شوبز ڈائری: ’سُشانت سنگھ کی بہن شویتا سنگھ کا ان کے نام خط‘

نصرت جہاں - بی بی سی اردو ڈاٹ کام، لندن

  •  
  •  
  •  
  •  
  •  
  •  
  •  
  •  
  •  
  •  
  •  
  •  

سوشانت سنگھ

Getty Images

بالی ووڈ اداکار سُشانت سنگھ کی بہن شویتا سنگھ کرتی نے سوشل میڈیا پر اپنے بھائی کے نام ایک کھلے خط میں جہاں ان کے لیے بے پناہ محبت کے ساتھ ان کی موت پر شدید دکھ کا اظہار کیا ہے وہیں ان کے مداحوں سے یہ بھی کہا ہے کہ وہ سوشل میڈیا پر نفرت نہ پھیلائیں۔

شویتا نے لکھا ’کسی بھی چیز کا انتخاب ہمارے اپنے ہاتھ میں ہوتا ہے تو کیوں نے ہم نفرت پر محبت کو اپنائیں، غصے اور ناراضگی پر ہمدردی اور شفقت کا انتخاب کریں اور ایک دوسرے کو معاف کرنا سیکھیں۔‘

شویتا کا کہنا تھا زندگی میں سبھی جدوجہد کرتے ہیں اس لیے ایک دوسرے کے ساتھ ہمدردی کا مظاہرہ کریں۔ شویتا کا یہ کھلا خط شاید ان لوگوں کے لیے بھی ہو جو اس موقع پر اپنی اپنی تلواریں تیز کرکے سوشل میڈیا پر اپنے مبینہ حریفوں کو ذبح کرنے کی کوشش میں ہیں۔

کنگنا رناوت

Getty Images

سُشانت سنگھ کی موت پر آنسو بہاتے ہوئے کہیں کنگنا رناوت کرن جوہر کو کوس کوس کر سوشانت کے لیے انصاف کی دہائی دے ری ہیں تو کہیں فلسماز ابھینو کشیپ اپنا پرانا جھگڑا لے کر سلمان خان کے خاندان کو لتاڑنے بیٹھ گئے۔

ساتھ ہی وویک اوبرائے کو بھی ماضی میں ایشوریہ کے حوالے سے سلمان خان کے ساتھ تکرار کے بعد انڈسٹری میں اپنی جدوجہد کی یادیں ستانے لگیں ہیں۔

سُشانت سنگھ کی آخری رسومات میں شرکت کے بعد انھوں نے انتہائی جذباتی ٹویٹ میں سُشانت سنگھ کے ساتھ ہمدردی اور اپنی کہانی بیان کی تو ٹویٹس کا ایک لمبا سلسلہ شروع ہو گیا جن میں بالی ووڈ میں اقربا پروری پر سبھی کو آڑے ہاتھوں لیا گیا اور عالیہ بھٹ بھی خوب ٹرول ہوئیں۔

سُشانت کی موت کے بعد سوشل میڈیا پر لوگوں نے ایک دوسرے کے خلاف جو جنگ شروع کی ہے وہ ختم ہونے کا نام ہی نہیں لے رہی۔

یہ درست ہے کہ سُشانت سنگھ کی بے وقت موت نے بالی ووڈ کی چلن اور اس کی روایات پر کئی سوال کھڑے کیے اور کئی بڑی بڑی ہستیوں کی جانب انگلیاں اٹھیں ہیں۔ بہار میں ایک کیس بھی درج ہوا ہے جس میں ایکتا کپور، کرن جوہر، سلمان خان اور کرن جوہر کے نام شامل ہیں۔

کہا جا رہا کہ سُشانت سنگھ کے پاس چھ فلمیں تھیں جو ان سے واپس لے لی گئیں اور کام نہ ملنے کی صورت میں حالات یہاں تک پہنچے کہ انھوں نے خود کشی کر لی۔

دریں اثنا مہاراشٹر کے وزیر داخلہ نے ٹویٹ میں کہا ہے کہ ممبئی پولیس سُشانت کے کیس میں پیشہ وارانہ دشمنی کے پہلوؤں کی بھی تحقیقات کرے گی۔

سُشانت شدید ڈپریشن کا شکار تھے اور کہا جا رہا ہے کہ وہ کچھ دنوں سے اپنی دوا بھی نہیں لے رہے تھے اور ان کے ہاتھ سے کئی بڑی بڑی فلمیں بھی نکل گئی تھیں۔

صورتِ حال جو بھی ہو ابھی پولیس تحقیقات کر رہی ہے لیکن اس دوران میڈیا اور سوشل میڈیا نے جو سرکس لگایا وہ شاید سُشانت کے اہلِ خانہ کے لیے کافی تکلیف دہ رہا ہوگا جس کے نتیجے میں ان کی بہن نے یہ کھلا خط لکھا۔

سوشل میڈیا پر ٹرولنگ سے تنگ آکر کرن جوہر نے ٹوئٹر پر صرف چار لوگوں کے علاوہ سب کو ان فالو کردیا ہے اب وہ صرف امیتابھ بچن، شاہ رخ کے ساتھ نریندر مودی کو ہی فالو کررہے ہیں۔

ادھر ایکتا کپور بھی ٹرولز سے تنگ آچکی ہیں اور ان کا کہنا ہے کہ انھوں نے سُشانت کو ٹی وی سیریل میں پہلا بریک دیا تھا۔

ایکتا کا کہنا تھا کہ سوشل میڈیا پر ہنگامہ کرنے کے بجائے سُشانت کے گھر والوں کو تنہائی میں سوگ منانے کا موقع دیں۔

Comments - User is solely responsible for his/her words

  •  
  •  
  •  
  •  
  •  
  •  
  •  
  •  
  •  
  •  
  •  
  •  

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 14211 posts and counting.See all posts by british-broadcasting-corp