خیبر میڈیکل کالج پشاور میں داخلے کی کہانی

مجھے ایک دن اپنے نوجوانی کے دوست اور خیبر میڈیکل کالج کے کلاس فیلو ڈاکٹر لقمان کا فون آیا۔ کہنے لگے آپ دسمبر دو ہزار چوبیس میں پشاور آئیں تا کہ میڈیکل کالج کے ہم جماعتوں کی گولڈن جوبلی کے جشن میں شریک ہو سکیں۔ میں نے عرض کی کہ میں اسی سال مارچ میں پاکستان آیا تھا اگر مجھے اس جشن کا پہلے پتہ ہوتا تو میں اپنے پروگرام کو بدل لیتا۔

ڈاکٹر لقمان سے میں نے معذرت کی لیکن پھر میں سوچنے لگا کہ میں انیس سو چوہتر کا گریجوئیٹ ہوں اور مجھے ڈاکٹر بنے پچاس برس ہو گئے ہیں یعنی یہ

نصف صدی کا قصہ ہے دو چار برس کی بات نہیں
ڈاکٹر لقمان سے گفتگو کے بعد میرے ذہن کی سکرین پر ماضی کے بہت سے واقعات ایک فلم کی طرح چلنے لگے
کچھ خوشی کے واقعات کچھ غمی کے واقعات
کچھ دکھی کرنے والے اور کچھ سکھی کرنے والے واقعات
چند واقعات کو سوچ کر چہرے پر مسکراہٹ پھیل گئی
کچھ واقعات کو سوچ کر آنکھوں میں آنسو آ گئے
یوں محسوس ہوا جیسے وہ سب زندگی کی آزمائشیں تھیں
خوش بختی کی بات یہ ہوئی کہ میں ان میں سرخ رو رہا۔

میری زندگی میں بہت سے محسن آئے جو مجھ پر بہت مہربان رہے۔ میں ان سب آزمائشوں اور ان سب محسنوں کا تہہ دل سے شکر گزار ہوں کیونکہ ان سب نے میری زندگی اور میری شخصیت کی تعمیر میں ایک مثبت کردار ادا کیا۔

سب سے پہلی آزمائش جو مجھے یاد آئی وہ میرا خیبر میڈیکل کالج پشاور میں داخلہ تھا۔ اگر مجھے وہ داخلہ نہ ملتا تو نہ تو میں ڈاکٹر بنتا اور نہ ہی پچاس برس بعد مجھے ڈاکٹر لقمان کا فون آتا اور نہ ہی خیبر میڈیکل کالج پشاور کی گولڈن جوبلی میں شرکت کی دعوت آتی۔ آئیے آپ بھی اس آزمائش کی کہانی سن لیں۔

جب میں نے پشاور کے ایڈورڈز کالج سے ایف ایس سی کا امتحان پاس کیا تو میں بہت خوش تھا کہ میری پوزیشن صوبے میں بیسویں تھی اور خیبر میڈیکل کالج میں سیٹیں ایک سو تھیں اس لیے مجھے پورا یقین تھا کہ مجھے میڈیکل کالج میں داخلہ مل جائے گا اور ایک دن میں ڈاکٹر بن جاؤں گا لیکن جب میں نے داخلے کے لیے درخواست دی تو مجھے بتایا گیا کہ مجھے صرف اس صورت میں داخلہ مل سکتا ہے اگر میرا پشاور کا ڈومیسائل ہو۔

ایک دن میں ڈپٹی کمشنر کے دفتر گیا اور ڈومیسائل سرٹیفیکیٹ کی درخواست لے کر آیا۔ درخواست پر کی تو پتہ چلا کہ اس پر ایک جج کے دستخط کی بھی ضرورت ہے۔ میں چونکہ کسی جج کو نہیں جانتا تھا اس لیے ایک صبح میں مقامی کچہری چلا گیا۔ اس دن وہاں چار عدالتیں لگی ہوئی تھیں جن میں چار جج کام کر رہے تھے۔ میں ایک جج کی عدالت کے دروازے پر کھڑا ہو گیا۔ تین گھنٹے کے بعد جب عدالت ختم ہوئی تو جج نے مجھے بلا کر وہاں کھڑے ہونے کی وجہ پوچھی۔ میں نے انہیں بتایا کہ میرے ایف ایس سی میں بہت اچھے نمبر آئے ہیں۔ میں ڈاکٹر بننا چاہتا ہوں جس کے لیے مجھے ڈومیسائل سرٹیفیکیٹ چاہیے اور اس کے لیے درخواست پر ایک جج کے دستخط۔

جج کہنے لگے کہ یہاں تو چار جج ہیں آپ میرے پاس کیوں آئے؟
میں نے کہا میں نے چاروں ججوں کو دور سے دیکھا۔ آپ سب سے زیادہ مہربان دکھائی دیے۔
جج مسکرائے اور میری درخواست پر دستخط کر دیے۔
جج کے دستخط اور ڈومیسائل ملنے کے باوجود مجھے میڈیکل کالج میں داخلہ نہ ملا۔
زندگی میں پہلی بار میں اداس و مغموم ہو گیا۔

اپنا دل بہلانے میں پشاور سے لاہور اپنی نانی اماں سے ملنے چلا گیا۔ ایک دن میں اپنے علا الدین ماموں سے ملنے پرانی انارکلی گیا تو میری انکل سعید سے ملاقات ہوئی جو ہمیشہ مجھ سے بہت شفقت سے پیش آتے۔ انہوں نے میرا حال پوچھا تو میں نے انہیں اپنی ساری دکھ بھری بپتا سنا دی۔ کہنے لگے سہیل بیٹا کل تم میرے دفتر آؤ۔

اگلے دن میں ان کے دفتر گیا تو انہوں نے میری زندگی کی ساری کہانی سنی۔ کیسے میرے والدین نے امرتسر سے لاہور ہجرت کی۔ کیسے میرے والد گورنمنٹ کالج میں ریاضی پڑھانے کوہاٹ گئے اور کیسے ہم پشاور آئے۔ پھر انہوں نے ایک پانچ صفحوں کا خط اپنے بڑے لیگل پیپر پر لکھا۔ پھر اس خط کی

ایک کاپی میڈیکل کالج کے پرنسپل کو
ایک کاپی پشاور یونیورسٹی کے وائس چانسلر کو اور
ایک کاپی صوبہ سرحد کے گورنر کو بھیجی۔

حسنِ اتفاق کہ ان دنوں ایر مارشل نور خان صوبہ سرحد کے گورنر تھے جو طلبا و طالبات کے بارے میں اپنے دل میں نرم گوشہ رکھتے تھے۔ انہوں نے ایک سپیشل کمیٹی مقرر کی میرے والد عبدالباسط صاحب کا انٹرویو لیا اور مجھے میڈیکل کالج میں داخلہ دلوا دیا۔

میں نے انکل سعید کا شکریہ ادا کیا۔

اگر انکل سعید مجھے میرے انسانی حقوق سے آگاہ نہ کرتے تو نہ تو میں ڈاکٹر بنتا نہ ہی ماہرِ نفسیات اور نہ ہی دکھی انسانیت کی خدمت کر پاتا۔

انکل سعید ان لوگوں میں سے تھے جو دوسروں کی بے لوث خدمت کرتے تھے۔ وہ میرے محسنوں میں سے ایک ہیں۔ میں نے ان سے بہت کچھ سیکھا۔