مغربی ادب ۔افلاطون سے پوسٹ مارڈدن ازم تک (تیسری قسط)

رومن بنیادی طور پر اٹلی کے قدیم باشندے تھے۔ رومن دور میں اٹلی کامغربی شہر لاطیم رومن ایمپائر کاسیاسی و اقتصادی دارالحکومت ہونے کے ساتھ ساتھ سماجی و تہذیبی مرکزبھی تھا،اسی وجہ سے لاطیم میں بولے جانے والی لاطینی زبان ہی رومن ایمپائر کی آفیشل زبان بھی بن گئی تھی۔ روم کے اُس دور کے نچلے عوامی طبقے(پلیبینس)اور حکمراں طبقے کے درمیان جمہوریت کی بحالی کے لیے ایک طویل جدوجہد کی تاریخ موجودہے جس دوران عوام الناس کا  خوب ہی خون بہایا گیا جس کے نتائج میں ہی جدید یونانی دور میں رومن قوانین ترتیب دیے گئے۔ حضرت عیسی کی پیدائش بھی اسی رومن دور میں ہوئی اور 30عیسوی میں انہیں صلیب کیا گیا مگر عیسائیت اُس رومن دور میں نہیں پھیل سکی۔ جوں جوں رومن ایمپائر کا زوال ہوتا چلا گیا اُس دور کا ادب بھی اپنے معیارسے گرتا چلا گیا۔ اُس دور میں ادبی تخلیقات اور سرگرمیوں پر یونانی حکمرانوں کا براہ راست اور بالواسطہ (نفسیاتی) کنٹرول تھا اور ادیب مخمصے کا شکار تھے۔ اسی لیے اُس دور میں ہمیں زیادہ تر خطیبانہ لسانی ادب ہی نظر آتا ہے دوسرے الفاظ میں یونانی ادب کا گولڈن دور ’سلوردور‘ سے بدل گیا تھا۔کہیں ڈرامے، ایپی گرامز اور طربیہ نظمیں ضرور لکھیں جارہی تھیں مگر شاعر ی زیادہ نمایاں ہورہی تھی یا دوسرے الفاظ میں نثر نسبتاکم لکھی جارہی تھی خصوصا آگسٹن کے دور تک تو رائٹنگ ایک عزت دار پروفیشن بھی رہا تاہم بیانہ اور تاریخی ادب بہت کم ہوگیا تھاکیونکہ سنسر شپ اور پابندیوں کے بدولت سیاسی تنا زعات پرلکھنا کم و بیش بند ہوچکا تھا مگر ہاں شاعر ضرور ٹیکنیکل پرفیکشن کے ساتھ لکھ رہے تھے۔ شاعری کی عظیم تخلیقات جو اُس دور میں ہمیں نظر آتی ہیں اُن میں کیٹیلس کی انتھالوجی، اووڈ کی میٹا مارفوسس، سینیکا کی تھایسٹس اور ورجل کی اونیڈ شامل ہے مگر مجموعی طور پر ہم کہہ سکتے ہیں کہ تمام تر رومن دور درحقیقت قانون کی پاسداری کا دور تھا اس دور میں آزادی اظہار کی وہ نعمت نصیب نہیں تھی جو یونانی دور میں حاصل تھی اس لیے مغربی ادب کا یہ دور یونانی ادب کے اثر سے باہر نہ نکل سکا۔