لندن برج حملے کی کوریج: لندن حملہ آور عثمان خان کو ’پاکستانی نژاد‘ لکھنے پر ڈان اخبار کے خلاف احتجاج

پیر کی شام چند نامعلوم افراد نے انگریزی اخبار ڈان کے دفتر کے باہر مظاہرہ کیا اور اخبار میں برطانیہ میں چاقو سے حملہ کرنے والے عثمان خان کے تعارف میں پاکستان لکھنے کے خلاف نعرے بازی کی۔

ڈان اخبار نے اپنی سرخی میں برطانوی حکام کا حوالہ دیتے ہوئے کہا کہ پاکستانی نژاد برطانوی حملہ آور دہشگردی میں سزا یافتہ تھا۔

ڈان کے سٹی ایڈیٹر عدیل رضا نے بی بی سی کو بتایا کہ ان مظاہرین کے بارے میں معلوم نہیں ہے کہ یہ کون لوگ ہیں البتہ وہ دفتر کے باہر اخبار کی سرخی کے خلاف احتجاج کر رہے ہیں۔ ان کے اندازے کے مطابق ان افراد کی تعداد دو درجن سے زیادہ تھی۔

ڈان میڈیا گروپ میں کام کرنے والے صحافیوں نے سوشل میڈیا پر ان نامعلوم مظاہرین سے متعلق بتایا کہ انھوں نے دفتر کا گھیراؤ کر رکھا ہے۔

ڈان اخبار کے رپورٹر کاشف عباسی نے اپنے ٹویٹ میں لکھا کہ ’دو درجن کے قریب جتھے نے مظاہرہ کیا جن میں سے اکثریت نے وہ خبر ہی نہیں پڑھی تھی جس پر وہ احتجاج کر رہے تھے‘۔

صحافی شیراز حسن نے اس احتجاج کی ویڈیو بھی ٹویٹر پر شیئر کی۔

برطانیہ میں لندن برج حملے میں ملوث شخص عثمان خان کی شہریت بطور پاکستانی نژاد برطانوی سامنے آنے کے بعد سوشل میڈیا پر ایک نئی بحث شروع ہوئی۔

یہ بحث اس وقت چِھڑی جب پاکستان کے وزیر برائے سائنس و ٹیکنالوجی فواد چودھری نے ڈان کی اس خبر سے متعلق ہیڈ لائن کو ٹوئٹر پر تنقید کا نشانہ بنایا۔

فواد چوہدری کا اپنی ٹویٹ میں کہنا تھا کہ ’ڈان برائے مہربانی اس قوم پر کچھ ترس کھائیں۔

’میں برطانوی دہشتگردوں کو پاکستان سے جوڑنے کی آپ (ڈان) کی گھٹیا کوششوں پر حیران ہوں۔ انور العولاقی اور انجم چودھری دونوں برطانوی شہری ہیں اور ان کا کشمیر یا پاکستان سے کوئی تعلق نہیں ہے۔ برطانیہ کو اپنے اندرونی مسائل سے خود نمٹنا چاہیے۔ یہ غیرذمہ دارانہ اور گھٹیا رویہ ہے۔‘

وفاقی وزیر برائے انسانی حقوق شیرین مزاری نے بھی اپنے ساتھی وزیر کے ساتھ اتفاق کرتے ہوئے ٹویٹ کیا اور کہا کہ ’ڈان کا اپنا ایجنڈا‘ ہے۔

اپنی ٹویٹ میں فواد چوہدری نے ایک اور پاکستانی انگریزی اخبار ‘دی نیوز’ کی لندن برج حملے سے متعلق خبر کی طرف دھیان دلاتے ہوئے کہا کہ برطانیہ میں مقیم رپورٹر مرتضیٰ علی شاہ نے اس شخص (عثمان خان) کی زندگی کی تفصیلات فراہم کی ہیں جس میں یہ بھی شامل ہے کہ وہ برطانیہ میں پیدا ہوا۔