جہاز میں شادی: کورونا کی پابندیوں سے بچنے کی کوشش، 160 مہمانوں نے ’شرکت‘ کی
اطلاعات کے مطابق ایک انڈین جوڑے نے کورونا وائرس کی پابندیوں سے بچنے کے لیے چارٹرڈ طیارے پر دوران پرواز شادی کی جس میں 160 مہمان بھی موجود تھے۔
شادی کی اس تقریب کی ویڈیو سوشل میڈیا پر پوسٹ کی گئی جس میں یہ جوڑا اور ان کے مہمان کرائے پر لیے گئے جہاز میں ایک دوسرے کے ساتھ ساتھ دکھائی دے رہے ہیں۔
یہ واقعہ ریاست تمل ناڈو کا ہے جہاں حال ہی میں شادی کی تقریب کے انعقاد پر پابندیاں مزید سخت کر دی گئی تھیں اور مہمانوں کی تعداد 50 تک محدود کرنے کو کہا گیا تھا۔
رپورٹ کے مطابق انڈیا کی سول ایوی ایشن اتھارٹی نے تحقیقات کا آغاز کر دیا ہے۔
مزید پڑھیے
کورونا کے دنوں میں انوکھی شادی، مہمانوں کو کھانا گاڑیوں میں تقسیم
خواب پرتعیش شادی کے لیکن بارات میں گنتی کے چار لوگ
لاک ڈاؤن میں شادی: دولہا سمیت مہمان گرفتاری کے بعد قرنطینہ میں
ڈائریکٹریٹ جنرل آف سول ایوی ایشن اتھارٹی کے ایک افسر نے ٹائمز آف انڈیا کو بتایا ہے کہ سپائس جیٹ میں سوار عملے کو ڈیوٹی سے فارغ کر دیا گیا ہے۔
سپائس جیٹ کے ترجمان نے انڈین ایکسپریس کو بتایا ہے کہ بوئٹگ 737 کو مودورائی سے بینگلور کے لیے بُک کیا گیا تھا۔ اور یہ بکنگ شادی کے بعد ٹرپ کے لیے ایک ٹریول ایجنٹ کے ذریعے کروائی گئی تھی۔
ترجمان کا کہنا ہے کہ واضح طور پر کورونا گائیڈ لائنز پر عمل کرنے کے لیے بریفنگ دی گئی تھی اور دوران پرواز کسی بھی قسم کی سرگرمی کی اجازت نہیں دی گئی تھی۔
https://twitter.com/DonthuRamesh/status/1396465757505028108
خیال رہے کہ انڈیا میں کورونا کی دوسری لہر بہت تباہ کن ثابت ہوئی ہے اور سرکاری اعداد و شمار کے مطابق اب تک تین لاکھ سے زیادہ افراد ہلاک ہو چکے ہیں۔ غیر ملکی اور غیر جانبدار اندازوں میں کہا جا رہا ہے کہ یہ تعداد اس سے کہیں زیادہ ہو سکتی ہے۔
حالیہ مہینوں میں ہسپتال اور شمشان گھاٹ بھرے ہوئے دکھائی دیے۔ اس صورتحال کی وجہ سے ملک میں آکسیجن کے سلینڈروں کی کمی اور شمشان گھاٹ میں لاشوں کو جلانے کے لیے جگہ، لکڑیوں اور دیگر ضروری سہولیات کی کمی دیکھی گئی ہے۔
بہت سے خاندان اپنے پیاروں کی آخری رسومات ادا نہیں کر پا رہے کیونکہ وہ اس کے لیے مالی طور پر مشکلات کا شکار ہیں۔ لوگ مرنے والے عزیز و اقارب کی لاشیں دریائے گنگا کے کنارے یا دریا کے اندر دھکیل رہے ہیں۔
اس صورتحال کے باعث یہ خدشہ ہے کہ کورونا وائرس کے باعث جانی نقصان کے اصل اعداد و شمار نمایاں طور پر کہیں زیادہ ہیں۔
