انڈیا کے عام انتخابات میں شکست: راہل گاندھی نے کانگریس کی سربراہی سے استعفی دے دیا
انڈیا میں حزب اختلاف کی بڑی جماعت کانگریس کے سربراہ راہل گاندھی اپنے عہدے سے مستعفی ہو گئے ہیں۔
ان کے استعفی کے ساتھ ہی ہفتوں سے سیاسی اور عوامی حلقوں میں جاری چہ میگوئیاں بھی اپنے اختتام کو پہنچ گئیں۔
اپنے استعفی میں راہل گاندھی نے حالیہ عام انتخابات میں اپنی پارٹی کی شکست کی ذمہ داری قبول کی۔ انھوں نے بدھ کے روز اپنا استعفی سماجی رابطے کی ویب سائیٹ ٹویٹر پر بھی شیئر کیا۔
یہ بھی پڑھیے
کیا یہ گاندھی خاندان کی سیاست کا اختتام ہے؟
’جنتا مالک ہے، مالک نے آرڈر دیا ہے، مودی جی کو مبارک‘
جب عمران خان کا مداح راہل گاندھی کے جلسے میں پہنچ گیا
وہ اس سے قبل اپنے مستعفی ہونے کے ارادے کا برملا اظہار کر چکے تھے تاہم پارٹی کے دیگر رہنما پرامید تھے کہ راہل اپنا فیصلہ بدل لیں گے۔
راہل گاندھی کے والد (راجیو گاندھی)، دادی (اندرا گاندھی) اور پرنانا (جواہر لال نہرو) انڈیا کے وزرائے اعظم رہ چکے ہیں۔
اپنے استعفی میں انھوں نے لکھا کہ ان کے ذہن میں انڈیا کی حکمراں جماعت بھارتیہ جنتا پارٹی کے خلاف کوئی ’غصہ یا عداوت‘ نہیں ہے مگر ’ان کے جسم کا ہر ہر خلیہ بے اختیاری طور پر انڈیا کے بارے میں ان (بی جے پی) کی سوچ، جو کہ نفرت اور اختلافات پر مبنی ہے، کی نفی کرتا ہے۔‘
راہل گاندھی نے انتخابات کی غیر جانبداری پر سوال اٹھاتے ہوئے کہا ’ہمارا مقابلہ صرف ایک سیاسی جماعت سے نہیں بلکہ پوری انڈین ریاستی مشینری سے تھا۔‘
انڈیا کے عام انتخابات میں وزیر اعظم نریندر مودی کی جماعت بی جے پی کو انتہائی شاندار کامیابی ملی ہے۔
ان انتخابات کے نتائج نے نہ صرف حزب اختلاف بلکہ تجزیہ کاروں کو بھی ششدر کر دیا تھا جو کہ سخت مقابلے کی توقع لگائے بیٹھے تھے۔
سنہ 2014 میں ہوئے عام انتخابات میں بھی راہل گاندھی کانگریس کے سربراہ تھے اور اس الیکشن میں کانگریس نے 543 سیٹوں میں سے صرف 44 نشستیں جیتی تھیں۔ اس برس انتخابات کے نتائج پچھلی مرتبہ سے کچھ بہتر رہے اور کانگریس نے 52 نشستیں جیتیں۔
راہل گاندھی کو اتر پردیش میں اپنی آبائی نشست سے بھی ہاتھ دھونا پڑے تاہم کیرالہ میں دوسری نشست پر جیتنے کی وجہ سے وہ پارلیمان کا رکن منتخب ہونے میں کامیاب رہے۔
جب سے بی جے پی اقتدار میں آئی ہے تب سے اسے اقلیتوں سے نامناسب سلوک کرنے اور ریاستی اداروں کو کمزور کرنے کے الزامات کا سامنا ہے۔ تاہم بی جے پی ان تمام الزامات کی سختی سے تردید کرتی ہے۔
راہل گاندھی کے استعفی کی خبر کو پورے انڈین میڈیا نے نمایاں طور پر شائع اور نشر کیا اور ہیش ٹیگ راہل گاندھی ٹویٹر پر ٹاپ ٹرینڈ رہا۔
ٹویٹر پر چند لوگ ایسے تھے جنھوں نے راہل گاندھی کے اس فیصلے پر اپنی اداسی اور غصے کا اظہار کیا جبکہ کئی افراد نے انھیں تمسخر کا نشانہ بنایا۔
https://twitter.com/SnehMishra16/status/1146373846112428032
جبکہ کئی افراد محوِ حیرت ہیں کہ راہل گاندھی کے استعفے کے کانگریس پارٹی کے مستقبل پر کیا اثرات ہوں گے۔
- امریکی محکمہ خارجہ کی سالانہ رپورٹ میں عمران خان اور ان کی جماعت کے بارے میں کیا کہا گیا اور کیا یہ پاکستان کے لیے مشکلات کھڑی کر سکتا ہے؟ - 25/04/2024
- چڑیا گھر میں سات سال تک نر سمجھا جانے والا دریائی گھوڑا مادہ نکلی - 25/04/2024
- امریکہ کی جانب سے فراہم کردہ 61 ارب ڈالر کی عسکری امداد یوکرین کو روس کے خلاف کیسے فائدہ پہنچائے گی؟ - 25/04/2024
Facebook Comments - Accept Cookies to Enable FB Comments (See Footer).