کیا چین کا ترقیاتی ماڈل پاکستان کے معاشی ڈھانچے سے مطابقت رکھتا ہے؟
اسی طرح چین پاکستان اقتصادی راہداری اربوں ڈالر کا انفراسٹرکچر ڈویلپمنٹ منصوبہ ہے جس میں ہائی ویز، ریلوے، پائپ لائنز، اسپیشل اکنامک زونز، پاور پلانٹس اور متعدد دیگر منصوبے شامل ہیں۔ اسی طرز عمل میں چائنا فنانشل فیوچرز ایکسچینج، شنگھائی اسٹاک ایکسچینج اور شینزین اسٹاک ایکسچینج سمیت چینی سرمایہ کاروں نے مجموعی طور پر پاکستان اسٹاک ایکسچینج میں 40 فیصد حصص کی خریداری کی ہے۔ ان پیش رفتوں کے باوجود پاکستان نے ان کوششوں کو پائیدار شراکت داری کے پروگراموں میں تبدیل کرنے میں کوئی ٹھوس کامیابی حاصل نہیں کی ہے۔ جبکہ اس کے ذریعے دونوں ممالک کے درمیان فارن ڈائریکٹ انویسٹمنٹ ، پورٹ فولیو سرمایہ کاری، ٹیکنالوجی کی منتقلی اور معلومات کے تبادلے کی اسکیمیں مزید بڑھائی جا سکتی ہیں۔
ریاست سے ریاست، کاروبار سے کاروبار اور لوگوں سے لوگوں کی سطح پر کئی بڑے چیلنجز دیکھے گئے ہیں جنہوں نے دونوں ممالک کے درمیان اقتصادی تعاون کے مکمل فروغ کو متاثر کیا ہے۔ جہاں تک ریاست سے ریاست کے ڈھانچے کے بحران کا تعلق ہے تو پاکستان کے معاشی پالیسی سازوں کے لیے بنیادی ڈھانچے کا فرق ایک اہم تشویش ہے۔ جبکہ ملک کو نقل و حمل، توانائی، تکنیکی اور علمی مہارت، اور کمیونیکیشن فریم ورک کے لحاظ سے زیادہ وسائل سے مالا مال ہونے کی ضرورت ہے۔ بیوروکریٹک رکاوٹوں نے بھی اقتصادی تعاون کو متاثر کرنے میں اہم کردار ادا کیا ہے۔ مزید برآں، دونوں ریاستوں میں مختلف قانونی نظام، کاروباری ثقافتیں اور ریگولیٹری فریم ورکس عمل پیرا ہیں، جن کی وجہ سے متعلقہ ممالک میں کاروباری ماحول کو چلانا مشکل بن گیا ہے۔
پاکستان کے انتظامی ڈھانچے کی نوآبادیاتی نوعیت اور بیوروکریٹس کی اکثریت (ان کی دوہری مغربی شہریت اور مغربی یونیورسٹیوں سے تعلیمی ڈگریوں کے ساتھ) کا مغربی رخ بھی اہم چیلنجنگ عوامل میں سے ایک ہے۔ دوسری جانب تنگ شیاؤپنگ کی 1978 کی انقلابی اصلاحات نے چینی بیوروکریسی کی نوعیت کو مکمل طور پر تبدیل کر دیا۔ تنگ شیاؤپنگ کا ایک مشہور قول اس تبدیلی کی عکاسی کرتا ہے کیونکہ انہوں نے کہا تھا کہ ”کہ چاہے وہ سفید بلی ہو یا کالی بلی، جب تک یہ چوہوں کو پکڑ سکتی ہے، یہ ایک اچھی بلی ہے۔ نتیجتاً، چینی اپنے ہم منصب کی سوشلسٹ یا سرمایہ دارانہ فطرت سے ہٹ کر نتائج کے حصول پر توجہ مرکوز کیے ہوئے ہیں۔ پاکستان کے انتظامی اور قانونی اداروں کی جانب سے سی پیک کے تحت کچھ مشترکہ منصوبوں پر عمل درآمد میں تاخیر نے ان نتیجہ خیز چینیوں کو ناراض کیا۔
پاکستان میں دہشت گردی اور اس کے سنگین سیکیورٹی مضمرات ممکنہ طور پر دونوں ممالک کے لئے سب سے اہم چیلنج ہے۔ پاکستان کی مغربی سرحد انتہائی حساس اور زیادہ خطرناک ہے کیونکہ آس پاس کے علاقوں میں دہشت گرد تنظیموں کی جڑوں کے تاریخی عزائم موجود ہیں۔ یہ تنظیمیں چینی سرمایہ کاروں، انجینئروں اور کارکنوں کے لیے سنگین خطرناک ثابت ہوئی ہیں۔
سیاسی محاذ پر سیاسی جماعتیں، رابطے کے مناسب ذرائع استعمال کرتے ہوئے دونوں ممالک کے درمیان سفارتی تعلقات کو بہتر اور سازگار بنا سکتی ہیں۔ اس کے ذریعے مختلف موضوعات پر ان ممالک کے درمیان زیادہ سے زیادہ آگاہی پیدا ہو سکتی ہے اور اس طرح باہمی تعاون کی سطح میں اضافہ ہو سکتا ہے۔ بدقسمتی سے پاکستان میں کسی بھی بڑی سیاسی جماعت کے پاس سوشلسٹ روایات، اقدار اور اصولوں کا کوئی فارمولا نہیں ہے۔ اس کے برعکس چینی کمیونسٹ پارٹی فیصلہ سازی میں اپنے مرکزی کردار کی وجہ سے حتمی سوشلسٹ پلیٹ فارم ہے۔
تاریخی طور پر پاکستان نے جنوبی ایشیا ٹریٹی آرگنائزیشن کے رکن کی حیثیت سے ہمیشہ ایشیا کی کمیونسٹ حکومتوں کے خلاف سرمایہ دارانہ طاقتوں کے لیے فرنٹ لائن ریاست کا کردار ادا کیا ہے۔ پاکستان میں فوجی بغاوتوں اور آمرانہ حکومتوں کی ایک طویل تاریخ بھی ہے جس نے ہمیشہ بائیں بازو کی جانب جھکاؤ رکھنے والی سیاسی جماعتوں اور ان کے ایجنڈے کو دبایا ہے۔ غربت، عدم مساوات، بدعنوانی، بدانتظامی اور شرع نمو میں کمی نے پاکستان کو عوامیت پسند رہنماؤں اور ان کی تحریکوں کے لیے زرخیز زمین بنا دیا ہے۔
یہ قائدین اور پارٹیاں تمام موجودہ مسائل کا واحد حل ہونے کے مقبول نعروں کے ذریعے عوام کے جذبات کو متاثر کرتی ہیں۔ تاریخ گواہ ہے کہ یہ ادارے ملک کے سماجی و اقتصادی مسائل کا ٹھوس حل فراہم کرنے میں ناکام رہے ہیں۔ اس تاریخی حقیقت کے علم سے یہ نتیجہ اخذ کیا جا سکتا ہے کہ پاکستان کو چین کے سیاسی محاذ پر شامل کرنے کی ضرورت ہے کیونکہ عملی طور پر یہی واحد حل ہے۔
کاروباری محاذ پر، چین کے پاس سرکاری ملکیت والے انٹرپرائزز اور نجی شعبے کی شکل میں دو اہم پلیٹ فارم ہیں۔ سابقہ حکومت کے زیر انتظام وہ تنظیمیں ہیں، جن کے قومی مقاصد ہیں، اور جو کسی ملک کی معاشی ترقی اور معاشرتی استحکام میں کلیدی کردار ادا کرتی ہیں۔ ایس او ایز کی توانائی، نقل و حمل اور ٹیلی کمیونیکیشن جیسے شعبوں میں مضبوط گرفت ہے، لیکن ابھی تک ڈیجیٹل ٹیکنالوجی اور ای کامرس میں خاطر خواہ پیش رفت نہیں ہوئی ہے۔
دوسری جانب پاکستان کی آئی ٹی انڈسٹری اور اکیڈیمیا کو ضروری ساز و سامان اور باصلاحیت افرادی قوت کی کمی کے حوالے سے ایک بڑے بحران کا سامنا ہے۔ اس وجہ سے نتیجتاً، پاکستان میں ڈیجیٹل معیشت پیدا کرنے کا فقدان ہے۔ چین کے نجی شعبے میں ایسی کمپنیاں شامل ہیں جو خاص طور پر الیکٹرانکس، بجلی، ٹیکسٹائل، ٹیک اور ای کامرس سے جڑی ہوئی ہیں۔ ان کمپنیوں میں علی بابا ڈاٹ کوم ، ٹینسینٹ اور ہواوے وغیرہ شامل ہیں۔ اس کے مقابلے میں پاکستان کا نجی شعبہ مصنوعات اور عمل کی جدت طرازی کے ذریعے قابل قدر حصہ نہیں دے سکتا۔ اس کے برعکس، ہندوستان نے وقت کے ساتھ ساتھ چین سے کافی مقدار میں ایف ڈی آئی کو راغب کیا ہے۔
آخر میں، توجہ طلب بات یہ ہے کہ لوگوں اور لوگوں کے درمیان رابطے کے مسائل پر تبادلہ خیال کرنا ضروری ہے۔ دونوں ممالک کے عوام کے درمیان اس طرح کا رابطہ قائم کرنے کے معاملے میں، زبان کا فرق ایک بڑی رکاوٹ کے طور پر سامنے آتا ہے۔ اگرچہ انگریزی زبان، مواصلات میں ایک ثالثی کے طور پر کام کر سکتی ہے، لیکن باہمی تفہیم کو فروغ دینے کے لئے خیالات کی بامعنی مواصلات اب بھی ایک مسئلہ ہے۔ چین اور پاکستان میں مختلف روایات اور رسم و رواج ہیں جس کی وجہ سے لوگوں کے لئے ایک دوسرے کو سمجھنا مشکل ہوجاتا ہے۔
مثال کے طور پر چین میں انفرادیت کے تصور کو انتہائی اہمیت دی جاتی ہے جبکہ پاکستان اپنے سماجی نقطہ نظر میں زیادہ اجتماعیت پسند ہے۔ اسی طرح چین اور پاکستان دونوں مختلف عقائد اور روحانی تصورات کے ساتھ متنوع مذہبی نسلوں کے حامل ہیں۔ چینی شہریوں کے لیے پاکستان میں خود کو محفوظ محسوس کرنے کے لیے، پاکستانی معاشرے میں دیگر اقوام کی اقدار، نظریات اور مذہبی عقائد کے حوالے سے تکثیری نقطہ نظر کو جنم دینا ضروری ہے۔ ایسے رویوں کی عدم موجودگی چینی شہریوں کے لیے محفوظ محسوس کرنا مشکل بنا دیتی ہے۔ اس طرح، یہ مقامی لوگوں سے ملنے اور تعلقات قائم کرنے کی ان کی خواہش کو بھی متاثر کرتا ہے۔
ان اقدامات کے براہ راست اثرات کی وجہ سے پاکستان پائیدار اقتصادی تعلقات کے لحاظ سے 17.73 ٹریلین امریکی ڈالر سے زائد کی معیشت کے ساتھ قابل قدر کامیابیاں حاصل کرنے میں ناکام رہا ہے۔ اگر وہ ابھرتے ہوئے چین کے ساتھ اپنے اقتصادی تعاون کو بڑھانے کا فیصلہ کرتا ہے تو یہ مدت پاکستان کے لئے تاریخی ثابت ہو سکتی ہے۔ یہ تعاون پاکستان کو روایتی معاشی ڈھانچے سے نکلنے میں مدد دے سکتا ہے جو بنیادی طور پر غیر ملکی امداد اور قرضوں پر منحصر ہے۔
دونوں ممالک قانونی طریقہ کار کو ہموار کر کے اور سرمایہ کاری کے لئے غیر ضروری رکاوٹوں کو دور کر کے ثقافتی صنعت اور مذہبی سیاحت جیسے تعاون کے نئے شعبوں کی تلاش کر سکتے ہیں۔ اس شعبے میں ریاست، اس کے تعلیمی اداروں، سول سوسائٹی اور کارپوریٹ سیکٹر کو چین کے سیاسی اور انتظامی ڈھانچے، اس کی سرمایہ کاری کی پالیسیوں اور ریاستی فلسفوں کو نظر انداز کرتے ہوئے اپنا اپنا کردار ادا کرنا ہو گا۔ اس طرح ہم دیرپا اور پائیدار تعاون کے لئے چین کے ساتھ ہم آہنگی پیدا کر سکتے ہیں۔