کزن میرج: معاشرے کے لیے تباہی

سائیکولوجی کے مطابق اگر ہم کسی فضول ترین بات کو روایت کا نام دے کر سو سال اس پر محنت کر لیں تو لوگ اس کو سوال کرنا چھوڑ دیتے ہیں، اور اسے سچ یا حقیقت مان لیتے ہیں، بالکل یہی روایت پاکستان میں صدیوں سے موجود ہے جس کو کزن میرج کا نام دے دیا جاتا ہے۔ دنیا میں بہت ساری روایات ایسی ہیں جو کہ اب بوسیدہ اور فرسودہ ہو چکی ہیں لیکن پاکستان میں سب الٹ ہی چلتا ہے یہاں روایات اور توہمات کو وقت کے ساتھ زیادہ مستند سمجھا جاتا ہے اور ان پر مزید جوش و خروش سے عمل کیا جاتا ہے۔

ساری زندگی لڑکی اپنے بڑے کزن کو بھائی کہتی ہے اور پھر ایک دم سے بھائی کا ٹھپا اتار کر خاوند کا لگا دیا جاتا ہے۔ ایک اندازے کے مطابق پاکستان میں 60 سے 70 فی صد لوگ کزن میرج کر چکے ہیں جہاں دوسرے ممالک کزن میرج پر پابندی عائد کر رہے ہیں، بلکہ امریکا میں تو 35 ریاستوں نے کزن میرج پر پابندی عائد کر رکھی ہے، وہی پاکستان میں یہ کام پورے جوش و خروش کے ساتھ جاری ہے بغیر جانے کہ اس کے نقصانات کیا ہیں؟ اور آنے والی نسل کو کن مشکلات کا سامنا کرنا پڑ سکتا ہے۔

پاکستان میں بہت سے خاندان ذات کے دائرے میں ایسے قید ہوئے ہیں کہ انہیں اپنی ذات سے باہر کوئی اور خاندان دکھائی ہی نہیں دیتا بلکہ وہ تو ہٹلر کی منطق کو مانے ہوئے ہیں ہٹلر بھی یہی کہتا تھا کہ سوشل ڈارکنیسم ہی بہتر ہے یعنی وہ یہ سمجھتا تھا کہ ہماری نسل اور آریان خون سب سے بہتر ہے یہی حال پاکستان میں ہے۔ جس کا اثر یہ ہوتا ہے کہ جو فرسٹ کزن ہوتے ہیں ان میں جینز کی مماثلت جو ہے وہ 12.5 ہوتی ہے اگر اس 12.5 میں کوئی ایسا جین آ جاتا ہے جس میں کسی قسم کی کوئی بیماری ہوتی ہے تو کزن میرج کرنے سے آنے والی نسل میں بیماری منتقل ہونے کے مواقع بہت زیادہ ہیں یہی وجہ ہے کہ پاکستان میں بچے ایک سال ہونے سے پہلے ہی مر جاتے ہیں اور پاکستان دنیا کے بدترین ممالک میں شامل ہے اور کئی سال تک تو پاکستان دوسرے اور تیسرے نمبر پر آتا رہا ہے، جب ہم بار بار اپنے ہی خاندان کو چھوڑ کر کسی دوسرے خاندان یا دوسری ذات میں شادی سے کتراتے ہیں اور یہ سمجھتے ہیں کہ ہماری ذات اور ہمارا خون ہی سب سے اعلی ہے تو یہ ایک سائیکل بن جاتا ہے اور اس سائیکل میں آ کر پیدا ہونے والی نسل بغیر کسی تگ و دو کے ایسے موذی مرض میں پڑ جاتی ہے جس کا خمیازہ نہ صرف بچے بلکہ والدین بھی ساری عمر ادا کرتے رہتے ہیں، برطانیہ کی ایک رپورٹ کے مطابق برطانیہ میں 60 فیصد پاکستانی مقیم ہیں جنہوں نے کزن میرج کی ہوئی ہے ویسے تو ان کی تعداد 3 فیصد بنتی ہے لیکن وہ پاکستانی آبادی کا 1 / 3 ایسے بچے پیدا کرتے ہیں جو کسی نہ کسی بیماری کا شکار ہوتے ہیں اور اس کی ایک ہی وجہ ہے اور وہ ہے کزن میرج۔

اس کے علاوہ وہاں ہر سال انگنت بچے ایسے پیدا ہوتے ہیں جن میں کوئی نہ کوئی پیدائشی بیماری موجود ہوتی ہے، اس طرح ہم نہ صرف اپنی زندگی بلکہ آنے والی نسل کو بھی خطرے سے دوچار کر رہے ہیں۔ لیکن ان کا ایک ہی جواب ہوتا ہے اور وہ یہ کہ ہمارے چاچو کا بیٹا یا ہمارے ماموں کی بیٹی بھی کزن میرج کی پیداوار ہیں ان کو تو کوئی بیماری بیماری بھی لاحق نہیں ہوئی، ان کی یہ منطق کا مطلب یہ ہوا کہ ایک شخص سارا دن ریل گاڑی کی پٹڑی پر لیٹا رہے جب وہ بچ جائے تو شام کو شہر میں جا کے شور مچا دے کہ ریل کی پٹڑی سونے کے لیے صحیح ہے اور کوئی نقصان وقوع پذیر نہیں ہوا۔

اگر کزن میرج کرنی ہی ہے تو ہر خاندان کو چاہیے ہے کہ جینیٹک کاونسلنگ کروا لیں لیکن اس معاملے میں بھی مرد حضرات اپنی مردانگی کو اپنی انا کا مسئلہ بنا لیتے ہیں، یہاں تک کہ سوشل سائنس کی ایک تحقیق کے مطابق جن ممالک یا معاشروں میں کزن میرج کا رجحان زیادہ ہوتا ہے وہاں جمہوریت نہیں آ سکتی کیوں جس کی زندہ مثال پاکستان ہے جہاں چند ایک خاندان ملک کے اوپر قابض ہیں کیونکہ کہ ساری طاقت ہی ان چند ایک حکمرانوں کے پاس ہے اور وہ اپنے خاندان کو ہی نوازتے رہتے ہیں۔ اس لیے ہمیں چاہیے ہے کہ ہم سائنس کی بات سنیں، تحقیق کریں اور اس پر عمل کریں تاکہ ایک روشن اور اچھا مستقبل نظر آ سکے ورنہ ایک وقت آئے گا ہر گھر میں بونے اور اپاہج ہی نظر آئیں گے اور ایسے لوگوں کی معاشرے میں جو عزت اور حوصلہ افزائی ہوتی ہے اس سے ہم بخوبی واقف ہیں۔