عقيدہ

  •  
  •  
  •  
  •  
  •  
  •  
  •  
  •  
  •  
  •  
  •  
  •  

”بابا!“
”جی بیٹا!“
”بابا، بہت ٹھنڈ لگ رہی ہے۔“
”بیٹا! الله کو پُکارو!“
”پھر سردی نہیں لگے گی بابا؟“
”ہاں بیٹا! پھر ٹھنڈ اتر جائے گی۔“
”تو پھر کیا بارش بھی بند ہو جائے گی؟“
”ہاں بیٹا! بارش بھی رُک جائے گی۔“
”اور بابا! ہماری جھونپڑی کے اندر بارش کا پانی بھی نہیں آئے گا؟“
”ہاں بیٹا! خُدا نے چاہا تو رہنے کے لیے ایک اچھی جگہ بھی مل جائے گی۔“
”اور وہ کب ملے گی بابا؟“
”بیٹا! جب خُدا راضی ہوگا، تو پھر ملے گی۔“
”خُدا کیسے راضی ہوگا؟“
”عبادت کرنے والوں پر راضی ہوتا ہے۔“
”بابا! تم جو روز عبادت کرتے ہو!“
”خُدا غریبوں کو آزماتا ہے بیٹا!“
”اميروں کو کیوں نہیں آزماتا؟“
”بیٹا! خُدا اپنے پيارے بندوں کو آزماتا ہے۔“
”ہاں بابا!؟“
”ہاں بیٹا!“

”بابا!“
”جی بچّے!“
”بابا! مجھے بُھوک لگی ہے۔“
”الله الله کرو بیٹا!“
”پھر کیا ہوگا بابا؟“
”کھانا مل جائے گا۔“
”تم جو ذکر کرتے رہتے ہو۔“
”خُدا آزما رہا ہے بیٹا!“
”خُدا علی حسن شرابی کو نہیں آزماتا؟“
”وہ خُدا کا نیک بندہ نہیں ہے بیٹا!“
”بس صرف غريبوں کو آزماتا ہے؟“
”ہاں بیٹا! غريب خُدا کو پيارے ہوتے ہیں ناں۔“

”بابا!“
”جی بیٹا!“
”بابا! کپڑے پَھٹ گئے ہیں۔“
”الله اور دے دے گا بیٹا!“
”کب دے گا بابا!“
”جب ہماری عبادت قبُول ہوگی بیٹا!“
”بابا تم جو روزانہ نماز پڑھتے ہو!!“
”ہاں بچّے! جب قبُول ہو۔“
”بابا! تم روز قُرآن بھی تو پڑھتے ہو؟“
”ہاں بیٹا! اس کا اجر بھی مل جائے گا۔“
”کب ملے گا بابا؟“
”الله سے ناامید نہیں ہوتے، بیٹا!“

”رو کیوں رہے ہو بیٹا؟“
”بابا! بہت ٹھنڈ لگ رہی ہے۔“
”میں کیا کروں میرے بچّے؟“
”بابا! دیکھو مجھے بُخار بھی ہو رہا ہے!“
”خُدا تمہیں جلد اچھا کردے گا بیٹے!“
”بابا! آج سردی کے مارے مر جاؤں گا!“
”سُست نہیں ہوتے، میرے بچّے!“
”بابا! دیکھو، کتنا کانپ رہا ہوں۔“
”الله الله کرو! ٹھیک ہو جاؤ گے۔“
”بابا! کپکپی اور بڑھ گئی ہے۔“
”کُفر مت بکو رے!“
”کفر کیا ہے بابا؟“
”خُدا کو نہ ماننا!“
”خُدا کو ناں ماننے والوں کے ساتھ کیا ہوگا بابا؟“
”خُدا انہیں دوزخ رسید کرے گا۔“
”دوزخ گرم ہوتا ہے بابا؟“
”ہاں بیٹا!“
”کتنا گرم بابا؟“
”یہاں کی آگ سے سَتّر گُنا زیادہ!“
”بہت زیادہ بابا!؟“
”ہاں بہت زیادہ۔۔۔!
ڈر گئے ناں بیٹا!“
”نہیں بابا! مجھے ٹھنڈ لگ رہی ہے!“

Comments - User is solely responsible for his/her words

  •  
  •  
  •  
  •  
  •  
  •  
  •  
  •  
  •  
  •  
  •  
  •