ہم اپنا سر دیں گے لیکن پاکستان پر آنچ نہیں آنے دیں گے: بلاول بھٹو


پاکستان پیپلزپارٹی کے چیئرمین بلاول بھٹوزرداری نے کہا ہے کہ بنگلا دیش وفاقی اکائیوں کے حقوق نہ ماننے سے بنا تھا۔ اگر پیپلز پارٹی جیسی جماعتیں کھڑی نہیں ہوں گی تو کل کلاں سندھو دیس اور سرائیکی دیس بھی بن سکتا ہے۔ عمران خان کی حکومت کو گھر جانا چاہیے۔عمران خان نے جمہوریت کا جنازہ نکال دیا ہے۔ ہم خون دیں گے، سر دیں گے لیکن پاکستان پر آنچ نہیں آنے دیں گے۔

انہوں نے آج حیدر آباد پریس کلب میں میڈیا سے گفتگو کرتے ہوئے کہا کہ ظلم ایک حد تک برداشت ہوتا ہے۔ وفاق کی ذمے داری ہے کہ تمام صوبوں کو جوڑ کر ملک چلائے۔ پہلے بھی مشکل حالات کا سامنا کر کے ملک کو بچایا ہے۔ بلاول بھٹو زرداری نے کہا کہ ملک چلانا کرکٹ میچ نہیں ہے۔ اس حکومت کو گھر جانا چاہیے۔ جمہوریت کا جنازہ نکال دیا گیا ہے، عمران خان نے ہر سیاسی جماعت کی قیادت کو قیدی بنا رکھا ہے۔

بلاول بھٹو زرداری نے کہا کہ انتخابی مہم میں ہی جانتے تھے جی ڈی اے، ایم کیو ایم، پی ٹی آئی اتحاد کا کیا خواب تھا۔ اب انہوں نے اپنی نیت واضح کردی ہے۔ انہوں نے ہاتھ دکھا دیا اور اس جانب قدم اٹھانے کا اشارہ دے دیا۔ ان کی نیت کراچی پر غیر آئینی طریقے سے قبضہ کرنا ہے۔ ان کا خواب تھا کہ کراچی کے لیے ایک الگ انتظامی یونٹ بنایا جائے۔


Facebook Comments - Accept Cookies to Enable FB Comments (See Footer).