جی جناب بہتر سال میں پاکستانی قوم بس دو ہیرو ہی پیدا کر سکی اور اپنے بچوں کو نصاب کے ذریعے روشناس کروا سکی۔ علامہ اقبال، قائدِاعظم اور تیسرا نام شخصیت تلاش کرنا گویا مسئلہ کشمیر ہے۔ ایسا کیوں ہے کیا یہ قوم اتنی ہی بے نمو ہو چکی ہے کہ اس کی نسلیں اپاہج سوچ زدہ دماغ ہی پیدا کر رہی ہے۔

جب میں نے اس نکتے پے سوچا تو میرا جواب نہ میں آیا ایسا بالکل بھی نہیں ہے، اس قوم میں وقت کے ساتھ ساتھ ایسے سپوت بھی پیدا ہوے ہیں جو اِس دھرتی کا مان ہیں۔ جنھوں نے خونِ دل دے کے رخِ برگِ گلاب کو نکھارا ہے۔

کل رات ایک مہندی کے فنکشن میں جانا ہوا، نوعمر بچیوں، لڑکیوں کا ایک گروپ ڈھول کی تھاپ پے روایتی رقص کر رہا تھا۔ یقین کریں چند منٹ تو میں نظر جھپکنا بھول گیا، جو خوشی سرور اور سرمستی بچیوں کے انگ انگ سے چھلک رہی تھی، بہت معصومانہ اور دلکش قسم کے تاثرات تھے ننھی رقاصاؤں کے چہروں پر، میں ہی نہیں ہال میں موجود ہر شخص اپنے طور پر محظوظ ہوا۔

اور جب اس منظر کے سحر سے نکلا تو ایک تلخ حقیقت نے میرا دل چیر سا دییا کہ ہم کس قدر بناوٹی زندگی جی رہے ہیں۔ خالص عمل، جذبے اور احساسات تو گویا مِٹ سے گئے ہیں۔