جولین اسانج کو ملک بدر کیا جا سکتا ہے، برطانوی وزیرِ داخلہ

برطانوی وزیرِ داخلہ پریتی پٹیل نے وکی لیکس کے بانی جولین اسانج کو امریکہ کے حوالے کرنے کی منظوری دے دی ہے۔

وزارتِ داخلہ نے کہا ہے کہ اسانج کے پاس اس فیصلے کے خلاف اپیل کرنے کے لیے 14 دن ہیں۔

وزارتِ داخلہ نے کہا کہ عدالتوں کو نہیں لگتا کہ اسانج کی امریکہ کو حوالگی ’ان کے انسانی حقوق سے مطابقت نہیں رکھتی‘ اور یہ کہ امریکہ میں رہتے ہوئے ’ان کے ساتھ مناسب سلوک روا رکھا جائے گا۔‘

جولین اسانج امریکی حکام کو 2010 اور 2011 میں لیک ہونے والی دستاویزات کے حوالے سے مطلوب ہیں۔

2019 میں لندن میں ایکواڈور کے سفارت خانے سے نکالے جانے کے بعد سے اسانج برطانوی جیل میں رہ رہے ہیں۔ ایکواڈور نے ان کو دی جانے والی سیاسی پناہ واپس لے لی تھی جس کے بعد برطانوی پولیس نے انھیں گرفتار کر لیا تھا۔

وکی لیکس نے اس فیصلے کے بعد کہا ہے کہ یہ ’آزادی صحافت اور برطانوی جمہوریت کے لیے ایک سیاہ دن‘ ہے۔

وکی لیکس نے ٹویٹر پر ایک پوسٹ میں کہا کہ یہ فیصلہ ’لڑائی کا خاتمہ نہیں ہے‘ اور ساتھ یہ بھی لکھا کہ وہ اس فیصلے کے خلاف اپیل کریں گے۔

یہ بھی پڑھیئے

وکی لیکس کے بانی کا ’خفیہ خاندان‘

اسانج کو امریکہ کے حوالے نہیں کرنا چاہیے: کوربن

جولین اسانج کون ہیں؟

جولین اسانج کے خلاف ریپ کی تحقیقات دوبارہ شروع

مئی 2019 میں امریکی محکمہ انصاف نے اسانج کے خلاف جاسوسی ایکٹ کی خلاف ورزی کرنے پر 17 الزامات عائد کیے تھے۔ اس وقت بھی وہ برطانیہ میں ضمانت کی خلاف ورزی پر جیل کاٹ رہے تھے۔ امریکہ نے ان پر الزام لگایا کہ وکی لیکس کے ذریعہ حاصل کردہ مواد نے کئی زندگیوں کو خطرے میں ڈالا ہے۔

جولین اسانج کی قانونی ٹیم نے دعویٰ کیا کہ وکی لیکس کی طرف سے شائع کردہ خفیہ دستاویزات، جو عراق اور افغانستان کی جنگوں سے متعلق ہیں، امریکہ کے غلط کاموں کو بے نقاب کرتی ہیں اور عوامی مفاد میں تھیں۔

اسانج کی اہلیہ سٹیلا نے کہا کہ ان کے شوہر نے ’کچھ غلط نہیں کیا‘ اور ’انھوں نے کوئی جرم نہیں کیا۔‘

انھوں نے کہا کہ ’وہ ایک صحافی اور پبلشر ہیں، اور انھیں اپنے کام کی سزا دی جا رہی ہے۔‘