’کراچی کنگز کو اب اپنا نام صرف کراچی رکھ لینا چاہیے کیونکہ کنگ تو جا رہا ہے‘

پاکستان سپر لیگ (پی ایس ایل) کے نئے سیزن میں کچھ کھلاڑیوں کو ان کی ٹیموں نے ریٹین نہیں کیا جن میں سب سے بڑا نام پاکستانی کرکٹ ٹیم کے کپتان بابر اعظم کا ہے۔

بابر اعظم اب پشاور زلمی کی کپتانی کریں گے جبکہ اس کے عوض کراچی کنگز کو شعیب ملک اور حیدر علی مل گئے ہیں۔ کوئٹہ گلیڈی ایٹرز بھی بابر اعظم کو اپنی ٹیم میں شامل کرنا چاہتی مگر یہ ممکن نہ ہو سکا۔

زلمی میں اس وقت صرف بابر پلاٹینم کیٹگری کے کھلاڑی ہیں۔ جبکہ آئندہ ہونے والے ڈرافٹ میں ٹیمیں مقامی اور غیر ملکی کرکٹرز کو شامل کر سکیں گی۔

کنگز کے حیدر علی پلاٹینم جبکہ شعیب ملک، عماد وسیم اور محمد عامر ڈائمنڈ کیٹگری کے ہیں۔ دوسری طرف وہاب ریاض دوبارہ پشاور زلمی کی طرف سے کھیلیں گے۔

https://twitter.com/IsbUnited/status/1591094446904705024

https://twitter.com/KarachiKingsARY/status/1591172799686901760

باقی ٹیموں سے مختلف حکمت عملی اپناتے ہوئے زلمی نے صرف سات پلیئر ریٹین کیے ہیں۔

اب ڈرافٹ کے دوران ٹیمیں اپنے سکواڈ کو 18 کھلاڑیوں تک لے جا سکتی ہیں۔ ٹیموں کے پاس یہ موقع ہو گا کہ پلاٹینم، ڈائمنڈ اور گولڈ میں تین، تین کھلاڑی رکھ سکیں جبکہ سلور میں پانچ، ایمرجنگ اور سپلیمنٹری میں دو کرکٹرز حاصل کریں۔

اب تک لاہور قلندرز نے فخر زمان، راشد خان، شاہین آفریدی، حارث رؤف اور ڈیوڈ ویسے سمیت دیگر کو ریٹین کیا ہے۔ مگر محمد حفیظ اب لاہور کی ٹیم کا حصہ نہیں ہوں گے۔

کوئٹہ گلیڈی ایٹرز نے کپتان سرفراز احمد اور محمد نواز کو ریٹین کیا ہے مگر نسیم شاہ کو ریلیز کر دیا ہے اور وہ ڈرافٹ کا حصہ ہوں گے۔ توقع ہے کہ افتخار احمد، جیسن رائے، عمر اکمل اور ول سمیڈ بھی گلیڈی ایٹرز کی طرف ہی کھیلیں گے۔

ملتان سلطانز کی کپتانی ایک بار پھر محمد رضوان کریں گے۔ ملتان نے ٹِم ڈیوڈ، شان مسعود، رائلی روسو اور شاہنواز دھانی کو ریٹین کیا ہے جبکہ عباس آفریدی اور احسان اللہ ایمرجنگ کیٹگری میں ہوں گے۔

یہ بھی پڑھیے

پاکستان بمقابلہ انگلینڈ: بارش کے خدشے کے باعث فائنل کے قواعد میں ردوبدل

’کنگ بابر، پچھلی تمام ٹویٹس کے لیے معذرت‘

انڈین ٹیم کو درپیش وہ پانچ بڑے مسائل جو اسے ٹی ٹوئنٹی ورلڈ کپ میں لے ڈوبے

https://twitter.com/TeamQuetta/status/1591095994183258114

https://twitter.com/PeshawarZalmi/status/1591097907159044096

پاکستانی ٹیم کے ٹی ٹوئنٹی نائب کپتان شاداب خان اسلام آباد یونائیٹڈ کے ساتھ جڑے رہیں گے۔ اسلام آباد نے آصف علی، فہیم اشرف، حسن علی اور محمد وسیم کو ریٹین کیا ہے۔ جبکہ کالن منرو، پال سٹرلنگ، اعظم خان بھی اسلام آباد کی ٹیم کا حصہ ہوں گے۔

493 غیر ملکی کھلاڑی پی ایس ایل ڈرافٹ کا حصہ ہوں گے جن میں انگلینڈ کے 140، افغانستان کے 43، آسٹریلیا کے 14، آئرلینڈ کے نو، زمبابوے کے 11، جنوبی افریقہ کے 25 اور ویسٹ انڈیز کے 38 کھلاڑی شامل ہیں۔

پی ایس ایل 2023 نو فروری کو شروع ہوگی جبکہ اس کا فائنل مقابلہ 19 مارچ کو کھیلا جائے گا۔ اس کے میچ لاہور،کراچی، راولپنڈی اور ملتان میں ہوں گے۔

https://twitter.com/Sports_Himanshu/status/1591078155292667904

بابر اعظم کی پشاور زلمی میں شمولیت پر تبصرے

کرکٹ شائقین کا جہاں ایک طرف دھیان ٹی ٹوئنٹی ورلڈ کپ کے فائنل کی طرف ہے جہاں میلبرن میں انگلینڈ اور پاکستان کی ٹیمیں اتوار کو مدمقابل ہوں گی، وہیں پی ایس ایل کی ٹیموں میں تبدیلیاں بھی اُن کی نظروں سے گزر رہی ہیں اور وہ اس پر اپنی رائے کا اظہار کر رہے ہیں۔

ہیمانشو نامی صارف تبصرہ کرتے ہیں کہ کراچی کنگز کو اب اپنا نام صرف کراچی رکھ لینا چاہیے کیونکہ ’کنگ تو جا رہا ہے۔‘

کراچی کنگز کے مالک سلمان اقبال نے بھی بابر اعظم کے جانے پر انھیں پیغام دیا ہے کہ بس اب کراچی کے خلاف ’کوور ڈرائیوز نہ مارنا۔‘

https://twitter.com/Salman_ARY/status/1591080122806779906

ادھر کرکٹ سے متعلق ویب سائٹ کرکٹ پاکستان میں کوئٹہ گلیڈی ایٹرز کے مالک ندیم عمر کے حوالے سے کہا گیا ہے کہ سرفراز احمد کپتانی چھوڑنے کے لیے تیار تھے اگر بابر اعظم کوئٹہ گلیڈی ایٹرز میں آ کر اس کی کپتانی کرتے ہیں۔

افراح نامی صارف کہتی ہیں کہ اب جب بابر اعظم کراچی کنگز کو چھوڑ چکے ہیں تو اس ٹیم کو سپورٹ کرنے کی کوئی وجہ باقی نہیں رہی۔ مگر فاطمہ کہتی ہیں کہ ’کراچی کنگز اور لاہور قلندرز کا میچ اب اتنا دلچسپ نہیں رہے گا کیونکہ بابر اور شاہین کے مقابلے کی ہائپ ہوا کرتی تھی۔‘

https://twitter.com/Fatimayyy123/status/1591189580359036928

دریں اثنا اسد پوچھتے ہیں کہ ورلڈ کپ فائنل سے قبل پی ایس ایل کی ٹیموں میں کھلاڑیوں کی تبدیلی کے بارے میں کیوں بتایا جا رہا ہے۔

زہرہ نے کہا ’ورلڈ کپ فائنل ہمارا اتوار کو ہے مگر ٹائم لائن دیکھ کر لگتا ہے کہ پی ایس ایل شروع ہونے والا ہے۔‘

https://twitter.com/allaboutcrick74/status/1591135491386068992

ایک انڈین صارف نے لکھا کہ اگر پاکستان ٹی ٹوئنٹی ورلڈ کپ فائنل جیت جاتا ہے تو دنیا بھر کی کرکٹ لیگز میں پی ایس ایل کی قدر مزید بڑھ جائے گی۔

https://twitter.com/Sports_Himanshu/status/1591146484351000576