اچھی یونیورسٹی یا اچھی ڈگری؟ فیصلہ جو آپ کے مستقبل کا رخ متعین کرے گا
جب طلباء اپنی تعلیمی زندگی کا آغاز کرتے ہیں، تو ان کے ذہن میں ایک سوال اکثر اٹھتا ہے : ”کیا مجھے اچھی یونیورسٹی میں داخلہ لینا چاہیے، چاہے کورس کمزور ہو، یا کسی غیر معروف یونیورسٹی میں ایک طاقتور ڈگری حاصل کرنی چاہیے؟“ یہ ایک اہم سوال ہے جس کا جواب طلباء کے مستقبل کی بنیاد رکھ سکتا ہے، خاص طور پر جب بات کیریئر کی ہو۔
غیر معروف یونیورسٹی سے اچھے کورس کا نقصان:
عموماً، طلباء غیر معروف یونیورسٹیوں میں صرف اس وجہ سے داخلہ لے لیتے ہیں کہ وہاں داخلہ آسان ہوتا ہے یا فیس کم ہوتی ہے۔ یہ فیصلہ وقتی طور پر مناسب لگ سکتا ہے، لیکن جب طلباء گریجویشن کے بعد ملازمت کی مارکیٹ میں داخل ہوتے ہیں تو انہیں ایک بڑی حقیقت کا سامنا کرنا پڑتا ہے۔
سی وی شارٹ لسٹنگ کا مسئلہ: جب آپ کسی غیر معروف یونیورسٹی سے ڈگری حاصل کرتے ہیں، تو بڑی کمپنیاں اکثر آپ کے سی وی کو شارٹ لسٹ ہی نہیں کرتیں، چاہے آپ کا کورس کتنا ہی مضبوط کیوں نہ ہو۔
کمپنیوں کا اداروں پر اعتماد: معروف ادارے اپنی شہرت کی وجہ سے مارکیٹ میں بہتر ساکھ رکھتے ہیں، جس کی وجہ سے وہاں کے طلباء کو کمپنیوں میں زیادہ مواقع ملتے ہیں۔
طلباء کی مایوسی: جب طلباء کو بار بار انٹرویو کے لئے رد کیا جاتا ہے یا ان کی سی وی شارٹ لسٹ نہیں ہوتی تو وہ یہ سوچنے پر مجبور ہو جاتے ہیں کہ کاش انہوں نے کسی بہتر یونیورسٹی کا انتخاب کیا ہوتا۔
اچھی یونیورسٹی میں کمزور کورس کا فائدہ:
اگر آپ کسی اچھی یونیورسٹی سے کمزور یا ”ماٹھی“ ڈگری حاصل کرتے ہیں، تو بھی آپ کو مارکیٹ میں ایک فائدہ ہوتا ہے۔ بڑی کمپنیاں اکثر یونیورسٹی کے نام پر بھروسا کرتی ہیں اور ان اداروں کے طلباء کو زیادہ ترجیح دیتی ہیں۔
یونیورسٹی کا برانڈ: اچھی یونیورسٹی کا نام آپ کے سی وی میں اعتماد کا اضافہ کرتا ہے۔ کمپنیوں کے لئے یہ ایک اشارہ ہوتا ہے کہ آپ کو اچھی تعلیمی سہولیات اور تربیت ملی ہے۔
سوشل نیٹ ورک: اچھی یونیورسٹیوں میں طلباء کو نہ صرف تعلیمی فوائد ملتے ہیں بلکہ وہاں سے تعلقات اور نیٹ ورکنگ کے مواقع بھی دستیاب ہوتے ہیں، جو مستقبل میں کیریئر میں مددگار ثابت ہو سکتے ہیں۔
مارکیٹ میں بہتر مواقع: معروف یونیورسٹی سے فارغ التحصیل ہونے کی وجہ سے آپ کو زیادہ انٹرویو کالز اور بہتر مواقع ملنے کے امکانات ہوتے ہیں، چاہے آپ کا کورس کمزور ہی کیوں نہ ہو۔
اگر آپ کا مقصد صرف ملازمت حاصل کرنا ہے اور آپ اپنے فیلڈ میں پیشن ایٹ نہیں ہیں، تو بہتر ہو گا کہ آپ کسی معروف یونیورسٹی میں داخلہ لیں، چاہے آپ کو کمزور کورس کیوں نہ کرنا پڑے۔ کیونکہ مارکیٹ میں، بڑی کمپنیاں عموماً یونیورسٹی کے نام پر بھروسا کرتی ہیں اور اس کی بنیاد پر ہی فیصلہ کرتی ہیں۔
اگر آپ اپنے شعبے میں واقعی دلچسپی رکھتے ہیں اور آپ کو اپنی مہارتوں پر یقین ہے، تو آپ کو یہ دیکھنے کی ضرورت نہیں کہ آپ کہاں سے ڈگری لے رہے ہیں۔ آپ کی محنت اور مہارت آپ کو آگے لے جائے گی، لیکن اس کے لئے آپ کو غیر معمولی کارکردگی دکھانے کی ضرورت ہوگی۔
آج کے دور میں، جب طلباء اپنے کیریئر کا فیصلہ کر رہے ہیں، تو انہیں یہ سوچنے کی ضرورت ہے کہ ان کا مقصد کیا ہے۔ اگر آپ کا مقصد صرف ایک اچھی ملازمت حاصل کرنا ہے، تو بہتر ہو گا کہ آپ کسی اچھی یونیورسٹی سے ڈگری حاصل کریں، چاہے کورس کمزور ہو۔ لیکن اگر آپ اپنے شعبے کے بارے میں پرجوش ہیں اور آپ کو اپنی صلاحیتوں پر یقین ہے، تو پھر آپ کسی بھی ادارے سے تعلیم حاصل کر سکتے ہیں۔
طلباء کو اپنے مستقبل کا فیصلہ بہت سوچ سمجھ کر کرنا چاہیے۔ یہ فیصلہ صرف ایک ڈگری یا یونیورسٹی کا نہیں ہے، بلکہ آپ کے پورے کیریئر کا ہے۔ اپنے مقصد کو سامنے رکھیں اور پھر فیصلہ کریں کہ آپ کے لئے کیا بہتر ہے۔
- شعور بغیر جرات کے اور علم بغیر عمل کے بیکار ہے - 23/09/2024
- ملازمت پیشہ افراد کو کاروبار کے لئے بچت کی سوچ اپنانا ہو گی - 20/09/2024
- مارکیٹ سے گاہک غائب یا حکمت عملی کمزور؟ - 16/09/2024
Facebook Comments - Accept Cookies to Enable FB Comments (See Footer).