پشاور کی دہشت گردی حجاب والی طالبات کو مشکل میں ڈال گئی

12 ربیع الاول کا دن جب پوا پاکستان پورے زور و شور اور مذہبی عقیدت کے ساتھ جشن عید المیلاد النبی منانے میں مصروف تھا اور عام تعطیل کے باعث تعلیمی ادارے سنسان تھے تو تین دہشت گرد ایک جامعہ میں داخل ہوتے ہیں اور جامعہ کو دہشت گردی کا نشانہ بناتے ہیں ایک بار پھر 9 نوجوان طالب علم دہشت گردی کا شکار ہوتے ہیں۔ 9 نسلیں، 9 خاندان تباہ ہوتے ہیں۔ وہ طالب علم جو اپنے گھروں سے بہت دوربہت سے مقاصد لئے زیر تعلیم تھے جن کے آگے ابھی مستقبل کے بے شمار مراحل رکھے تھے اور جن کے خواب ابھی کامیابی کے ابتدائی دور میں تھے دہشت گرد ان مقاصد کو اپنی گولیوں کا نشانہ بناتے ہیں۔ ان کے خواب منزل پر پہنچنے سے پہلے دفن کر دیے جاتے ہیں۔

ماضی میں آرمی پبلک اسکول میں دہشت گرد اپنے سیاہ نشان چھوڑ گئے جو آج تک ہم نہیں مٹا سکے۔ پاکستان کی نسل کو بری طرح تباہ کرنے کی اس وقت بھی حتی الامکان کوشیش کی گئی شہداء کے گھر والوں نے اس المناک واقعے کو اللہ کی رضا سمجھ کر صبر کرلیا مگر اج بھی ہم وہ واقعہ بھلا نہیں پائے۔

اس واقعے کے بعد حکومت جاگ گئی سیکورٹی بڑھا دی گئی، نئے قاعدے قوانین پیش کیے گئے، سی سی ٹی وی کی تعداد بڑھانے کا دعوا کیا گیا، تمام اسکولوں کی دیواریں اونچی کرنے کا حکم صادر کیا گیا، چیکنگ پر سختی ہونے لگی یہ سب اقدامات کیے گئے مگر متاثر خاندان اب بھی ویران ہیں اور نہ ہم اس واقعے کو بھول پائے ہیں۔

اس دردناک واقعے کے بعد حکومت خاموش ہو گئی۔ افواج پولیس اس دہشت گردی کو ناکام بنانے میں کامیاب ہونے پر مبارک باد کے مستحق ہیں۔ مگر کیا میرے اور آپ کے ذہنوں میں سوال نہیں اٹھتا کہ کیا یہ واردات چھوٹی تھی؟ یہ سب ممکن کیسے ہو گیا؟ جبکہ حکومت سیکورٹی کئی گنا زیادہ ہونے کا دعوا کر چکی تھی۔ اور ربیع الاول کے موقع پر تو سیکورٹی ویسے ہی سخت تھی، موبائل نیٹ ورک تک بند تھے پھر کیسے دیشت گرد رکشے میں سوار، ہتھیاروں سمیت زرعی یونیورسٹی تک پہنچ گئے؟ کیا بیچ میں کہیں بھی چیکنگ نہیں ہوئی؟ کسی سی سی ٹی وی کیمرے کی آنکھ نے ان لوگوں کو نہیں دیکھا؟ دہشت گرد افغانستان سے داخل ہو گئے ہیں اور دہشت گردی کی نیت رکھتے ہیں یہ خبریں تو پہلے سے ہی گردش کر رہیں تھیں تو کیا اتنی بڑی جامعہ کے مین گیٹ پر رکھوالی کرنے کے لئے ایک شخص کافی تھا؟

ایک عام طالبہ ہونے کے ناطے میرے ذہن میں سوال اٹھتا ہے اس پورے واقعے میں ذمہ دار یا نا اہل کون رہا؟ حکومت؟ جو بس اس وقت جاگتی ہے جب اس کو ووٹ کی بھوک لگتی ہے؟ ڈیوٹی پر قائم اس وقت کے افسران جو جگہ جگہ تعینات تھے جو نوکری سمجھ کر ڈیوٹی پر آ تو گئے مگر مگر اپنا فرض سمجھ کر اپنی ڈیوٹی سے ایمانداری نہیں کی۔ تبھی وہ رکشہ ہتھیار سے لیس اپنی منزل تک پہنچ گیا۔ یا جامعہ کی انتظامیہ جو یہ سوچ کر سکون میں تھی کہ عام تعطیل ہے تو جامعہ محٖفوظ ہے؟

میں بطور ایک عام طالبہ کس کو ذمہ دار کہوں؟ اور اس سے بڑی تلخ حقیقت تو یہ ہے کہ ذمہ دار جو بھی ہو نقصان تو صرف ان خاندانوں کا ہوا ہے جن کے لخت جگر گھروں سے بہت دور زیر تعلیم تھے ان میں کسی کا باپ بوڑھا ہوگا۔ تو کسی کی ماں کی آخری امید وہ ہوگا اور کسی کے گھر کا آخری سہارا۔

یہ تو نقصانات ہیں جو دہشت گردی کے باعث ہوئے۔ اس کے نتائج کیا ہوں گے؟ میں مسلم گھرانے سے تعلق رکھنے والی ایک طالبہ ہوں جو حجاب کے ساتھ پڑھنا چاھتی ہے۔ تعلیمی میدان میں کامیاب ہونا چاہتی ہے جو پہلے ہی حجاب کے باعث کئی مسائل کا سامنا کرتی ہے اس واقعہ کے بعد جبکہ دہشت گرد برقعہ پوش تھے۔ تو اس کے بعد کیا حجاب کو لے کر مزید مسائل پیدا نہیں ہوں گے؟ میری جیسی بہت سی طالبات ہوں گی جن کے ذہنوں میں یہ سوال آیا ہوگا۔

پاک فوج کا کہنا ہے دہشت گردی افغانستان میں پنپ رہی ہے تو افغانستان میں صرف مسلمان تو نہیں بستے؟ دہشت گرد اسلام کا ہی کیوں لبادہ اوڑھتے ہیں؟ اگر کوئی یہ بولے کہ برقعہ کا استعمال ان کی شناخت چھپاتا ہے تو شناخت تو اس کے مرنے کے یا گرفتاری کے بعد عیاں ہو ہی جاتی ہے۔ اور ایک سیکورٹی افسر کیا اتنا اہل نہیں کہ عورت اور مرد کے برقعہ پہنے میں وہ پہچان کر سکے؟

ایک طالبہ ایک پاکستانی شہری ہونے کے ناطے میں حکومت سے اپیل کرتی ہوں کہ تعلیمی اداروں میں بڑھتی ہوئی دہشت گردی کو عملاً روکا جائے اور تعلیمی اداروں کو محفوظ بنانے کے ساتھ ساتھ ہم طالبات کے لئے بے جا مسائل کی روک تھام کے لئے اقدامات کیے جائیں

• About
• Latest Posts

نزہت خان

Latest posts by نزہت خان (see all)

• زبیدہ طارق سے زبیدہ آپا تک کا سفر - 06/01/2018
• یاد رفتگار: تصدق سہیل - 27/12/2017
• حساب تو آخر ہونا ہی ہے - 27/12/2017