پاکستان سیمی فائنل میں، ’نیدرلینڈز کی پوری ٹیم کو پی ایس ایل کا کنٹریکٹ دو بھائی‘

’یہ آج تک کی سب سے غیر متوقع ٹیم ہے، آپ کبھی نہیں بتا سکتے کہ یہ کیا کرنے والے ہیں کیونکہ اس بات کا انھیں خود بھی نہیں پتا ہوتا‘

پاکستان کی بنگلہ دیش کے خلاف پانچ وکٹوں سے جیت کے فوراً بعد ان جذبات کا اظہار سوشل میڈیا صارف فرزین عمر نے کیا اور شاید آپ میں سے بھی بہت سے ان کی اس بات سے متفق ہوں۔

پاکستانی کرکٹ ٹیم کے لیے ایڈیلیڈ کا میدان ماضی کی طرح ایک بار پھر آج اچھی خبر لے آیا ہے اور پاکستان نے بنگلہ دیش کو ہرا کر ٹی ٹوئٹی ورلڈکپ کے سیمی فائنل تک بالاخر رسائی حاصل کر لی ہے۔

اگر، مگر، ایسے، ویسے کے مخمصے کی صورتحال سے نکل کر ٹی ٹوئنٹی ورلڈکپ کے سیمی فائنل میں رسائی حاصل کرنے والی گروپ ٹو کی پہلی کرکٹ ٹیم پاکستان ابھی اپنے آخری گروپ میچ کے لیے میدان میں اتری بھی نہیں تھی کہ نیدرلینڈز نے جنوبی افریقہ جیسی مضبوط ٹیم کو ہرا کر سیمی فائنل میں پہنچنے کی اس کی امیدوں روشن کر دیں۔

https://twitter.com/DrFarzeenOmer/status/1589166026474016768

تو جناب ایسے میں جب پاکستان کو نیدرلینڈ کی صورت میں ایک لائف لائن بھی حاصل ہو اور پاکستان میچ بھی جیت جائے تو سوشل میڈیا صارفین مختلف ٹرینڈز کے ذریعے اپنی آرا دینے اور خوشی منانے سے کیسے پیچھے رہ سکتے ہیں۔

کوئی نیدرلینڈز کی ٹیم کو پی ایس ایل کے کنٹریکٹ دینے کی بات کرتا دکھائی دیا تو کسی کو پاکستانی کوچ ثقلین مشتاق کے’قدرت کے نظام‘ کے فقرے یاد آئے۔

https://twitter.com/penduProduction/status/1589094420573720576

ایک سوشل میڈیا  صارف نے لکھا کہ میرے انڈین کرکٹ شائقین دوست کہہ رہے تھے کہ پاکستان کراچی کی پرواز کے لیے رسائی حاصل کرے گا، پاکستانی کرکٹ ٹیم کراچی کی بجائے اب سڈنی کے ایئرپورٹ پر اترے گی اور انڈیا سے پہلے سیمی فائنل کھیلے گی۔ اس کہتے ہیں قدرت کا نظام۔‘

https://twitter.com/Noor_Marriii/status/1589158131787255810

ایک اور صارف نے لکھا کہ ’پاکستانی ٹیم مبارک ہو، یہ ٹورنانمٹ قدرت کے نظام کے سہارے شاندار رہا ہے جس نے پاکستان کو سیمی فائنل میں پہنچنے میں مدد دی۔ محمد حارث کی شمولیت نے پاکستانی ٹیم پر بڑا فرق ڈالا ہے۔‘

https://twitter.com/BasitSubhani/status/1589161077627322368

ایک صارف نے تو یہاں تک لکھ دیا کہ سیمی فائنل تک رسائی میں پاکستانی ٹیم کی کارکردگی کا عمل دخل ایک فیصد جبکہ قدرت کے نظام کے تحت دعاؤں کا کردار 99 فیصد ہے۔

پاکستانی سوشل میڈیا صارفین نے پاکستان اور بنگلہ دیش کے میچ کے ہر مرحلے کو انجوائے کیا اور ہر سیچویشن پر تبصرے اور رائے کا اظہار کرتے دکھائی دیے۔ چاہے وہ بنگلہ دیشی بلے باز شکیب الحسن کے ایل بی ڈبلیو آؤٹ کا فیصلہ ہوں یا شاہین شاہ کی 22 رنز کے عوض شاندار بولنگ ہو۔

یہ بھی پڑھیے

’قدرت کا نظام‘ پاکستان کی تائید کر پائے گا؟ سمیع چوہدری کا کالم

ٹی ٹوئنٹی ورلڈ کپ: پاکستان بنگلہ دیش کو ہرا کر سیمی فائنل میں پہنچ گیا، ہالینڈ نے کام دکھا دیا

’سُنا ہے آپ کے سابق وزیراعظم کو گولی لگی ہے، اور آپ کے ہاں حالات خراب ہیں‘

شکیب الحسن کے ایل بی ڈبلیو کے فیصلے پر جہاں انڈین صارفین پاکستانی ٹیم پر الزامات عائد کر رہے تھے وہی پاکستانی صارفین نے بھی اس فیصلے پر کھل کر رائے دی اور اس فیصلے کو غلط قرار دیا۔

اس بارے میں ’ناٹ آوٹ ‘ٹرینڈ کرتا رہا ایک پاکستانی صارف نے اپنی رائے دیتے ہوئے لکھا کہ ’ اتنے اہم میچ میں ایسی تھرڈ امپائرنگ بالکل مجرمانہ ہے اور صرف اس لیے کہ یہ فیصلہ ہمارے حق میں گیا، اس کا یہ مطلب نہیں کہ میں اس کی تائید کروں، یہ ناٹ آوٹ تھا۔‘

https://twitter.com/namaloomafraaad/status/1589124392415789056

ایک اور صارف نے انڈین سوشل میڈیا صارفین کو جواب دیتے ہوئے لکھا کہ ’کم از کم ہم پاکستانی یہ تسلیم کر رہے ہیں کہ یہ ناٹ آوٹ تھا اور امپائر غلط تھا۔‘

https://twitter.com/thisismyshiteu0/status/1589127260589944837

ایسے میں کچھ افراد پاکستان کو فتح کی مبارکباد کے ساتھ ساتھ آگے کے میچز کے لیے مشورے دیتے بھی دکھائی دیے۔

ایک صارف نے لکھا کہ ’اوپنگ پلیئر تبدیل کریں، حارث اور شان کو اوپن کرنے دیں اس کے دو فائدے ہیں۔ ایک الٹے اور سیدھ ہاتھ کا کمبینشن اور دوسرا پاور پلے کا فائدہ اٹھانے کا موقع۔ ہم اس ورلڈکپ کو جیتنا چاہتے ہیں مہربانی کر کے اگلے دو میچوں کے لیے ایسا کریں۔‘

https://twitter.com/AMuslim09/status/1589165963961724929

ایسے میں خیبر پختونخوا کے صوبائی وزیر صحت تیمور جھگڑا کہاں پیچھے رہنے والے تھے انھوں نے بھی لکھا کہ ’پاکستان مبارک ہو، اب ہمیں اس دوسرے موقع کا بھرپور فائدہ اٹھانا ہے۔‘

https://twitter.com/Jhagra/status/1589158860799213575