ ورلڈ کپ 2019: اظہر محمود کہتے ہیں کہ اچھی کارکردگی دکھانے والی ہر ٹیم پر ایک برا دن ضرور آتا ہے

عبدالرشید شکور - بی بی سی اردو ڈاٹ کام، ایجبسٹن

  •  
  •  
  •  
  •  
  •  
  •  
  •  
  •  
  •  
  •  
  •  
  •  

اظہر محمود

Getty Images
اظہر محمود کہتے ہیں کہ وہ فی الحال ایک وقت میں ایک میچ پر توجہ مرکوز کیے ہوئے ہیں

پاکستانی کرکٹ ٹیم کے بولنگ کوچ اظہر محمود کو امید ہے کہ ’کسی بھی ٹیم کا ایک دن برا ضرور ہوتا ہے اور نیوزی لینڈ کی ٹیم کا برا دن بدھ (آج) کو ہو سکتا ہے۔‘

کرکٹ ورلڈ کپ کے 33ویں میچ میں پاکستان اور نیوزی لینڈ کی ٹیمیں آج ایجبسٹن میں مدِ مقابل ہوں گی۔

سیمی فائنل تک رسائی کی امیدیں برقرار رکھنے کے لیے پاکستانی ٹیم کے لیے یہ میچ جیتنا بہت ضروری ہے۔ دوسری جانب نیوزی لینڈ کی ٹیم ابھی تک چھ میں سے پانچ میچز جیت کر گیارہ پوائنٹس کے ساتھ پوائنٹس ٹیبل پر سرِفہرست ہے۔

ٹورنامنٹ کی دوسری ناقابل شکست ٹیم انڈیا کے خلاف ان کا میچ بارش کی وجہ سے منسوخ ہو گیا تھا۔

اظہر محمود یہ تسلیم کرتے ہیں کہ نیوزی لینڈ کی ٹیم بہت ہی مضبوط ہے اور اس کے پاس میچ ونر کھلاڑی موجود ہیں لیکن ساتھ ہی ان کا یہ بھی کہنا ہے کہ پاکستانی ٹیم اگر کھیل کے تمام شعبوں میں نظم و ضبط کا مظاہرہ کرے تو وہ کامیابی حاصل کر سکتی ہے۔

انھوں نے امید ظاہر کی کہ کسی بھی ٹورنامنٹ میں لگاتار اچھی کارکردگی دکھانے والی ہر ٹیم کا ایک برا دن ضرور آتا ہے اور ہو سکتا ہے نیوزی لینڈ کی ٹیم کا برا دن بدھ (آج) ہو۔

اظہر محمود

Getty Images
اظہر محمود اور مکی آرتھر

ان کا کہنا ہے کہ نیوزی لینڈ کی ٹیم کی تاریخ ہے کہ وہ لگاتار میچز جیتنے کے بعد کوارٹر فائنل یا سیمی فائنل میں پہنچ کر ہار جاتی ہے۔

یاد رہے کہ نیوزی لینڈ کی ٹیم ورلڈ کپس کی تاریخ میں ایک فائنل اور چھ سیمی فائنلز کھیل چکی ہے۔

اظہر محمود نے مزید کہا کہ وہ فی الحال ایک وقت میں ایک میچ پر توجہ مرکوز کیے ہوئے ہیں اور انھیں معلوم ہے کہ پاکستانی ٹیم کے لیے اب تینوں میچز جیتنا ضروری ہیں جس کے بعد ہی پتا چلے گا کہ پاکستانی ٹیم سیمی فائنل میں پہنچ سکتی ہے یا نہیں؟

ان کے خیال میں پاکستانی بولرز کے لیے ضروری ہو گا کہ وہ نئی گیند کے ساتھ ابتدا میں ہی وکٹیں حاصل کریں جبکہ بیٹنگ میں ٹاپ آرڈر بلے بازوں کو ذمہ داری دکھانی ہو گی۔

اظہرمحمود نے شاہین شاہ آفریدی کی جگہ محمد حسنین کو کھلائے جانے کو خارج از امکان قرار دیتے ہوئے کہا کہ شاہین شاہ آفریدی نے گذشتہ میچ میں اچھی بولنگ کی ہے تاہم میچ میں چار فاسٹ بولرز کھلانے کا فیصلہ میچ کی صبح وکٹ دیکھ کر کیا جائے گا۔

پاکستان ٹیم

Getty Images
پاکستان ٹیم ایجبیسٹن میں پریکٹس کرتے ہوئے

پاکستانی ٹیم کی فیلڈنگ کے بارے میں اظہر محمود کا کہنا ہے کہ گراؤنڈ فیلڈنگ اچھی ہے لیکن 13 کیچز ڈراپ ہوئے ہیں تاہم اگر انگلینڈ کی ٹیم کو بھی دیکھیں تو اس نے بھی اس ٹورنامنٹ میں اب تک دس کیچز گرائے ہیں۔

انھوں نے مزید کہا کہ یہ کسی بھی ٹیم کے ساتھ ہو سکتا ہے، یہ کھیل کا حصہ ہے اور اس میں اہم بات یہ ہے کہ کھلاڑی کیچ ڈراپ کرنے کے بعد اگلے کیچ کے لیے خود کو کتنا تیار رکھتا ہے اور وہ کتنا پراعتماد رہتا ہے۔

image_pdfimage_print
Comments - User is solely responsible for his/her words

  •  
  •  
  •  
  •  
  •  
  •  
  •  
  •  
  •  
  •  
  •  
  •  

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 9588 posts and counting.See all posts by british-broadcasting-corp