عرفان خان کی یاد میں
ایک سال سے اوپر ہوگیا تمھیں موت کو گلے لگائے ہوئے اور میں ابھی تک نہیں سمجھ سکا کہ آخر اتنی جلدی کس بات کی تھی۔ اتنی دور کا سفر اور وہ بھی اتنا اچانک۔ سوچا بھی نہ تھا کہ جس کی آنکھیں زندگی سے اتنی بھرپور ہوں وہ مر بھی سکتا ہے۔
میں مانتا ہوں دنیا میں ایسا پہلی بار نہیں ہوا لیکن تم بھی ایسا کر جاو گے اس کا خیال تک نہ تھا۔ تمھاری ہر ادا انوکھی تھی، ہر اندا جدا تھا، ہر بات نرالی تھی۔ تم لاکھوں میں ایک تھےاور پھر روگ بھی تم نے اتنا ہی کم یاب اور مہلک پالا جو لاکھوں میں کسی ایک کو ہی ہوتا ہے۔
تم نے اپنے آخری خط میں لکھا تھا کہ ہو جاتا ہے۔ ایسے بھی ہوجاتا ہے کبھی کبھی۔ لیکن پھر بھی۔ ایسا ہونا تو نہیں چاہیے نا۔ ایسا نہیں ہے کہ تم پہلے شخص ہو جسے میں نے اچانک کھویا ہو۔ کچھ کو تمھاری طرح موت لے گئی تو کچھ کو زندگی نے ہی دور کردیا۔ لیکن ان میں اور تم میں ایک فرق بہت بڑا ہے۔ تم سے تو میں کبھی ملا بھی نہ تھا۔ بات تک نہ ہوئی تھی اور پھر بھی تمھارے چلے جانے پر اتنا ملال۔ میں یہ بات بھی آج تک نہیں سمجھ سکا۔
تمھارے وجود سے اداسی چھلکتی تھی۔ وہی اداسی جو کم عمری سے ہی اپنی الگ سوچ رکھنے والوں کا نصیب ہوتی ہے۔ تمھاری آنکھوں سے کرب بہتا تھا۔ وہی کرب جو منزل کے لیے پاوں شل کر لینے والے مسافروں کی آنکھوں میں بستا ہے۔ تمھاری باتوں سے عاجزی ٹپکتی تھی۔ وہی عاجزی جو زمین سے جڑئے رہنے والوں کا خاصہ ہوتی ہے۔ اور پھر تمھارے چہرئے سے معصومیت بھی تو جھلکتی تھی۔ وہی معصومیت جو سونے جیسا دل رکھنے والوں کی نشانی ہوتی ہے۔
تم نے اپنے کمال فن سے دلوں پر راج کیا اور اپنے انداز سے اپنے شعبے کے بھی سارے انداز بدل ڈالے۔ جدوجہد کیسے کی جاتی ہے یہ ہم کو سکھایا۔ حوصلہ کیسے برقرار رکھا جاتا ہے یہ لوگوں کو بتایا۔ بکھر کے پھر سے کیسے جڑا جاتا ہے یہ دنیا کو دکھایا اور گر کے کیسے اٹھا جاتا ہے یہ بھی کرکے دکھایا۔ لیکن پھر تم سب کچھ چھوڑ کر یوں چلے گئے جیسے دنیا کو طویل طویل عرصے تک اپنی ناقدری کرنے کی سزا دینا چاہتے ہو۔ شاید بونوں کی اس بستی میں جسے دنیا کہتے ہیں تمھارے قد کا کوئی مقام ہی نہ تھا۔
تم اداکار تھے لیکن اداکاری تو کرتے ہی نہ تھے۔ کردار میں ڈوب کر بس اس جیسا Behave کرتے تھے۔ خود خاموش رہتے اور مکالمے تمھارا چہرہ ادا کرتا۔ تمھاری آواز، جملوں کی ادائیگی اور لہجے کا اتار چڑھاؤ سحر انگیز تھا لیکن یہ بات طے ہے کہ کہانی میں کردار پر کیا بیت رہی ہے یہ بتانے کے لیے تم زبان کو حرکت دینے کے محتاج نہیں تھے۔ کہانی تمھاری زباں سے کم اور آنکھوں سے زیادہ بیان ہوتی تھی۔
لوگ کہتے تھے تمھاری پرسنالٹی فلمی ہیرو جیسی نہیں تھی۔ تم نے اپنے فن سے ہیرو بننے کا فرسودہ معیار ہی بدل ڈالا۔ پھر تمھارا نام ہر فلم کی کامیابی کا ضامن بن گیا۔ تم نے اپنے فن سے اس خطے کے لوگوں کو یہ بتایا کہ وہ دہائیوں سے اداکاری کے نام پر صرف کرتب دیکھ رہے تھے۔
کسی کردار کو خود پر طاری کرکے اس کی کہانی بتانے کے لیے خون جگر جلانا پڑتا ہے اور تم نے ہر ہر کردار کے لیے خون جگر جلایا۔ تم وارئیر تھے، مقبول تھے، پان سنگھ تومر تھے، مداری تھے، بلو باربر تھے، قصہ مختصر ، تم فن اداکاری کے عارف تھے۔ تم عرفان تھے۔ اور یہ کہ تم بھی آخر انسان ہی تھے۔ انسان، جو نہ اپنی مرضی سے اس دنیا میں آتا ہے اور نہ ہی یہاں سے واپسی کے لیے اس کی مرضی پوچھی جاتی ہے۔ تمھاری زندگی جہاں انسانی عزم اور عظمت کا نمونہ تھی وہیں تمھاری موت انسان کی بے اختیاری کابے بس کردینے والا ثبوت بھی تھی۔
بہرحال تم نے ثابت کیا کہ اپنی راہ خود بنانے والوں کی منزلیں بھی سب سے الگ اور شاندار ہوتی ہیں۔ اب تمھارے مقرر کردہ راستوں پر چل کر اور لوگ بھی اس فن کی بلندیوں کو چھوئیں گے۔ کچھ تم جیسے سر پھرے بھی ضرور آئیں گے جو تم سے بھی ہٹ کر اپنی راہیں ڈھونڈیں گے۔ اس دنیا میں باصلاحیت اور اثرانگیز افراد کی کمی تھی اور نا ہو گی۔ لیکن دل پر جو چھاپ تمھاری لگی ہے اسے شاید ہی کوئی مٹا سکے۔
آخر میں تمھارے نام اخترالایمان کی ایک نظم
شہر در شہر، قریہ در قریہ
سال ہا سال سے بھٹکتا ہوں
بارہا یوں ہوا کہ یہ دنیا
مجھ کو ایسی دکھائی دی جیسے
صبح کی ضو سے پھول کھلتا ہو
بارہا یوں ہوا کہ روشن چاند
یوں لگا جیسے ایک اندھا کنواں
یا کوئی گہرا زخم رستا ہوا
میں بہر کیف پھر بھی زندہ ہوں
اور کل سوچتا رہا پہروں
مجھ کو ایسی کبھی لگن تو نہ تھی
ہر جگہ تیری یاد کیوں آئی؟
- بڑے ہو کر کیا بنو گے؟ فوجی یا پائلٹ! - 16/05/2023
- آخر ہم انساں ہی تو ہیں - 04/05/2023
- جہد مسلسل ناکامی کا تریاق ہے - 08/10/2022
Facebook Comments - Accept Cookies to Enable FB Comments (See Footer).