صیہونی جارحیت اور امت مسلمہ

علامہ اقبال نے مسلمانوں کے زوال کی جو منظر کشی کی ہے آس کا ثبوت آئے روز امت مسلمہ اور آس کے حکمرانوں کے طرزِ عمل سے ملتا رہتا ہے مسجد اقصی میں اسرائیلی جارحیت پربات چند مذمتی بیانات اور اقوام متحدہ کی کاغذی قرارداد سے آگے نہیں بڑھ سکی، تاحال اسرائیلی جارحیت جاری ہے اور انسانی حقوق کے علمبردار خاموش تماشائی ہیں۔

مسجدِ اقصیٰ میں مسلمان رمضان المبارک میں بھی سکون سے عبادت نہیں کرسکتے۔ سحری کے وقت اسرائیلی پولیس دہشت گردی کررہی ہے۔ حملوں اور شیلنگ کے باعث قرآن پاک پڑھنادشوار کردیا گیا۔خواتین سمیت 60سےزائد افراد زخمی اور350 سےزائد گرفتار کیے گئے۔نمازیوں کے ہاتھ پاﺅں باندھ کرگھسیٹے ہوئے لے جایا گیا۔ان حملوں کے ساتھ اسرائیلی فوج غزہ اور لبنان میں فلسطینی کیمپوں کوبھی نشانہ بنائےہوئےہے۔ اقوام متحدہ کی انسانی حقوق کونسل نے اسرائیل کےخلاف او آئی سی کی پاکستان کی پیش کردہ قرارداد بھاری اکثریت سے منظور کر لی۔ قرارداد کے حق میں 38 اور مخالفت میں 4 ووٹ پڑے,  5 ملکوں نے ووٹنگ میں حصہ نہیں لیا۔ مخالفت کرنے والے 4 ممالک میں امریکا اور برطانیہ بھی شامل تھے۔ سعودی عرب، مصر اور اردن نے مسجد اقصی پر اسرائیلی دہشتگردی کی شدید مذمت کی، جبکہ کینیڈا کے وزیراعظم نے مسجدِ اقصیٰ کے ارد گرد ہونے والے تشدد پر تشویش کا اظہار کرتے ہوئے کہا کہ اسرائیلی حکومت کو اپنا نقطہ نظر تبدیل کرنا چاہیے۔

 کشمیر کی طرح فلسطین کا مسئلہ بھی برطانیہ کا ہی پیدا کردہ ہے۔برطانیہ نے خلافت عثمانیہ کا خاتمہ کیااور امت مسلمہ کے سینے پر اسرائیل کا ناسور بھی گھونپا۔ 1920 سے1940ء کے دوران اس خطے میں یہودی بسائے گئے۔1947ء میں اقوام متحدہ نے ووٹنگ سے فلسطین کوتقسیم کیا ایک حصے میں یہودی اور دوسرے میں عرب ریاست کے قیام کا اعلان کیا۔ بیت المقدس بین الاقوامی شہرقرارپایا۔یہ تجویز یہودی رہنماؤں نے تسلیم اور عربوں نے مسترد کر دی۔1948 میں برطانیہ مسئلہ حل کیے بغیر ہی خطہ چھوڑ کر چلا گیا۔ یہودیوں نے اسرائیل کے قیام کا اعلان کر دیا،لاکھوں فلسطینی بےدخل کرکےاپنےدیس میں اجنبی بنادیےگئے۔عربوں اور اسرائیل میں کئی جنگیں ہوئیں لیکن یہ مسئلہ حل نہ ہوا۔1967 ء کی جنگ میں اسرائیل نے مشرقی بیت المقدس، غربِ اردن کے ساتھ گولان کی پہاڑیوں، غزہ کی پٹی اور مصر میں آبنائے سینا پر بھی قبضہ کر لیا۔ جس کے بعد اسرائیل نے فلسطینیوں کو اپنے آبائی علاقوں کی جانب جانے سے روک دیا۔ اسرائیلی بیت المقدس کو اپنا دارالخلافہ اور فلسطینی اسےمستقبل کی فلسطینی ریاست کا دارالحکومت قرار دیتے ہیں۔ امریکہ ان ممالک میں سے ایک ہے جو اسرائیلی دعوے کو تسلیم کرتا ہے۔ اسرائیل نے بین الاقوامی قوانین کی خلاف ورزی کرتے ہوئے گذشتہ 50 برسوں میں یہاں چھ لاکھ یہودیوں کو بسایا۔اسرائیل کو دیے جانے والے استثنیٰ نے تل ابیب کو انسانی حقوق کی خلاف ورزی کرنے کی کھلی چھٹی دے رکھی ہے۔عام طور پر ایک سوال اٹھایا جاتا ہے کہ یہ عربوں کا مسئلہ ہے امت مسلمہ کا نہیں حالانکہ روئے زمین پر وجود انسانی کے ابتدائی زمانہ سے ہی مسجدحرام اور مسجد اقصیٰ دین کے دو اہم مراکز رہے، ان کا انبیاءکرام،ان کی زندگی،اور تعلیمات سے بڑا گہرا ربط رہا جس کی وجہ سے دونوں سے دینی اورجذباتی لگاؤ بھی ہمیشہ برقرار رہا۔ آئیے ان دونوں مساجد و مراکز کے کچھ مشترکہ امتیازی پہلؤوں پر نظر ڈال لیتے ہیں۔