سمیع چوہدری کا کالم: ’درست‘ بولنگ ’تیز‘ بولنگ سے زیادہ ضروری ہے‘
سمیع چوہدری - کرکٹ تجزیہ کار
ٹیسٹ کرکٹ کا ایک اہم سبق یہ ہے کہ کوئی بھی کھیل کی رفتار سے آگے نہیں چل سکتا۔ کیونکہ وہ جارحیت جو ایک لمحے میں عین دانش مندی نظر آتی ہے، اگلے ہی کسی لمحے حماقت کی عکاس دکھائی دینے لگتی ہے۔
پاکستان دن کے آغاز پہ ہی جیسی کامیابی کی توقع کر رہا تھا، وہ اسے میسر نہ ہو پائی۔ گذشتہ شام محمد عباس کے ہیٹ ٹرک چانس نے یہ ڈھارس بندھا چھوڑی تھی کہ بیٹنگ کے لیے مہلک اس گرین وکٹ پہ 217 بھی ایک مسابقتی مجموعہ ثابت ہو سکتا تھا۔
اور حال ہی میں جس قسم کی بے یقینی کا سامنا ویسٹ انڈین بیٹنگ کو رہا ہے، بعید نہیں تھا کہ پاکستان اپنے پست مجموعے کے باوجود کسی ہلکی پھلکی برتری سے اپنے حوصلے بلند کر پاتا۔
اسی لیے بابر اعظم نے جس جارحانہ انداز سے دن کا آغاز کیا، وہ دیدنی تھا۔ لائن، لینتھ اور سلپ کارڈن کی گہما گہمی یہ واضح کر رہی تھی کہ پاکستانی بولنگ اپنا بہترین کنٹرول دکھائے گی۔ یہ مہارت کسی حد تک نظر بھی آئی مگر سیشن کے دوسرے گھنٹے میں روسٹن چیز کی وکٹ کے سوا کچھ ہاتھ نہ آیا۔
لنچ کے بعد بھی شاہین شاہ آفریدی کے دو پے در پے حملوں نے یہ توقع اجاگر کر ڈالی کہ بہت جلد پاکستان لوئر آرڈر تک گھس چکا ہو گا۔ مگر بات یہ تھی کہ وکٹ بدل چکی تھی اور گیند بھی نرم ہو چلا تھا۔
پہلے دن یہ بخوبی نظر آیا کہ ابر آلود کنڈیشنز میں نیا گیند اس وکٹ پہ کافی حرکت کر رہا تھا۔ گھاس نمایاں ہونے کے سبب پیسرز کو وکٹ سے گرفت مل رہی تھی اور سیم اس قدر ہو رہا تھا کہ کسی کیوی پچ کا گماں ہو رہا تھا۔
یقین نہ آئے تو اظہر علی سے پوچھیے جو چار ریویوز اور نصف درجن چانسز ملنے کے باوجود کسی قابلِ قدر سکور کو ترستے رہ گئے۔
لیکن دوسرے دن لنچ کے ایک گھنٹہ بعد وکٹ کی طبیعت بدل چکی تھی اور گیند کا مزاج بھی۔ وہاں پاکستان کو رنز روکنے کی ضرورت تھی مگر کپتان کے کچھ قابلِ بحث فیصلوں اور بولنگ کی کچھ بدنظمی نے ایسا ہونے نہ دیا۔ وہ پچاس کے لگ بھگ رنز ہی تھے کہ جو کریگ براتھویٹ کا صبر آزما رہے تھے۔
مگر جہاں یہ واضح نظر آ رہا تھا کہ پرانے گیند کے ساتھ میڈیم پیسرز زیادہ کامیابی کے ضامن تھے، وہاں بابر اعظم نے فہیم اشرف اور محمد عباس سے رجوع کرنے کی بجائے گیند شاہین آفریدی اور حسن علی کو تھما دیا۔
یہ بھی پڑھیے
حسن علی کا ‘جینئس’ بھی کم پڑ گیا
نیوزی لینڈ نے بدقسمتی کے لیے بھی کوئی جواز نہیں چھوڑا
پاکستان کو دوسرے ون ڈے میں بھی شکست، انگلینڈ نے سیریز 0-2 سے اپنی نام کر لی
شاہین آفریدی نے بلاشبہ لنچ کے بعد ایک بہت لاجواب اوور پھینکا اور قریب تھا کہ ہیٹ ٹرک چانس چوکنے کے باوجود تیسری وکٹ بھی حاصل کر جاتے مگر اس اوور کے سوا، بحیثیتِ مجموعی ان کی بولنگ ان کے اپنے ہی معیارات سے پست تھی۔
اس کا نقصان یہ ہوا کہ ہولڈر کو بآسانی ففٹی تک پہنچنے اور ویسٹ انڈیز کو خسارہ مٹانے کا پورا پورا میدان فراہم ہو گیا۔ اگرچہ دیر آید، درست آید کے مصداق جونہی بابر اعظم فہیم اشرف کی طرف پلٹے تو ہولڈر کی وکٹ کی صورت میں فوری کامیابی ملی مگر تب تک دوسرے کنارے پہ کھڑے براتھویٹ میچ پہ چھا چکے تھے۔
حالیہ بیٹنگ فارم کے سبب تنقید کی زد میں رہنے والے ویسٹ انڈین کپتان نے ان مشکل بیٹنگ کنڈیشنز میں اپنی بیٹنگ لائن کی لاج رکھنے کا بیڑا اٹھایا اور سینچری سے دو چار ہاتھ پیچھے رہ جانے کے باوجود اپنی ٹیم کو برتری کی راہ پہ ڈال گئے۔
گو میچ ابھی ہاتھ سے پھسلا نہیں اور بتدریج بیٹنگ کے لیے سہل ہوتی وکٹ پہ تیسری اننگز میں ساڑھے تین سو کے لگ بھگ رنز جوڑے جا سکتے ہیں لیکن پھر بھی پاکستانی ڈریسنگ روم میں کافی مایوس چہرے یہ سوچ رہے ہوں گے کہ آخر ایسا کیا غلط کر بیٹھے جو توقعات یوں دھوکہ کھا گئیں۔
شاید یہ اندازے کی غلطی تھی جو بابر اعظم وکٹ کی بدلتی چال کو سمجھنے میں چُوک گئے۔ یا شاید یہ شاہین شاہ آفریدی کی بھول تھی کہ ‘درست’ بولنگ کرنے کی بجائے سارا دھیان تیز بولنگ پہ دے چھوڑا۔
خیر پھر بھی سیکھنے کو یہ سبق برا نہیں کہ پیس کی اہمیت اپنی جگہ مگر ‘تیز’ بولنگ کرنے کی بجائے ‘درست’ بولنگ کرنا زیادہ ضروری ہے۔
- مرنے سے قبل چند افراد کو اپنے وہ پیارے کیوں دکھائی دیتے ہیں جو پہلے ہی مر چکے ہوتے ہیں؟ قریب المرگ افراد کے تجربات - 18/04/2024
- یوکرین جنگ میں 50 ہزار روسی فوجیوں کی ہلاکت: وہ محاذِ جنگ جہاں روسی فوجی اوسطاً دو ماہ بھی زندہ نہیں رہ پا رہے - 18/04/2024
- دنیا کے دوسرے مصروف ترین دبئی ایئرپورٹ کی کہانی: ’یہاں حالات بدترین نہیں بلکہ خطرناک ہیں، ہمیں جانوروں کی طرح رکھا گیا ہے‘ - 18/04/2024
Facebook Comments - Accept Cookies to Enable FB Comments (See Footer).