بحری جہاز سے سمندر میں گرنے والے چینی شہری کو پاکستانی ماہی گیروں نے بچا لیا
پاکستان کی سمندری حدود میں چینی تجارتی بحری جہاز سے حادثاتی طور پر گِر کر غوطے کھانے والے ایک چینی شہری کو پاکستان کے مقامی ماہی گیروں نے بچا لیا ہے۔ حکام کا کہنا ہے کہ چینی شہری بحری جہاز سے سمندر میں گر گیا تھا۔
حکام کے مطابق کراچی کے قریب واقعے بنڈال جزیرے کے پاس سے بدھ کے روز اس چینی شہری کو بچایا گیا ہے۔ ماہی گیروں کی قریبی بستی ابراہیم حیدری کے رہائشی ماہی گیر حاجی عبداللہ نے بتایا کہ انھوں نے پھوٹی کریک کے قریب ایک شخص کو ڈوبتے دیکھا تھا جس کے بعد وہ فوراً وہاں پہنچے اور دیگر ماہی گیروں کی مدد سے اس شخص کو باہر نکالا۔
بعدازاں پتا چلا کہ وہ غیرملکی چینی شہری تھا جس کا نام زوو ژیانگ ہے۔
دوسری جانب میری ٹائم سکیورٹی ایجنسی کا کہنا ہے کہ ’پی ایم ایس اے بیس صداقت‘ کو مقامی ماہی گیروں کے ذریعے ہنگامی کال موصول ہوئی کہ انھوں نے ایک ڈوبتے ہوئے چینی شخص کو بچا لیا ہے۔
یہ بھی پڑھیے
چار ہزار مہنگی ترین گاڑیوں سے لدا بحری جہاز سمندر میں ڈوب گیا
لنڈی کوتل: والد جو نو دن بعد بھی دریا میں ڈوبنے والے بیٹے کو ڈھونڈ رہے ہیں
غازی آبدوز جس کے ڈوبنے کی اصل وجہ پچاس سال بعد بھی ایک معمہ ہے
ایک صدی قبل غرق ہونے والے بحری جہاز میں ایسا کیا ہے کہ اسے دوبارہ تلاش کیا جا رہا ہے؟
اس چینی شہری کو مقامی ماہی گیروں کی کشتی ’المدیہ‘ پر سوار ماہی گیروں نے بچایا جس کے بعد اسے بحفاظت محفوظ مقام پر پہنچا دیا گیا۔
چینی شہری کو ابراہیم حیدری میں میری ٹائم کے مرکز میں ابتدائی طبی امداد فراہم کی گئی اور تفصیلی چیک اپ کے لیے ہیڈ کوارٹر میری ٹائم منتقل کیا گیا۔
بعد میں حکام کو اس بات کی تصدیق موصول ہوئی کہ یہ شخص 10 اگست کو کوسکو شپنگ کے ’زنگ شنگہائی‘ نامی تجارتی جہاز سے کراچی بندرگاہ کے قریب گرا تھا۔
