سعودی عرب: آبِ زم زم کی تقسیم کے لیے جدید ٹیکنالوجی کا استعمال
سعودی عرب کے سرکاری خبر رساں ادارے ‘سپا’ نے رپورٹ کیا ہے کہ اتوار کو اس نئے اسمارٹ روبوٹ نظام کا افتتاح مکہ میں سعودی عرب میں دونوں مساجد کے امور دیکھنے والی پریزیڈنسی کے صدر ڈاکٹر عبدالرحمٰن بن عبدالعزیز السدیس نے کیا۔
تقرير مرئي| معالي الرئيس العام يدشن الروبوت الذكي لتوزيع عبوات ماء #زمزم.#رئاسة_شؤون_الحرمين pic.twitter.com/ME8F3DZpgA
— رئاسة شؤون الحرمين (@ReasahAlharmain) June 13, 2021
سعودی خبر رساں ادارے ‘عرب نیوز’ نے رپورٹ کیا کہ افتتاح کے موقع پر عبدالرحمٰن السدیس نے کہا کہ وبا کے دور میں جدید ٹیکنالوجی کا استعمال ضروری تھا۔
السدیس کا کہنا تھا کہ اسمارٹ روبوٹ حفظان صحت کے طریقوں کے مطابق آب زم زم تقسیم کرے گا اور اس سے ایک دوسرے سے رابطے سے بچا جا سکے گا۔
اس اسمارٹ روبوٹ نظام کی مدد سے انسانی مداخلت کے بغیر زم زم کا پانی آنے والے زائرین اور اسٹاف میں تقسیم کیا جا سکے گا۔ اس سے دونوں مساجد میں نقل و حرکت بھی متاثر نہیں ہو گی۔
الرئيس العام يدشن الروبوت الذكي لتوزيع عبوات ماء زمزم.https://t.co/Dx0zt1JkyF#رئاسة_شؤون_الحرمين pic.twitter.com/yo8CTVmfaw
— رئاسة شؤون الحرمين (@ReasahAlharmain) June 12, 2021
یہ روبوٹ کام کس طرح کرے گا اس بارے میں عرب نیوز کی رپورٹ میں بتایا گیا کہ دونوں مساجد میں آنے والے زائرین اور وہاں موجود اسٹاف اپنے قریب سے گزرنے والے روبوٹ سے باآسانی زم زم کے پانی کی بوتل اٹھا سکیں گے۔
واضح رہے کہ دنیا بھر میں عالمی وبا کے آغاز کے بعد سے سعودی عرب نے جہاں عمرہ اور حج کے لیے لوگوں کی تعداد کو محدود کیا ہے وہی حکام کی جانب سے وبا کے پھیلاؤ کو روکنے کے لیے مختلف طریقے اپنائے جا رہے ہیں۔
گزشتہ ہفتے سعودی جنرل پریزڈنسی نے مسجد الحرام میں جراثیم کش اسپرے کے لیے دس اسمارٹ روبوٹ فراہم کیے تھے۔
یاد رہے کہ سعودی عرب نے ہفتے کو اعلان کیا تھا کہ رواں برس صرف 60 ہزار مسلمانوں کو حج کی ادائیگی کی اجازت دی جائے گی جب کہ غیر ملکی زائرین حج نہیں کر سکیں گے۔
سعودی وزارت خارجہ کی جانب سے ٹوئٹر پر وزارت حج اورعمرہ کے جاری بیان میں کہا گیا تھا کہ رواں برس سعودی شہری اور ملک میں مقیم 60 ہزار افراد کو حج کرنے کی اجازت دی جائے گی۔
بیان میں کہا گیا تھا کہ حج کرنے کے خواہش مند زائرین کی عمر 18 سے 65 برس کے درمیان ہونی چاہیے جب کہ انہیں کرونا ویکسی نیشن مکمل کرنا ضروری ہو گا۔
Facebook Comments - Accept Cookies to Enable FB Comments (See Footer).