ناصر اسلم راجہ کا کلام ……صحافیوں کے نام

دیگر دوست احباب کی طرح پیارے دوست ناصر اسلم راجہ صاحب بھی اخباری کارکنوں کی دگرگوں حالت پر کافی پریشان دکھائی دیتے ہیں۔گزشتہ دنوں انہوں نے صحافیوں کی تازہ ترین بگڑتی معاشی صورتحال پر ایک نظم لکھی جو من وعن قارئین کو پیش کی جارہی ہے۔
اب تو اتنی بھی میسر نہیں ہے روزنامے میں
جتنی خرچ ہوجاتی ہے آنے جانے میں !
٭٭٭٭٭٭٭
یہ گھر کا کرایہ ، یہ بچوں کی فیس ، یہ بجلی کا بل دینا ہے
جمع ،تفریق کرتا رہتا ہوں بیٹھ کے غسل خانے میں
٭٭٭٭٭٭٭
پاک سرزمین کا نظام ٗ قوت اخوت عوام
یہ فقرے رہ گئے ہیں اب فقط قومی ترانے میں
٭٭٭٭٭٭٭
ہمارا بھی دفتر ہوتا، اخبار ہوتا ، ٹی وی چینل ہوتا
کیا کوئی کمی تھی یارب تیرے خزانے میں
٭٭٭٭٭٭٭
ہم نے بھی بہت سی خونچکاں تحریریں لکھی ہیں
کہیں بھی ذکر نہ ہوا ہمارا، پورے زمانے میں
٭٭٭٭٭٭٭
کبھی تھپڑ، کبھی مکا، کبھی گلاس دے مارا ہے
ہمارے اینکرز کو کمال مہارت ہے مہمانوں کو لڑوانے میں
٭٭٭٭٭٭٭
کس نے مارا ، کس نے روکا ، کوئی ویڈیو بناتا رہا
معلوم ہوا بعدمیں کچھ اپنوں کا بھی ہاتھ ہے ہم کو پٹوانے میں
٭٭٭٭٭٭٭
کل سے دفتر کی سیڑھیاں مت چڑھنا ، پہلی کو کرلیں گے حساب کتاب
بس اتنی سی عزت ہے ساقی تیرے مے خانے میں
٭٭٭٭٭٭٭
اچھی گاڑی ٗ اپنا مکان ٗ بچوں کی اعلیٰ تعلیم
زندگی گزار دی سب نے اسی تانے بانے میں
٭٭٭٭٭٭٭
مہنگا کاغذا، مہنگی سیاہی ، مہنگی پرنٹنگ مشین بھی ہے
بس ایک صحافی سستا ہے اس صحافتی کارخانے میں
٭٭٭٭٭٭٭
یہ فلاں کا ، یہ اس سیاسی پارٹی کا ،یہ بندہ ہے ایجنسیوں کا
آج پڑھ لیا ہے میں نے ایک خفیہ حکومتی حکم نامے میں
٭٭٭٭٭٭٭
بلڈ پریشر ، شوگر کا مرض اور ہارٹ اٹیک
یہ ہمارے معاون تمغے ہیں بے بسی سے مرجانے میں
٭٭٭٭٭٭٭
تندی باد مخالف سے گھبرا اے ناصر
اب اس کو بھی لطف آتا ہے مجھ جیسوں کو گرانے میں
ناصر اسلم راجہ صاحب درد دل رکھنے والے حساس طبیعت کے نرم دل انسان ہیں ۔ ان کا کلام جس دوست،دشمن یا شریک بھائی کو اچھا لگے تو خود رابطہ کرکے داد بھی دے سکتا ہے اور نکتہ چینی کی بھی اجازت ہے۔مجھے ذاتی طور پر بہت اچھا لگا۔