مگر کیا آپ مظلوم کہلانے کے لائق ہیں؟

‎حق اور سچ کے لئے ہم نے بھی آواز اٹھائی
‎ظالموں کے خلاف ہم بھی ڈٹ کر کھڑے رہے
‎آپ کی کہانی دس، بارہ مہینوں کی ہے
‎ہم سالہا سال لڑتے آ رہے ہیں۔
‎صبر و تحمل سے، امن و آشتی سے

‎مگر آپ!
‎آپ ہمیشہ ظالموں کے طرف دار رہے
‎اُن کے ترجمان اور آلہ کار رہے
‎ہمیں زخم لگے تو آپ نے نمک چھڑکا
‎ہم درد سے بِلک اٹھے تو آپ نے مذاق اڑایا
‎ظالموں نے گولی چلائی تو آپ نے ہمیں گالی دی

‎ہم نے حق اور حقوق کے لئے آواز بلند کی
تو آپ نے ہمیں ایجنٹ کہا
‎ملک دشمن سمجھا، غدار کہا
‎ہمارے کرب ناک ٹراما کو
‎سازش سمجھا، ڈراما کہا
‎ہمیں اسلام تک سے خارج کر دیا

‎ہمارا کوئی ذاتی ایجنڈا نہیں تھا
‎نہ کسی عہدے کا لالچ، نہ کسی رتبے کی تمنا
‎ہم امن اور تعلیم کے لئے کھڑے تھے
‎اور آج بھی امن اور تعلیم کے علم بردار ہیں

‎ہمارا جُرم صرف اتنا ہے
‎کہ ہم اپنی سرزمین پر جنت کے متلاشی ہیں
‎ہمارا قصور صرف اتنا ہے
‎کہ ہم اس دھرتی پر رہنے والے تمام انسانوں کے لئے
‎بلا امتیاز رنگ و نسل و عقیدہ
‎امن چاہتے ہیں، خوشحالی چاہتے ہیں اور
‎قانون کی حکم رانی چاہتے ہیں

‎اس لئے ہم نے دھرتی کے ناراض بیٹوں کی مسخ شدہ لاشوں کی بات کی
‎اپنے بھائیوں کی جبری گم شدگیوں پر آواز اٹھائی
‎مگر آپ نے ہر ظلم اور لا قانونیت کی وکالت کی
‎آپ معمولی اقتدار کے لئے
‎مقتدر حلقوں کے ہم نوا رہے

‎آپ کو ایک پیج پر ہونے پر بڑا فخر تھا
‎مگر صفحہ پلٹنے میں دیر نہیں لگتی
‎آج آپ خود مظلوم ہونے کا شور مچا رہے ہیں
‎آپ انقلاب، تبدیلی اور حقیقی آزادی جیسی
‎خوب صورت اصطلاحات استعمال کر رہے ہیں
‎مگر آپ کسی اعلیٰ مقصد کے لئے نہیں اُٹھے ہیں

‎آپ لوگ
‎جس شخص کی محبت اور عقیدت میں مبتلا ہیں
آپ جس شخص کی اندھی تقلید کر رہے ہیں
اُن کے چنے ہوئے رستے کی کوئی منزل نہیں
‎وہ پہلے بھی اپنی ذات کے لئے کھڑا تھا
‎اور آج بھی اپنی ذات کے حصار میں بند ہے
‎مگر ہمیں پھر بھی آپ سے ہمدردی ہے

‎بہ خدا
‎ہم نہ آپ کو غدار سمجھتے ہیں اور نہ ایجنٹ
‎آپ نہ شرپسند ہیں اور نہ ہی دہشت گرد
‎بس
مگر کیا آپ مظلوم کہلانے کے لائق ہیں؟