قرۃ العین حیدر سے لے کر میڈیا کورٹس تک


اخبار نویس کے ہاتھ میں تو صرف قلم ہوتا ہے توپ و تفنگ تو نہیں پھر میڈیا پر کڑا سنسر کیوں؟ قدرت اللہ شہاب اپنی کتاب ”شہاب نامہ“ میں لکھتے ہیں کہ ”جنرل ایوب نے مارشل لاء نافذ کیا تو ساتھ ہی اخبارات پر سنسر لگ گیا۔ افواہیں پھیلانا بھی جرم قرار دیا گیا مارشل لاء لگتے ہی ایک روز صبح سویرے قرۃ العین حیدر میرے ہاں آئی آتے ہی بولی ’اب کیا ہو گا؟ ‘ کس بات کا میں نے وضاحت طلب کی۔ عینی بولی ’اب ادبی چانڈو خانوں میں بیٹھ کر گفتگو کرنا بھی جُرم ٹھہرا؟ ‘ ہاں، میں نے کہا گپ شپ بڑی آسانی سے افواہ سازی کے زمرے میں آ کر گردن زدنی قرار دی جا سکتی ہے۔ عینی بڑے کرب سے بولی ’تو گویا اب بھونکنے پر بھی پابندی عائد ہے‘ میں نے مارشل لاء کے ضابطے کے تحت بھونکنے کے خطرات و خدشات کی وضاحت کی تو عینی کے آنسو میں تیرنے لگے اور ایک ٹھنڈی آہ بھر کر کسی قدر لاپرواہی سے بولی ارے بھئی روز روز کون بھونکنا چاہتا ہے لیکن بھونکنے کی آزادی کا احساس بھی تو عجیب نعمت ہے۔ “

شہاب آگے چل کر لکھتے ہیں کہ قرۃ العین باغیانہ خیالات کی لڑکی نہیں تھی اور نہ اس کے قلم کی روشنائی میں تخریب پسندی، فحاشی، تلخی اور بے راہ روی کی کالک تھی ”میرے صنم خانے“ کی مصنفہ زندگی کی چلبلاہٹوں، ہلکی پھلکی رنگینیوں، رعنائیوں، ثقافتی تصادموں، سماجی بوکھلاہٹوں اور دل و دماغ کی فسوں کاریوں میں کچھ حقیقی اور کچھ رومانوی رنگ بھرنے کی ملکہ تھی۔ لیکن سنسر شپ کے تخیل سے اسے شدید ذہنی جھٹکا لگا اس جھٹکے کے ردعمل نے اس کے قلم کی باگ ”آگ کا دریا“ کی طرف موڑ دی۔

قدرت اللہ شہاب لکھتے ہیں کہ جب مجھے سیکرٹری اطلاعات بنایا گیا تو صدر سے لے کر وزیروں تک اور گورنروں سے لے کر چیدہ چیدہ ممبران اسمبلی تک چہار طرف سے فرمائشوں کی وہ بوچھاڑ شروع ہوئی کہ میرا دم گھٹنے لگا۔ کسی کو گلہ ہوتا اس کی تصویر نہیں چھپی کوئی کہتا کہ فلاں تنقید غلط ہے اور حکومت کا وقار گرانے کے لیے اچھالی جا رہی ہے عام مخلوق خدا کی طرح کچھ وزیر بیمار پڑے رہتے تھے ان کی بیماری کی خبر چپھتی تو وہ اُسے شرانگیزی قرار دے کر اخبار نویس کو سبق سکھانے کا عہد کرتے۔

آج بھی محسوس ہو رہا کہ ہم ایوبی دور میں جی رہے ہیں میڈیا کے ”کڑاکے“ نکالنے کے لیے میڈیا کورٹس بنانے کی باتیں ہو رہی ہیں جو اینکر یا اخبار نویس حکومت کی خرابیوں کی نشاندہی کرتا ہے پیمرا کے ذریعے اس کی زبان بندی کر دی جاتی ہے یا پھر میڈیا مالکان کو کہہ کر اُسے نوکری سے نکلوا دیا جاتا ہے۔

امام الوزرا عمران خان حکومت میں آنے سے قبل آزاد میڈیا کے بڑے داعی تھے۔ خان صاحب یہ میڈیا ہی تھا جس نے آپ کے نظریات کو سپورٹ کیا اور آپ اقتدار کی معراج تک پہنچے۔ جب آپ نے طویل دھرنا دیا تو میڈیا چوبیس چوبیس گھنٹے آپ کو لائیو کوریج دیتا تھا۔ حالانکہ اس وقت آپ کے سب سے بڑے سیاسی مخالف میاں نواز شریف کی حکومت تھی انھوں نے میڈیا پر پابندی نہیں لگائی۔ جب آپ اقتدار میں آئے تو اب میڈیا بُرا کیوں ہو گیا؟

جناب وزیراعظم صاحب! برداشت کسی بھی معاشرے کی روح ہوتی ہے معاشرے میں جب برداشت کم ہوتی ہے تو مکالمہ کم ہو جاتا ہے۔ اور جب مکالمہ کم ہوتا ہے تو معاشرے میں وحشت بڑھ جاتی ہے۔ اختلاف، دلائل اور منطق پڑھے لکھے لوگوں کا خاصہ ہے اور یہ فن جب تک کسی معاشرے میں رہتا ہے تو وہ ترقی کرتا ہے اور جب جب زبان بندی یا سوچ پر قدغنیں لگائی گئی تو وہ معاشرہ انارکی کا شکار ہو جاتا ہے۔

عالی جاہ وزیراعظم صاحب یکسانیت کوئی خوبی ہوتی تو قدرت خود اس کا انتظام کرتی بو قلمونی حسن حیات ہے، طبعی دنیا میں بھی اختلاف کے بے شمار مظاہر ہیں، مختلف رنگ، مختلف نسلیں، مختلف زبانیں اور مختلف تہذیبیں یہ سب تنوع کی مظہر ہیں خرابی معاشرے میں اُس وقت پیدا ہوتی ہے جب حکمران سمجھتے ہیں کہ میں خدا کا اوتار ہوں اور دوسرے میرے پاؤں کی پیدوار، جب تکوینی و طبیعی دنیا میں اختلاف ناگزیر ہے تو پھر فکری دنیا میں اختلاف پر پابندی کیوں؟ جس معاشرے میں اختلاف نہ ہو اُس معاشرے میں ارتقاء کا سارا عمل رک جاتا ہے۔

زندگی انسانی آرزوؤں کی مانند طویل نہیں ہوتی اسے ایک دن ختم ہو جانا ہے اور اس کے ساتھ ہی دنیاوی عہدے اور شان و شوکت بھی ختم ہو جاتے ہیں۔ سیاست دان کا سب سے بڑا اثاثہ صبر و برداشت اور مستقل مزاجی ہوتی ہے بڑی سے بڑی چوٹ کھا کے بھی انتقامی خواہش کو دبائے رکھنا مدبر لیڈر شپ کا خاصا ہوتا ہے۔

بشارت راجہ

Facebook Comments - Accept Cookies to Enable FB Comments (See Footer).

بشارت راجہ

بشارت راجہ شہر اقتدار سے پچھلی ایک دہائی سے مختلف اداروں کے ساتھ بطور رپورٹر عدلیہ اور پارلیمنٹ کور کر رہے ہیں۔ یوں تو بشارت راجہ ایم فل سکالر ہیں مگر ان کا ماننا ہے کہ علم وسعت مطالعہ سے آتا ہے۔ صاحب مطالعہ کی تحریر تیغ آبدار کے جوہر دکھاتی ہے۔ وہ کہتے ہیں کہ وسعت مطالعہ کے بغیر نہ لکھنے میں نکھار آتا ہے اور نہ بولنے میں سنوار اس لیے کتابیں پڑھنے کا جنون ہے۔

bisharat-siddiqui has 157 posts and counting.See all posts by bisharat-siddiqui