پیر علی محمد راشدی: ایک سیاست دان، سفارت کار اور صحافی

پیر علی محمد راشدی 5 اگست 1905 کو گاؤں بھمن تعلقہ رتو ڈیرو ضلع لاڑکانہ میں پیدا ہوئے۔ انہوں نے اپنے گھر میں صرف 4 کلاس تک رسمی تعلیم حاصل کی۔ بعد ازاں ریلوے کے سٹیشن ماسٹر سے انگریزی کے چار درجے پڑھے۔ اس کے بعد انہوں نے ذاتی محنت اور مطالعہ سے سندھی، فارسی، اردو، عربی، چینی اور انگریزی پر عبور حاصل کیا۔

انہوں نے اپنی پیشہ ورانہ زندگی کا آغاز 15 سال کی عمر میں لاڑکانہ کے قادری خاندان کے اخبار ”الحقیقت“ کے رپورٹر کی حیثیت سے صحافت سے کیا۔ انہوں نے 1963 سے 1964 تک جنگ اخبار کے لیے مکتوب مشرق بعید کے نام سے کالم بھی لکھے۔

پیر علی محمد راشدی نے 1936 میں اپنے بھائی پیر حسام الدین راشدی کے ساتھ مستقل طور پر کراچی میں سکونت اختیار کر لی۔ انہوں نے اپنی سیاسی زندگی کا آغاز 1926 میں سندھ محمدن ایسوسی ایشن میں شمولیت سے کیا۔ اس کے ساتھ انہوں نے ”انجمن سادات“ قائم کی۔ ڈسٹرکٹ لوکل بورڈ لاڑکانہ کے منتخب ممبر بنے۔ 1936 میں وہ اتحاد پارٹی کے اہم ارکان میں سے ایک تھے۔ 1937 کے الیکشن کے دوران سر شاہنواز بھٹو کے لاڑکانہ کے الیکشن انچارج تھے۔

پیر علی محمد راشدی پہلی بار 1953 میں مسلم لیگ کے ٹکٹ پر سندھ اسمبلی کے بلامقابلہ رکن منتخب ہوئے۔ وہ ایک سال سندھ کے وزیر ریونیو رہے۔ انہوں نے سندھ سے جاگیردارانہ نظام کے خاتمے کی رپورٹ وفاقی حکومت کو بھیجی، بعد ازاں فیلڈ مارشل ایوب خان نے اس رپورٹ کو نافذ کیا اور جزوی زرعی اصلاحات کیں۔ سندھ اسمبلی کے اراکین کو ون یونٹ کے حق میں قرارداد منظور کرانے میں ایوب کھوڑو کے ساتھ علی محمد راشدی نے بھی اہم کردار ادا کیا۔

1970 کے انتخابات میں پیر علی محمد راشدی آزاد حیثیت میں جی ایم سید کی حمایت کے باوجود سیہون صوبائی اسمبلی کے حلقہ سے پاکستان پیپلز پارٹی کے امیدوار سید عبداللہ شاہ سے الیکشن ہار گئے۔ بعد ازاں وہ ذوالفقار علی بھٹو کی وفاقی حکومت میں محکمہ اطلاعات کے مشیر رہے انہوں نے تاریخ، سائنس اور ادب کے فروغ کے لیے پورے ملک میں ”پاکستان نیشنل سینٹر ”قائم کیے۔ علی محمد راشدی چین اور فلپائن میں پاکستان کے سفیر بھی رہے۔

پیر علی محمد راشدی اپنی کتاب ”وہی دن وہی شیر“ میں لکھتے ہیں کہ ”تیرتھ لکی“ ریلوے اسٹیشن جسے قیام پاکستان کے بعد ”لکی شاہ صدر سٹیشن“ کا نام دیا گیا تھا، پہاڑوں میں گرم پانی کے چشموں میں نہانے کے لیے استعمال کیا جاتا تھا۔ جلد کے امراض میں مبتلا لوگ پورے سندھ سے آتے تھے اور مسافروں کے لیے لکی اسٹیشن کے سامنے ایک دھرم شالہ بنی ہوئی تھی۔ ہوا یوں کہ جولائی 1938 ء میں، میں کراچی سے اپنے ڈرائیور اور ماسٹر گوبند کے ساتھ موٹر میں سوار ہو کر گاؤں بھمن لاڑکانہ جا رہا تھا، سخت گرمی کی وجہ سے ہم نے اس دھرم شالہ میں دن کے لیے ایک کمرہ لیا اور پھر شام کو سفر کرنے کا سوچا، لیکن مجھے مسلم لباس (شلوار قمیص اور پگڑی ) میں دیکھ کر ہندوؤں نے میرا راستہ روک لیا اور کہا کہ میاں صاحب! یہاں مسلمان کہاں سے آرہے ہیں؟ ”یہ دھرم شالہ ہے، یہاں ہندو کے علاوہ کسی کو قدم جمانے کی اجازت نہیں ہے، پھر میں نے گاؤں جانے کے بجائے واپس کراچی کا راستہ اختیار کیا۔

گوبند رام سے کہا، میں نے آج اپنی زندگی کا ایک بڑا سبق سیکھا ہے، میں نے کہا کہ جب تک تمہارے ہندووں کو سندھ سے نہیں اکھاڑ پھینکوں گا، میں گاؤں کا منہ نہیں دیکھوں گا۔ وہ مزید لکھتے ہیں کہ پھر میں نے سندھ میں مسلم لیگ کو لانے اور پھیلانے کی کوشش کی۔ میں نے چھ ماہ تک لاہور میں مسلم لیگ کے 1940 کے لاہور اجلاس کو کامیاب بنانے کے لیے کام کیا، جس میں قرارداد پاکستان کی منظوری دی گئی۔ ان کا دعویٰ ہے کہ 1940 کی قرارداد بھی انہوں نے لکھی تھی۔

وہ اپنی کتاب وہی دن وہی شیر، میں لکھتے ہیں کہ وہ سکھر کی مسجد منزل گاہ کے بارے میں ہونے والے ستیہ گرہ کے دوسرے آمر تھے۔ میں نے صوبائی مسلم لیگ کے اجلاس کی صدارت کی جس میں ستیہ گرہ کی باقاعدہ منظوری دی گئی۔ سر غلام حسین ہدایت اللہ نے مسجد منزل گاہ فسادات پر سندھ اسمبلی کے اجلاس میں مسٹر شدھوا جی کے سوال کے جواب میں کہا کہ ستمبر 1940 میں جسٹس وسیٹن کی سربراہی میں ایک انکوائری کمیٹی بنائی گئی جس کے مطابق 164 گھروں کو جلا دیا گیا، 10 لوگوں کو گولی مار دی گئی، 151 ہندو اور 14 مسلمان مارے گئے۔ 58 ہندو اور 18 مسلمان زخمی ہوئے۔ 8 لاکھ ایک ہزار ایک سو روپے مالیت کی املاک کا نقصان ہوا۔ 997 افراد کو گرفتار کیا گیا جن میں 939 دیہاتی اور 58 شہری شامل ہیں۔( بحوالہ روزنامہ واحد کراچی، 31 جنوری 1940۔)

مسجد منزل گاہ کا کیس پہلے سکھر میں چلا اور بعد میں کراچی کی ہائی کورٹ میں، کیس کے دوران ہندوؤں کے وکیل نے درخواست جمع کرائی کہ جی ایم سید کی ”ہندو اخبار“ کے دفتر میں گفتگو ہوئی کہ جی ایم سید نے چار سو ہندوؤں کو قتل کرنے کا منصوبہ بنایا ہے۔ اگر وہ زبردستی مسجد کی منزل خالی کرائیں گے تو نتیجہ دیکھیں گے۔ وہ اس کے لیے سات نئے گواہ پیش کریں گے جن کی موجودگی میں جی ایم سید نے اس منصوبے کے بارے میں بات کی تھی۔ عدالت نے ہندوؤں کی درخواست منظور کرتے ہوئے گواہوں کو اگلے روز طلب کرنے کا حکم جاری کر دیا۔

گواہوں میں مسٹر جمشید مہتا صدر بلدیہ کراچی بھی شامل تھے جنہوں نے جرح کے دوران جی ایم سید صاحب کے بارے میں وہ تمام باتیں بتا دیں جن کا الزام ہندوؤں نے لگایا تھا۔ دوسرے گواہ خان بہادر اللہ بخش سومرو تھے جنہوں نے جی ایم سید کے خلاف گواہی بھی دی اور ایسی شہادتیں اور دیگر استفسارات ٹریبونل کے ریکارڈ میں موجود ہیں اور انہیں مسلم لیگ نے کتابی شکل میں بھی شائع کیا ہے۔ یاد رہے کہ پیر علی محمد راشدی خود ہی مسلمانوں کی طرف سے وکالت اور جرح کر رہے تھے۔

مسٹر پمنانی ہندوؤں کی جانب سے دوسرے گواہ بنے، وہ صاحب روہڑی کے رہائشی اور سکھر ضلع سے سندھ اسمبلی کے منتخب رکن تھے۔ وہ بہت تیز مزاج تھا۔ وہ مسلمانوں سے بہت ناراض تھا۔ اپنی گواہی کے دوران اس نے پیر آف بھرچونڈی شریف کے بارے مین کچھ نازیبا باتیں کہیں ان کا بیان مکمل ہونے کے بعد پیر علی محمد راشدی نے عدالت سے استدعا کی کہ مسٹر پمنانی کے بیان کو اخبارات میں شائع ہونے سے روکا جائے اور اشتعال انگیزی کی موجودہ حالت میں ممکن ہے کہ ان کی جان کو خطرہ ہو۔

عدالت نے پریس رپورٹرز سے استدعا کی کہ یہ بیان اخبارات میں شائع نہ کریں۔ اگلے دن مسٹر پمنانی کا بیان تمام ہندو اخبارات میں بڑی سرخیوں میں شائع ہوا۔ تیسرے دن مسٹر پمنانی روہڑی ریلوے اسٹیشن سے اترے اور پیدل شہر جا رہے تھے۔ راستے میں ہی نامعلوم آدمی اسے پستول سے گولی مارکر قتل کر کے غائب ہو گیا۔ اس پر ہندو وکیل نے ٹربیونل کے سامنے بلند آواز میں شکایت کی کہ تین دن پہلے مسٹر راشدی نے کھلی عدالت میں خدشہ ظاہر کیا تھا کہ مسٹر پمنانی کو قتل کر دیا جائے گا، اور کل مسٹر پامانی کو قتل کر دیا گیا عدالت اسے ریکارڈ پر رکھے۔

علی محمد راشدی اپنی کتاب ”وہی دن وہی شیر“ میں لکھتے ہیں کہ کوٹری بیراج کا نام انہوں نے غلام محمد بیراج تجویز کیا تھا تاکہ گورنر جنرل غلام محمد جیسے لوگوں کو ہمیشہ کے لیے احسان مند بنایا جا سکے۔ انہوں نے یہ مشورہ وزیر اعلیٰ ایوب کھوڑو کو دیا تھا۔ انہوں نے اپنی کتاب میں لکھا ہے کہ اللہ بخش سومرو کو مئی 1943 کے اوائل میں شکار پور شہر میں حروں کے گروہ نے قتل کیا تھا۔ حروں کو یہ شکایت تھی کہ ان کی وزارت کے دوران مارشل لاء لگا تھا، جس کے دوران مارچ 1943 میں پیر صاحب پگارو کو پھانسی دی گئی تھی۔

پیر علی محمد راشدی کی کتاب ”وہی دن وہی شیر“ بیسویں صدی کے ابتدائی سالوں میں سندھ کی سیاسی اور سماجی تاریخ ہے، جسے انھوں نے سو سال قبل لکھنا شروع کیا تھا، جو دلچسپ بھی ہے اور سنسنی خیز بھی۔ تاریخ، سیاست کے طالبعلم اور صحافی حضرات یہ کتاب ضرور پڑھیں، اس سے یقیناً ان کے علم میں اضافہ ہو گا۔ پیر علی محمد شاہ راشدی81 سال کی عمر میں 14 مارچ 1987 کو کراچی میں انتقال کر گئے۔