24 نومبر: ترکماں حجرت ِاکبر آئیو
زوال بادل کی چھوٹی چھوٹی ٹکڑیوں کی صورت نمودار نہیں ہوتا۔ افق پر چاروں طرف غبار کی ایک تہ نظر آتی ہے جو آہستہ آہستہ سیاہ دبیز چادر کی طرح ہر سمت پھیل جاتی ہے۔ زوال زندگی کے ہر شعبے میں گراوٹ اور رسوائی کا ہمہ جہتی مظہر ہے۔ سیاسی مکالمہ ہو یا معیشت کے رنگ، صحافت کی ساکھ ہو یا درس گاہ کے آداب، گلی کوچوں کا طرز گفتار ہو یا مشترک اخلاقی اقدار، زوال، لمحہ افسوس کا ایسا زمانی پھیلاؤ ہے جو دن رات کی تمیز ختم کر دیتا ہے۔ زوال جوتش کی بھول چوک نہیں، اجتماعی شعور کی کوتاہ نگاہی سے جنم لیتا ہے۔ اجتماعی سفر میں ایک غلط قدم برسوں کی صحرا نوردی پر منتج ہوتا ہے۔ 24 نومبر 2022 ءکی زمانی مدت تو 24 گھنٹے ہی تھی لیکن یہ آٹھ پہر قوم پر، اقبال کے لفظوں میں، ’حلقہ محشر‘ کی صورت گزرے۔ مختار صدیقی نے ایسی ہی کسی آزمائش کو نظم کیا تھا ’دونوں وقت آن ملا کرتے ہیں دم بھر کے لیے‘ اور پھر رائیگانی کی واسوخت کے رنگ میں لکھا ’نیا جیون کی نہ آ جائے کنار دریا‘ ۔ ہماری تاریخ میں ’پراجیکٹ عمران‘ نامی وقفہ انحراف اپنے انجام کو پہنچا۔ اس آزمائش کے کیف و کم کی حکایت طویل ہے۔
آمر اپنے تام جھام کے علی الرغم ایک فانی انسان ہی تو ہوتا ہے۔ اپنے اقتدار کے جاوداں ہونے کی معصوم سی خواہش رکھتا ہے۔ گردش روز و شب میں مگر وہ لمحہ آن پہنچتا ہے جہاں آمر کا مفاد اس کے حلقہ انتخاب کے مستقل مفاد سے متصادم ہو جاتا ہے۔ ایوب خان پر یہ مرحلہ فروری 1968 میں آیا۔ یحییٰ خان کو یہ خبر 19 دسمبر 1971 کو جنرل عبدالحمید نے دی۔ ضیا الحق کا جہاز 17 اگست 1988 کو حادثے کا شکار ہوا لیکن انہیں ناگہانی کی سن گن مل چکی تھی۔ اواخر 2006 میں مشرف آمریت پر سات برس مکمل ہو چکے تھے۔ چیف جسٹس اور صدر مشرف کی 9 مارچ 2007 کی ملاقات میں تمثیل کا آخری حصہ شروع ہوا۔ اس میں عدلیہ تحریک، لال مسجد آپریشن، این آر او کے دبئی مذاکرات اور 3 نومبر کی ایمرجنسی پلس چار اہم موڑ تھے۔ بالآخر 29 نومبر 2007 کو مشرف نے اپنے ہاتھ کاٹ کر اشفاق کیانی کے سپرد کر دیے۔
میثاق جمہوریت پر بینظیر بھٹو اور نواز شریف نے دستخط کیے تھے۔ قومی سیاست سے بظاہر بے دخل ان سیاسی رہنماو¿ں کی اکتوبر اور نومبر میں وطن واپسی سے سیاسی منظر بدل گیا۔ بینظیر کی شہادت کلیدی جمہوری قوتوں پر شب خون تھا۔ اس وحشت سے 2008 کے انتخابات کا منصوبہ بھی تلپٹ ہو گیا۔ این آر او مذاکرات کرنے والوں ہی نے این آر او کو گالی بنا دیا۔ کیری لوگر بل پر طوفان اٹھانے کے باوجود اپریل 2010 میں 18 ویں آئینی ترمیم منظور ہوئی۔ اس مرحلے پر جمہوریت مخالف عناصر نے ’پراجیکٹ عمران‘ کا نقشہ جمایا۔ اس کا ثبوت 2009 سے 2013 تک تحریک انصاف کو ممنوعہ فارن فنڈنگ کی صورت ملنے والے کروڑوں ڈالر تھے۔ تب تحریک انصاف کے پاس ایک بھی پارلیمانی نشست نہیں تھی۔
10 اکتوبر 2011 سے شروع ہونے والا میمو گیٹ سکینڈل تو 30 اکتوبر کے لاہور جلسے کا نقارہ تھا۔ جس میمو گیٹ سکینڈل کی آنچ نے ملک کے منتخب صدر کو دو ہفتے تک ملک بدری پر مجبور کیا، اسے بعد ازاں عدالت عظمیٰ نے کھڑکی سے باہر پھینک دیا اور اب کسی کو یہ پوچھنے کا یارا نہیں کہ محسن ملت منصور اعجاز ان دنوں کہاں ہوتے ہیں۔ یوسف رضا گیلانی کو خلاف آئین خط نہ لکھنے کی پاداش میں صرف گھر نہیں بھیجا گیا، انہیں پارلیمنٹ میں بولے ایک جملے کی پاداش میں ناقابل اشاعت آزمائش بھی کاٹنا پڑی۔
لاہور کے بدنام زمانہ جلسے کے بعد 30 اکتوبر سے 19 دسمبر 2011 تک 6 ہفتوں میں کم از کم 15 اہم سیاستدان تحریک انصاف میں شامل ہوئے۔ قومی سیاست کے ان جغادریوں کو 16 برس تک عمران خان کی مسیحائی خوبیاں نظر نہیں آئیں۔ مئی 2013 کے انتخابات میں پیپلز پارٹی، اے این پی اور ایم کیو ایم کو طالبان کے ذریعے انتخابی عمل سے باہر رکھنے کے باوجود حسب خواہش نتائج برآمد نہیں ہوئے۔ جون 2013 میں قائم ہونے والی نواز حکومت ابتدا ہی سے ناپسندیدہ اور عارضی بندوبست قرار پائی۔ اس کے باوجود نواز حکومت نے دہشت گردی پر قابو پایا، لوڈشیڈنگ ختم کی، سی پیک منصوبہ شروع کیا۔ ملک کو ایف ٹیف کی گرے لسٹ سے باہر نکالا۔ مہینوں پر محیط دھرنے کامیاب نہیں ہوئے تو اکتوبر 2016 میں ڈان لیکس کا شوشہ چھوڑ کر حکومت کو مفلوج کر دیا گیا۔ پاناما لیکس پر لغو قرار پانے والی درخواست 30 اکتوبر کے پش اپ لاک ڈاؤن کے بعد کلیدی قومی مسئلہ بن گئی۔ پاکستان کی عدالتی تاریخ میں پاناما کیس کی نا انصافی، بھٹو شہید کے عدالتی قتل سے چھوٹی نا انصافی نہیں تھی۔
سیاسی قوتوں کی داخلی کمزوریوں سے قطع نظر، فروری 2018 سے جولائی 2018 تک قوم کے ساتھ کی گئی سنگین زیادتی کا سیاسی اور معاشی تاوان مدتوں ادا کرنا پڑے گا۔ قومی تائید کی حامل سیاسی قوتوں کو کھلی دھاندلی سے شکست دے کر جولائی 2018 میں جو مسیحا صفت ٹولہ اقتدار میں لایا گیا اس نے روز اول ہی سے واضح کر دیا کہ اس کے پاس قوم کے لیے کوئی سیاسی نقشہ ہے اور نہ معاشی منصوبہ۔ ماضی میں پس پردہ رہ کر قومی وسائل لوٹنے والے معاشی مافیا براہ راست کابینہ میں آ بیٹھے۔ سی پیک کی نیا ڈوب گئی۔ ڈالر 115 سے 190 روپے تک جا پہنچا۔ صحافت کی ساکھ ڈوب گئی۔ سیاسی مکالمہ مقابلہ دشنام قرار پایا۔ دوست ممالک نے منہ پھیر لیا۔ احتساب کے بغدادی ڈنڈے نے انتظامیہ کو بے دست و پا کر دیا۔
ایک طرف ملک معاشی بدحالی، سیاسی عدم استحکام اور سفارتی تنہائی سے دو چار تھا تو دوسری طرف صاحب صدق و امانت کی آرزوئیں صدارتی نظام کے راستے 2028 کی خبر لا رہی تھیں۔ اکتوبر 2021 میں شروع ہونے والے تماشے نے تحریک عدم اعتماد کی گھاٹی سے گزرتے ہوئے 24 نومبر 2022 تک کا سفر طے کیا۔ قوم نے ’پراجیکٹ عمران‘ کی آزمائش دیکھ لی۔ ہم ایک نئے عہد کی دہلیز پر کھڑے ہیں۔ ہم نے اتنے چرکے اٹھائے ہیں کہ ایمن کلیان کی بندش ’نیا باندھو رے کنار دریا‘ کی ہمت نہیں رہی۔ ہمیں تو سجاد بلوچ کا شعر زیادہ حسب حال معلوم ہوتا ہے۔
کسے معلوم اب پردے کے پیچھے چل رہا ہے کیا
کسے معلوم اب آتی ہے آگے کون سی پتلی
- سید حیدر تقی: وہ یادگارِ کمالاتِ شہر امروہہ (مکمل کالم) - 24/04/2024
- رحمن اینڈ رحمن: دھوپ کا ٹکڑا اور بادل کی چھائوں - 12/04/2024
- چیت کے دکھ کون گن سکتا ہے؟ - 11/04/2024
Facebook Comments - Accept Cookies to Enable FB Comments (See Footer).