دبئی میں پرانے مندر کی تعمیر کے 50 برس بعد بننے والا شہر کا سب سے بڑا مندر تصاویر میں
افتتاحی تقریب میں وزیرِ رواداری و ہم آہنگی شیخ نہیان بن مبارک النہیان اور انڈیا کے متحدہ عرب امارات کے لیے سفیر سنجے سدھیر نے بھی شرکت کی۔
چار اکتوبر کو دبئی کے جبل علی ولیج میں حکام اور بین المذاہب رہنماؤں کی جانب سے اس مندر کا افتتاح کیا گیا۔
اس حوالے سے جاری کی گئی تفصیلات کے مطابق اس مندر میں جس ہال میں عبادت کی جائے گی اس کا رقبہ تقریباً پانچ ہزار مربہ فٹ ہے جب کہ اس میں 1500 افراد ایک وقت میں عبادت کر سکیں گے۔
اس سے قبل دبئی میں دو چھوٹے مندر ہوا کرتے تھے جو پرانی عمارتوں کے کمروں میں بنائے گئے تھے۔
خبر رساں ادارے رؤٹرز کے مطابق یہ مندر دبئی میں پرانے مندر کی تعمیر کے 50 برس بعد بنایا گیا ہے اور یہ امید کی جا رہی ہے کہ یہ نہ صرف عبادت کی جگہ ہو گی بلکہ ایک 'علم کا مرکز' اور 'معاشرے میں ہم آہنگی پیدا کرنے کے لیے' بھی اہم ثابت ہو گا۔
اس مندر کا افتتاح ہندوؤں کے تہوار دسہرہ کے آغاز سے چند گھنٹے پہلے کیا گیا۔
اس افتتاحی تقریب کے منتظم راجو شروف نے اس موقع پر کہا کہ 'آج دبئی میں مندر کا باضابطہ افتتاح کیا جا رہا ہے۔ یہ مندر ’بر دبئی‘ میں پرانے مندر کی تعیمر کے 50 برس بعد تعمیر کیا گیا ہے۔ '
یہ بھی پڑھیے
کراچی کے علاقے گرو مندر کا مندر ہے کہاں؟
رام مندر کی دو کروڑ میں خریدی گئی زمین منٹوں میں 18 کروڑ کی کیسے ہو گئی؟
ژوب کا مندر ہندو برادری کے حوالے
لکھنؤ کے مندر میں افطار کا اہتمام
انھوں نے یہ بھی کہا کہ اس مندر میں 16 مختلف مورتیاں رکھی گئی ہیں تاکہ تمام ہندوؤں کو یہاں عبادت کرنے کا موقع مل سکے۔
اس مندر میں تمام مذاہب کے افراد کو آنے کی اجازت دی گئی ہے اور اس سے قبل اس کا غیر رسمی افتتاح یکم ستمبر کو کیا گیا تھا جب ہزاروں سیاحوں کو یہاں آ کر اس مندر کا فنِ تعمیر دیکھنے کی اجازت دی گئی تھی۔
