محمد رضوان آئی سی سی ٹی 20 ’کرکٹر آف دی ائیر‘ قرار: ’زیادہ خوشی پاکستان کا نام آنے کی ہے‘

انٹرنیشل کرکٹ کونسل (آئی سی سی) نے پاکستان کے وکٹ کیپر اور اوپننگ بیٹسمین محمد رضوان کو ’ٹی ٹوئنٹی کرکٹر آف دی ائیر‘ یعنی سال 2021 کا سب سے بہترین ٹی ٹوئنٹی کھلاڑی قرار دیا ہے۔

انھوں نے محمد رضوان کے شاندار کھیل کی تعریف کی اور انھیں ایک بہترین کھلاڑی قرار دیتے ہوئے ساتھ ہی امید ظاہر کی کہ رضوان یقیناً سال 2021 میں اپنی کامیابیوں سے لطف اندوز ہوئے ہوں گے۔

محمد رضوان نے یہ ایوارڈ پاکستان اور پاکستان کے خوبصورت لوگوں کے نام کرتے ہوئے ٹویٹ کی ’الحمدو للہ۔ بس اللہ سے ہوتا ہے، اللہ کے غیر سے نہیں ہوتا۔‘

انھوں نے یہ بھی لکھا کہ وہ سب لوگوں کی حمایت اور محبت کے لیے شکر گزار ہیں اور ’انشااللہ یہ سفر ابھی شروع ہوا ہے۔‘

https://twitter.com/ICC/status/1485153215339544579

’زیادہ خوشی پاکستان کا نام آنے کی ہے‘

آئی سی سی کی ویب سائٹ پر جاری کردہ ویڈیو پیغام میں محمد رضوان کا کہنا ہے کہ انھیں’زیادہ خوشی پاکستان کا نام آنے کی ہے‘۔

ان کا کہنا تھا کہ ’مجھے خوشی اس چیز کی ہے کہ اس میں میرا پاکستان شامل ہو گا، کیونکہ یہ ایوراڈ پاکستان کو ملا ہے۔‘

رضوان نے اپنی اس کامیابی کا کریڈیٹ پاکستان ٹیم مینیجمنٹ کو دیتے ہوئے کہا کہ انھوں نے اس کام میں میرا ہاتھ بٹایا۔

اس کے علاوہ انھوں نے ٹیم کے ساتھی کھلاڑیوں اور میدان کے باہر ان کھلاڑیوں کو بھی کریڈٹ دیا جو رضوان کے مطابق پردے کے پیچھے رہتے ہوئے ’میرے لیے تجزیے اور میری مدد کرتے ہیں۔‘

انھوں نے اپنے لیے دعائیں کرنے والوں کا بھی شکریہ ادا کیا اور کہا کہ ’الحمدوللہ اس وقت پاکستان ٹیم پوری دنیا میں پہلے نمبر پر ہے۔‘

سال 2021 پاکستان کرکٹ ٹیم کے لیے بہترین سال رہا ہے، خواہ ٹی ٹوئنٹی ہو، ون ڈے یا ٹیسٹ فارمیٹ آئی سی سی کی سال کی بہترین ٹیمیں پاکستانی کھلاڑیوں کے بغیر پوری ہوتی دکھائی نہیں دے رہیں۔

پاکستانی کرکٹ ٹیم کے کپتان بابر اعظم آئی سی سی کی سال کی بہترین ٹی ٹوئنٹی ٹیم کے کپتان کے بعد اب ون ڈے ٹیم کے کپتان بھی ہوں گے جبکہ آئی سی سی کی سال کی بہترین ٹیسٹ ٹیم کے لیے پاکستان کے تین کھلاڑیوں کو نامزد کیا گیا ہے۔

جمعرات کے روز آئی سی سی کی جانب سے ون ڈے کرکٹ کی سال کی بہترین ٹیم کا اعلان کیا گیا جس میں نہ تو کوئی آسٹریلوی یا انگلش کھلاڑی شامل ہے اور نہ ہی کوئی انڈین کھلاڑی اس ٹیم میں جگہ بنا سکا ہے۔ پاکستانی اوپنر فخر زمان بھی اس ون ڈے ٹیم میں جگہ بنانے میں کامیاب ہوئے ہیں۔

یہ بھی پڑھیے

بابر اعظم اور محمد رضوان، ہیں تو دو مگر 11 پر بھاری

محمد رضوان: مجھے کسی بولر کا ڈر خوف نہیں ہوتا

آئی سی سی کی ہر ٹیم میں پاکستانیوں کا راج: ’اس ون ڈے ٹیم کو تو انڈیا اے بھی ہرا دے گی‘

دوسری جانب خواتین کی سال کی بہترین ٹیم میں 20 سالہ پاکستانی بولر فاطمہ ثنا کو بھی شامل کیا گیا ہے۔ فاطمہ ثنا نے سنہ 2021 میں 24 کی اوسط سے 20 وکٹیں حاصل کیں، جس میں ایک فائیو فار شامل تھا۔

آئی سی سی کی جانب سے ٹیسٹ کی بہترین ٹیم کا اعلان بھی کیا گیا ہے جس میں پاکستان کے تین کھلاڑی فواد عالم، حسن علی اور شاہین شاہ آفریدی شامل ہیں۔