شاہین شاہ آفریدی کی شاہد آفریدی کی بیٹی سے رشتے کی باتوں پر سوشل میڈیا صارفین خوشی سے نہال

  •  
  •  
  •  
  •  
  •  
  •  
  •  
  •  
  •  
  •  
  •  
  •  

شاہد آفریدی، شاہین آفریدی

Getty Images

شاہد آفریدی پاکستان کے وہ آل راؤنڈر ہیں جنھیں کرکٹ کے اکثر شائقین پسند کرتے ہیں۔

اور اسی طرح شاہین شاہ آفریدی ہیں جنھیں ان کی خطرناک بولنگ اور سٹائل کے سبب بہت سراہا جاتا ہے۔

سنیچر کی شام سوشل میڈیا پر یہ موضوع زیرِ بحث رہا کہ شاہین شاہ آفریدی کی منگنی شاہد آفریدی کی صاحبزادی سے طے پا گئی ہے۔

اور یوں چہ مگوئیوں کا ایسا سلسلہ شروع ہوا کہ بالآخر لالہ کہلائے جانے والے شاہد آفریدی کو ٹوئٹر کا سہارا لینا ہی پڑا۔

یہ بھی پڑھیے

شاہین آفریدی نے وسیم اکرم کی یاد دلا دی

’والد کی خواہش تھی کہ شاہین شاہد آفریدی کی وکٹ لیں‘

شاہین شاہ آفریدی اور پانچ وکٹیں لینے کی پرانی عادت

شاہد آفریدی نے اس بات کی تصدیق کی کہ شاہین آفریدی کے خاندان نے اُن کی بیٹی کے لیے اُن کے خاندان سے رابطہ کیا ہے۔

انھوں نے مزید کہا کہ دونوں خاندان رابطے میں ہیں اور جوڑے آسمانوں پر بنتے ہیں، اگر اللہ کی مرضی ہوئی تو یہ جوڑا بھی بن جائے گا۔

انھوں نے شاہین آفریدی کے کھیل اور زندگی میں کامیابی کے لیے بھی دعا کی۔

اس کے کچھ ہی دیر بعد شاہین آفریدی نے ان کی ٹویٹ کے جواب میں شاہد آفریدی کا دعاؤں کے لیے شکریہ ادا کرتے ہوئے کہا کہ آپ پوری قوم کا فخر ہیں۔ شاہین آفریدی نے لکھا کہ اللہ سب کے لیے آسانیاں پیدا کریں۔

بالآخر ان دونوں کھلاڑیوں کی ٹویٹس کے بعد سوشل میڈیا صارفین کے ذہنوں میں جو سوالات اٹھ رہے تھے انھیں تو ایک بنیاد ملی، تاہم منگنی کی جو باتیں کی جا رہی تھیں وہ بھی کچھ حد تک تھم گئیں۔

ایک صارف ذکریا نے شاہد آفریدی کے شاہین آفریدی کے ہاتھوں بولڈ ہونے کی ویڈیو شیئر کرتے ہوئے شاہین آفریدی کو مشورہ دیا کہ آئندہ وہ شاہد آفریدی کو صرف چھکے والی گیند کرائیں۔

عروج نامی صارف نے شاہین آفریدی کو مشورہ دیا کہ اب وہ شاہد آفریدی کو لالہ کے بجائے کچھ اور کہنے کی عادت ڈال لیں کیونکہ وہ ان کے ہونے والے سسر ہیں۔

صارف احمد علی نے لکھا کہ شاہین شاہ آفریدی ایک ہینڈسم اور زبردست شخصیت کے مالک ہیں اور اگر وہ شاہد آفریدی کی بیٹی کے شوہر بنے تو یہ دنیا کے سب سے خوبصورت جوڑوں میں سے ہو گا۔

ایک اور صارف فرحان خان نے لکھا کہ وہ وسیم اکرم، وقار یونس اور شعیب اختر کے بعد اگر پاکستان سے کسی بولر کو پسند کرتے ہیں تو وہ شاہین آفریدی ہیں۔ انھوں نے دونوں کے لیے خوشیوں کی دعا کرتے ہوئے لکھا کہ وہ اس اعلان سے بہت خوش ہیں۔

صارف اقرا حفیظ نے شاہین آفریدی اور شاہد آفریدی کی تصاویر شیئر کرتے ہوئے لکھا کہ داماد سٹار، سسر سوپر ڈوپر سٹار، یہ کتنا زبردست خاندان ہے۔

تاہم کچھ لوگ ایسے بھی تھے جنھیں شاہد آفریدی اور شاہین آفریدی کی جانب سے اس معاملے پر عوامی بات کرنا زیادہ نہیں بھایا۔

ایک صارف زاہد محمود اعوان نے لکھا کہ وہ مانتے ہیں کہ اس کو خفیہ رکھنا چاہیے کیونکہ کچھ بے وقوف لوگ اس پر بہت توہین آمیز تبصرے بھی کریں گے۔ انھوں نے شاہین آفریدی کے رویے کی تعریف کرتے ہوئے ان کے لیے نیک تمناؤں کا اظہار بھی کیا۔


  •  
  •  
  •  
  •  
  •  
  •  
  •  
  •  
  •  
  •  
  •  
  •  

Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 21709 posts and counting.See all posts by british-broadcasting-corp