ہم جہاں تھے وہیں کھڑے رہ گئے

ہمارے ذہنوں کو نہ جانے کیوں یہ سوال شدت سے مضطرب نہیں کرتا کہ پچھلی ایک دہائی کے دوران ہم اپنے دوست ملکوں سے اتنے دور کیوں ہو گئے ہیں؟ اس سوال کا جواب تلاش کرنے سے ہم کتراتے ہیں۔ شاید اس لیے کہ ایسا کرنے سے آشکار ہونے والی حقیقت ہمارے لیے انتہائی تکلیف دہ ہو گی۔

ہم ہمیشہ کی طرح، اپنے دوستوں کی محبت کا دم آج بھی بھرتے ہیں، دیدہ و دل فرش راہ کیے ان کے منتظر رہتے ہیں، کون سا حکم ہے جس کی تعمیل میں کوتاہی ہوئی؟ پہلے بن کہے نوازشوں کی بارش تھی، اب بار بار کہنے پر کرم کی نظر ہوتی ہے۔ ہم سے آخر ایسی کیا خطا ہوئی کہ رشتوں میں پہلے جیسی گرم جوشی نہ رہی؟

جذباتی خود کلامی کی اس کیفیت سے نکل کر معروضی انداز سے غور کریں تو معلوم ہو گا کہ ہمارے دوست بدلے ہیں نہ انہوں نے ہم سے تعلق قطع کیا ہے۔ اصل حقیقت یہ ہے کہ عالمی ارتقائی عمل میں جب نئے حالات سے ہم آہنگ ہونے کا مرحلہ آیا تو ہمارے دوست ملکوں نے وقت ضائع نہیں کیا اور اپنے اندر تبدیلی لانے کا عمل شروع کر دیا۔ ان کے برعکس، ہم تذبذب کا شکار رہے، کوئی فیصلہ نہ کر سکے اور وقت ہمارے دوستوں کو ساتھ لے کر آگے بڑھ گیا۔ اس تناظر میں ہم دور نہیں جاتے بلکہ اپنے آس پاس کے چند دوست ملکوں کا جائزہ لیتے ہیں۔

سعودی عرب سے ہمارا انتہائی گہرا دینی رشتہ ہے، ہر مشکل میں اس نے ہماری مدد کی اور آج بھی تعلق نبھانے کی رسم ادا کرنے کی کوششں کرتا ہے۔ تیل کی بے پناہ دولت سے مالا مال اس ملک کو بہ خوبی علم ہے اس کے پاس موجود خام تیل کے ذخائر تیزی سے ختم ہو رہے ہیں، موسمیاتی تبدیلی اور عالمی حدت میں اضافہ سنگین خطرہ بن گیا ہے لہٰذا کرہ ارض پر زندگی کو بچانے کے لیے تیل و گیس کا استعمال بتدریج ختم ہو جائے گا اور ماحول دوست توانائی اس کا متبادل بن جائے گی۔ سعودی عرب نے یہ تلخ حقیقت جان لی کہ مستقبل میں صرف تیل اور گیس کی آمدنی پر وہ اپنی موجودہ حیثیت برقرار نہیں رکھ سکے گا۔ اب اس کے پاس پیٹرول سے کمائے ڈالروں کی متنوع شعبوں میں سرمایہ کاری کے سوا کوئی اور راستہ نہیں تھا۔ اس ادراک کے بعد اس نے ایک لمحہ ضائع کیے بغیر خود کو بدلنے کا ایسا حیرت انگیز عمل شروع کر دیا جس پر دنیا چند لمحوں کے لیے سکتے میں آ گئی۔

سعودی ولی عہد، شہزادہ محمد بن سلمان نے چند برسوں میں اپنے ملک کی کایا پلٹ دی۔ انہوں نے انتہائی دور رس اصلاحات نافذ کیں، خواتین کو پہلے سے کہیں زیادہ حقوق دیے، انہیں معاشرے کے مرکزی دھارے میں شامل کیا، قدامت پرستی ترک کی اور عرب کے ثقافتی و تاریخی ورثے کو ترقی پسند اور جدید انداز میں اجاگر کیا جس سے سعودی عرب تجارت اور سیاحت کے لیے پرکشش ملک بن گیا۔

اپنے ملک کی معاشی ترقی چونکہ سعودی ولی عہد کی اولین ترجیح ہے لہٰذا انہوں نے نظریاتی، مسلکی اور سرد جنگ دور کی تلخیوں کو ختم کرنے کا دانش مندانہ فیصلہ کیا۔ امریکہ سے دوستانہ تعلقات برقرار رکھنے کے ساتھ چین و روس سے قربتیں بڑھائیں اور یہ جان لیا کہ اس وقت ہندوستان، سرمایہ کاری کے لیے بہترین ملک ہے، جہاں قوت خرید رکھنے والے کروڑوں صارفین کے علاوہ اعلیٰ مہارت کی حامل پیشہ ور افرادی قوت، بنیادی انفرا اسٹرکچر اور مشترکہ سرمایہ کاری کے لیے بہت بڑا کارپوریٹ سیکٹر بھی موجود ہے۔ انہوں نے ہندوستان کی خواہش کا انتظار نہیں کیا بلکہ خود پہل کرتے ہوئے دونوں ملکوں کے تعلقات کو تیزی سے گہری دوستی میں بدل دیا۔ ولی عہد محمد بن سلمان نے 2019 میں ہندوستان کا پہلا دورہ کیا، ہندوستانی وزیر اعظم نے پروٹوکول کے تقاضوں کو بالائے طاق رکھتے ہوئے ہوائی اڈے پر جا کر ان کا استقبال کیا۔ اس دورے میں سعودی ولی عہد نے دس کروڑ ڈالر کی سرمایہ کاری کے معاہدوں پر دستخط کیے۔ سعودی ولی عہد نے 2023 میں ہندوستان کا دوسرا دورہ کیا۔ نریندر مودی نے 2016 میں سعودی عرب کا پہلا دو روزہ دورہ کیا تھا۔ اس موقع پر انہیں سعودی عرب کا سب سے بڑا سول اعزاز ’شاہ عبدالعزیز ایوارڈ‘ عطا کیا گیا۔ ان دوروں کے بعد دونوں ملکوں کے درمیان اسٹراٹیجک تعلقات قائم ہو گئے، فوجی سربراہوں کی جانب سے دو طرفہ دورے کیے گئے، مشترکہ فوجی مشقوں کا آغاز ہوا اور فوجی تعلقات کو اگلی سطح پر لے جانے کے لیے، دفاعی تعاون کی کمیٹی قائم کی گئی۔ سعودی عرب، ہندوستان کا چوتھا بڑا تجارتی پارٹنر ہے، دونوں ملکوں کے درمیان 43 ارب سے زیادہ کی تجارت ہوتی ہے اور اس وقت سعودی عرب کی جانب سے اربوں ڈالر کی سرمایہ کاری کی جا رہی ہے۔

سعودی عرب نے اپنی خارجہ پالیسی میں بھی بنیادی تبدیلیاں کی ہیں، ایران اور اسرائیل سے کشیدگی بہت کم ہو چکی ہے، کشمیر کے حوالے سے بھی اس کا موقف بدلا ہے جسے اب وہ پاکستان اور ہندوستان کا دو طرفہ مسئلہ سمجھتا ہے۔ سعودی عرب نے اپنے ملک کے داخلی نظام اور بین الاقوامی تعلقات میں جو غیرمعمولی تبدیلیاں کی ہیں کیا چند برس قبل تک اس کا تصور ممکن تھا؟

ہمارا دوسرا اہم دوست ملک متحدہ عرب امارات ہے (یو اے ای) جس نے کمال تیز رفتاری سے عالمی حالات کے مطابق خود کو ڈھالنے کا مظاہرہ کیا ہے۔ یو اے ای کا وفاق برطانیہ کے جانے کے بعد 1971 میں وجود میں آیا تھا، یہ وہی سال تھا جب پاکستان دو ٹکڑے ہوا تھا۔ صرف نصف صدی پہلے، یو اے ای نے صفر سے ترقی کا آغاز کیا اور آج وہ عالمی تجارت اور سیاحت کا پرکشش مرکز بن چکا ہے۔ ترقی کے جدید ترین ترقی پیمانوں کے حوالے سے یورپ کا شاید کوئی ملک دبئی کا ہم پلہ ہو گا۔ یو اے ای کی آبادی ایک کروڑ دس لاکھ جب کہ 2024 میں یہاں کا دورہ کرنے والوں کی تعداد ایک کروڑ ستاسی لاکھ تھی۔ اس کی جی ڈی پی 500 ارب ڈالر سے زیادہ اور 24 کروڑ کے ہمارے ملک کی جی ڈی پی 374 ارب ڈالر ہے۔

متحدہ عرب امارات بین الاقوامی تعلقات میں مکمل غیر جانبداری کی پالیسی پر عمل پیرا ہے، وہ تمام تنازعات کے پرامن حل کا حامی ہے اور معاشی ترقی اس کی پہلی ترجیح ہے۔ اس پالیسی کے تحت اس نے اسرائیل کے ساتھ 2020 میں سفارتی رشتے قائم کیے اور اس سے آگے بڑھ کر 2022 میں اسرائیل سے آزاد تجارتی معاہدہ بھی کر لیا، اب ان کے شہری دونوں ملکوں کے درمیان ویزا کے بغیر آزادانہ سفر کر سکتے ہیں۔ یو اے ای نے بھی سعودی عرب کی طرح اپنی بین الاقوامی تجارت میں تیل پر انحصار کم کرنے کی حکمت عملی اپنائی جس کے تحت وہ تجارت اور سرمایہ کاری کی نئی منڈیاں تلاش کر رہا ہے۔ یو اے ای بڑی تیزی سے ابھرتی ہوئی ہندوستانی مارکیٹ میں داخل ہو رہا ہے جس کے نتیجے میں دونوں ملکوں کی دو طرفہ تجارت 83 ارب ڈالر تک پہنچ چکی ہے جسے دو سال میں 100 ارب ڈالر تک پہنچانے کا ہدف طے کیا گیا ہے۔ یو اے ای نے بھی ہندوستانی وزیر اعظم کو اپنے ملک کا اعلیٰ ترین سول اعزاز ’آرڈر آف زید‘ دیا ہے۔ ابوظہبی میں مغربی ایشیاء کا سب سے بڑا مندر تعمیر کرنے کی سہولت دے کر یو اے ای نے دنیا کو پیغام دیا ہے کہ وہ مذہبی امتیاز کے بغیر تمام مذاہب کا احترام کرتا ہے اور اس کے دروازے ہر ملک کے لیے کھلے ہیں۔

اکیسویں صدی کی جدید دنیا کا ایک کمال یہ بھی ہے کہ آبادی اور رقبے میں ایک بہت چھوٹا ملک بھی اپنے وسائل اور جغرافیائی محل وقوع کے دانش مندانہ استعمال سے عالمی سطح پر اپنی ساکھ اور حیثیت منوا سکتا ہے۔ قطر اس کی ایک روشن مثال ہے۔ قطر کا رقبہ صرف 4400 مربع میل اور آبادی 30 لاکھ سے کچھ زیادہ ہے۔ پیچیدہ مسلح تنازعات، شورش اور خانہ جنگیوں میں ملوث تمام اسٹیٹ اور نان اسٹیٹ فریق، ثالثی کے لیے قطر پر اعتبار کرتے ہیں۔ افغان جنگ میں پاکستان نے فرنٹ لائن اسٹیٹ کا کردار ادا کیا لیکن امریکہ اور طالبان کے درمیان ثالثی قطر نے کی۔ اسی طرح حماس، اسرائیل تنازع میں جنگ بندی اور یرغمالیوں کی رہائی کے مذاکرات میں بھی قطر اہم ثالث تھا۔ ثالثی میں سہولت کی غرض سے اس نے دوحہ میں طالبان اور حماس کے دفاتر قائم کیے۔ بین الاقوامی ساکھ میں اضافے سے قطر کو تجارتی اور سیاسی طور پر بہت فائدہ ہوا۔ قطر کے امیر شیخ تمیم بن حمد آل ثانی نے کچھ دنوں پہلے ہندوستان کا دورہ کیا جہاں حسب توقع ان کا شان دار استقبال کیا گیا۔ اس دورے میں تجارت کو دو گنا بڑھانے، دس ارب ڈالر کی فوری سرمایہ کاری اور اسٹراٹیجک تعلقات قائم کرنے کے اہم فیصلے کیے گئے۔

قطر گلف تعاون کونسل کا وہ پانچواں ملک ہے جس نے ہندوستان سے اسٹریٹجک رشتے استوار کیے ہیں۔ قطر نے ماضی قریب میں پاکستان کو نہایت کم قیمت پر ایل این جی کی فراہمی کا معاہدہ کیا تھا جسے حکومت کی تبدیلی کے بعد سیاسی مخالفین کو بدنام کرنے کے لیے ایک اسکینڈل بنا دیا گیا۔ اس طرز عمل سے دونوں ملکوں کے باہمی تعلقات پر منفی اثر پڑا جو تلافی کی سر توڑ کوششوں کے باوجود اب بھی باقی ہے۔ قطر کے بعد اومان بھی نئے عالمی حالات کے مطابق اپنی پالیسیاں تشکیل دے رہا ہے۔

ہمارا پڑوسی اور قریبی دوست، چین اپنے اندر تبدیلی لانے کی بے مثال صلاحیت رکھتا ہے۔ اس نے کم ترین وقت میں خود کو دنیا کی دوسری سب سے بڑی معاشی اور فوجی طاقت بنا کر اس صلاحیت کو ثابت کر دیا ہے جس کی تفصیل کے لیے الگ مضمون درکار ہے۔

یہ کہنا غلط نہ ہو گا کہ ہمارے دوست ملکوں نے بروقت دنیا کے ارتقائی عمل کی سمت کا درست اندازہ لگا لیا اور خطرات کی پرواہ نہ کرتے ہوئے اپنا رخ اس سمت کی جانب موڑ دیا۔ ہم نے اپنے دوستوں کے اس دانش مندانہ طرز عمل کی پیروی نہ کی لہٰذا وہ شاندار مستقبل کے نئے سفر پر روانہ ہو گئے اور ہم جہاں تھے وہیں کھڑے رہ گئے۔ اس وقت ہم، جمود، عالمی تنہائی اور معاشی زوال کی خطرناک صورت حال سے دوچار ہیں۔ ہمیں جلد یا بدیر کٹر نظریاتی اور سیاسی جکڑ بندیوں کو توڑ کر اس سمت جانا ہی ہو گا جہاں دنیا اور ہمارے دوست ملک جا رہے ہیں۔ عالمی تنہائی کے صحرا میں بے سمت بھٹکنے سے بہتر ہے کہ تاخیر کی قیمت چکا کر کے یہ مشکل کام کر لیا جائے۔