سسلین مافیا سے پاکی مافیا تک

پاکستان کی تاریخ میں پہلی بار حکومت مافیا کے سامنے ڈٹ گئی ہے۔ وزیراعظم نے کسی قسم کے دباؤ کو خاطر میں نہ لانے کا واضح اعلان کرتے ہوئے کہا کہ مافیا کے سامنے جھکنا ملک وقوم کے ساتھ غداری ہوگا۔ اب ملک کے تمام طبقات کا قومی فریضہ ہے کہ وہ حکومت کے ساتھ کھڑے ہوں۔ دانستہ یا نادانستہ مافیا کی سپورٹ میں جانے والے کسی اقدام کا حصہ بنیں اور نہ ہی حمایت کریں۔ حکومت کے اچھے کاموں کو سراہا جائے۔ غلطیوں، کوتاہیوں سمیت عوام  دشمن اقدام پر بھر پور تنقید کی جائے۔ مگر مافیا کی حمایت ہرگز ہرگز نہ کی جائے۔ کوئی جواز نہ تلاش کیا جائے نہ کوئی بہانہ تراشا جائے۔ صد شکر ادا کریں کہ پچھلے ستر سالوں میں ملک وقوم مافیا کی جس جکڑبندیوں میں جکڑی ہوئی تھی۔ اس مافیا سے نجات کا وقت آگیا ہے۔

سسلین مافیا ڈان توتو رینا تو وزیر، مشیر اور جج خریدتا ہو گا۔ مگر پاکی مافیا ڈان ملکی صدر سے لے کر پوری کی پوری حکومتیں خرید لیتا ہے۔ پورے کے پورے محکمہ جات پاکی مافیا ڈان کی مٹھی میں ہیں۔ فورسز سلیوٹ کرتی ہیں۔ میڈیا کا وہ خود مالک ہے۔ صحافی اس کا پانی بھرتے ہیں۔ دنیا کی بہترین آرمی کے اعلیٰ آفیسر ریٹائرمنٹ کے بعد پاکی مافیا ڈان کے پاس ملازمت کرتے ہیں۔ پاکی مافیا کی طاقت کا اندازہ اس بات سے بخوبی لگایا جا سکتا ہے کہ پاک بحریہ کے نام پر بلاشرکت غیرے ایشیا کا سب سے بڑا ہاؤسنگ پراجیکٹ جو ریاست کے اندر ایک ریاست ہے طمطراق سے چلا یا جارہا ہے۔

جہاں اشرافیہ جو ملکی مسائل غربت، مہنگائی، دہشت گردی، بے روز گاری، بدامنی دھماکے وغیرہ سے بے نیاز رہائش پذیر ہے، جو لوگ بحریہ ٹاؤن میں جا تے ہیں یا جنہوں نے دیکھا ہے وہ اس بات کی تصدیق کریں گے کہ بحریہ ٹاؤن کو دیکھ کر نہیں لگتا ہے کہ پاکستان اس قدر غریب ملک ہے اور پاکستانی عوام کا 98 فیصد طبقہ دو وقت کی روٹی سے بھی محروم ہے۔ بحریہ ٹاؤن کے انتظامات، سیکورٹی، دکانیں، جم سکول، ہسپتال، الغرض تمام تر حوالے سے ایک الگ ریاست ہے۔

بحریہ ٹاؤن بنا نے میں کتنے معصوم لوگوں کا خون اور کتنے انسانوں کو موت کے گھاٹ اتارہ گیا ہے، بحریہ ٹا ون کی بنیادوں میں کتنے انسانوں کا خون ہے، کتنے غریب لوگوں کی آہیں، سسکیاں دبی ہیں۔ یہ ایک خوفناک، بھیانک اور لمبی کہانی ہے۔ بحریہ ٹاؤن کی ایک ایک دیوار کے نیچے کئی کئی انسانوں کا خون ہے۔ زمین ہتھا ٰنے کے لئے قتل غارت گری، زمینوں پہ ناجائز قبضے اور دیگر شیطانی کارروائیوں کی ایک لمبی فہرست ہے۔

ریاست پاکستان آج تک اس کو نام بدلنے پر مجبور نہیں کرسکی ہے۔ ملک کی کوئی فورس کسی بھی مقدمہ میں گرفتار کرنے کی جرات نہیں رکھتی ہے اور نہ کوئی عدالت سزا دینے کی ہمت کر سکتی ہے۔ ایم این اے، ایم پی اے اور وزیر مشیر بنانا اس کے بائیں ہاتھ کا کھیل ہے۔ ملک کے بڑے بڑے سیاستدان جو وزیر اعظم اور صدر بھی بنتے ہیں اور بن چکے ہیں ان کا گاڈ فادر ہے۔ موجودہ حکومت میں بھی کئی نمائندے شامل ہیں۔ سیاسی اتحاد، احتجاجی مارچ، لانگ مارچ، مارشل لا سمیت ملک وقوم کے تمام بڑے فیصلوں میں پاکی مافیا ڈان کی مشاورت ضرور شامل ہوتی ہے۔

بصورت دیگر کامیابی کے امکان کم ہوجاتے ہیں۔ موصوف کے بیک وقت حزب اقتدار اور حزب اختلاف سے قریبی تعلقات ہیں۔ کسی بھی جانب سے خرید و فروخت کی ضرورت پوری کردی جاتی ہے۔ ق لیگ، پیٹریاٹ، پاک سرزمین پارٹی سمیت فاروڈ بلاک بنانے کے امور انجام دیتے ہیں۔ آرمی چیف ہو یا صدر پاکستان یا وزیراعظم سب کو رام کرنے کے گرو سے خوب واقف ہیں۔ متحدہ قومی موومنٹ کے الطاف حسین جیسے طاقتور چیف بھی آن کی آن میں ڈھیر ہوتے دیکھے ہیں۔

پاکستان کی سب سے بڑی سیاسی جماعت پیپلزپارٹی کے شریک چیئرمین آصف علی زرداری سے قریبی مراسم ہیں۔ وزارت اعظمی کے وقت یوسف رضا گیلانی، نواز شریف جیسے بڑے نام موصوف کے اپنے بندے تھے۔ ملک کے ہر ادارے کے سربراہ سمیت تمام بیوروکریسی آئین کی بجائے پاکی مافیا ڈان کی عزت کرتی ہے۔ بڑے سے بڑے واقعے پر میڈیا نام نشر کرنے سے گریز کرتا ہے۔ مولانا سمیع الحق کے قتل پر بھی نجی ہاؤسنگ سوساءٹی کے نام سے خبر نشر اور شائع ہوئی تھی۔

کسی مائی کے لال نے ہاؤسنگ سوساءٹی کا نام لکھنے کی جرات نہیں کی تھی۔ سسلین مافیا ڈان توتورینا جذبات میں بہہ کر قتل و غارت پر اتر آتے۔ جذبات ہی توتورینا کی گرفتاری کا باعث بنے اور جیل میں مر گئے۔ پاکی مافیا ڈان ہر وہ کام کرتے ہیں جو توتورینا نے کیے تھے مگر مات نہیں کھاتے ہیں۔ بلکہ ہرممکن طریقے سے جیتتے ہیں

• About
• Latest Posts

ارشد سلہری

Latest posts by ارشد سلہری (see all)

• عورتیں ہم جنس پسند کیوں ہوتی ہیں؟ - 01/02/2022
• عبادات سے سماجی ذمہ داری زیادہ ضروری ہے - 03/07/2021
• اسلامی نظام کیا ہے اور نفاذ کیسے ہوگا - 29/06/2021