مشہور ومعروف اداکار اور شہنشاہ جذبات دلیپ کمار میں شمال مغربی ممبئی کے کھار علاقہ میں واقع ہندوجااسپتال میں زیر علاج تھے اب ان کو اسپتال سے چھٹی مل گئی ہے۔ جیسے ہی دلیپ کمار کو اسپتال سے چھٹی ملی تو سائرہ بانو کی خوشی کی انتہا نہ رہی اور انہوں نے میڈیا کے سامنے ہی ان کی پیشانی پر بوسہ دیا۔

اس سے پہلے بھی سائرہ بانو نے دلیپ کمار کی صحت کا اپڈیٹ دیتے ہوئے اسپتال سے تصویر شیئر کی تھی۔ یہ تصویر اسپتال کے اس روم کی ہے جہاں دلیپ کمار داخل تھے۔ فوٹو میں دلیپ کمار کے ساتھ سائرہ بانو بھی نظر آرہی ہیں۔ تصویر میں دلیپ کمار کی آنکھیں بند ہیں اور سائرہ بانو انہیں دیکھتی نظر آرہی ہیں اور اپنے ہاتھ سے دلیپ کمار کا ہاتھ پکڑا ہوا ہے۔ دلیپ کمار کو صحت خراب ہونے کے چلتے اتوار کو ممبئی کے ہندوجا اسپتال میں داخل کرایا گیا تھا۔

واضح ہو کہ معروف بزرگ اداکار دلیپ کمار کو سانس لینے میں تکلیف کے بعد اسپتال میں داخل کرایا گیا تھا۔ اطلاع کے مطابق 98 سالہ شہنشاہ جذبات کہلائے جانے والے اداکار کو شمال مغربی ممبئی کے کھار میں واقع ہندوجا اسپتال میں پہنچایا گیا تھا۔ دلیپ کمار کے اسپتال میں رہتے بیوی سائرہ بانو مستقل ان کے ساتھ رہیں اور سوشل میڈیا کے ذریعے اپڈیٹ دیتی رہی تھیں۔

(بشکریہ اردو نیوز 18)