ہم احمدی کیوں ہیں؟ ایک چھوٹے بچے کا احمدی خلیفہ سے معصومانہ سوال

ایک وڈیو کلپ نظروں سے گزرا جس میں ایک چھوٹا سا احمدی بچہ اپنے خلیفہ سے ایک معصومانہ سا سوال پوچھ رہا ہے کہ ”ہم احمدی کیوں ہیں“ ؟

پہلے تو خلیفہ جی تھوڑا سا حیران ہوئے کہ بھلا یہ بھی کوئی سوال ہوا، پھر اسی سوال کو کچھ دیر تک تذبذب کی سی کیفیت میں چباتے رہے اور جواب کے نام پر بالکل وہی روایتی گگلی کروائی جو دوسرے مذاہب یا فرقوں کے علماء کرواتے ہیں، حالانکہ بالکل سیدھا سادہ سا سوال تھا اور جواب بھی دو سطری تھا لیکن کیا کریں روزی روٹی بھی تو چلانی ہے نا!

مذہبی علماء ایک سے ہی ہوتے ہیں، بس کیمرے اور جدید ٹیکنالوجی کی وجہ سے ان کے ساتھ بڑا ظلم ہوا ہے، شوق شوق میں کیمرے کے سامنے جلوہ افروز ہونا بعض اوقات خاصا پریشان کن ثابت ہوتا ہے، بالکل احمدی خلیفہ کی طرح جن کو ایک چھوٹے سے بچے نے کنفیوژن میں ڈال دیا اور وہ روایتی گھمن گھیریوں پر مجبور ہو گیا۔ کیمرے کی آنکھ نے ان کے تذبذب اور چہرے کے اتار چڑھاؤ کو بالکل واضح کر دیا۔

مذہبی فکر سے بنیادی سوالات تو یہی بنتے ہیں کہ جناب ہم جس گھر میں آنکھ کھولتے ہیں وہی ہمارا مذہب، فرقہ یا فلسفہ حیات کیوں بن جاتا ہے حالانکہ اسے اختیار کرنے میں ہماری رتی بھر بھی ذہنی ریاضت شامل نہیں ہوتی؟ جس فکر کو اختیار کرنے میں ہماری شعوری کوشش کا عمل دخل نہ ہو وہ فلسفہ کس حد تک ہمارے لیے معتبر ہو سکتا ہے؟ دنیا میں کتنے فیصد ایسے لوگ پائے جاتے ہیں جو بلوغت کو پہنچنے کے بعد اپنے پیدائشی مذہب یا فرقے پر غور و فکر کے بعد شعوری طور اسے قبول کرتے ہیں؟ دنیا بھر کے دیگر مذاہب کے علماء جنہوں نے اپنے اپنے مذہب کے مطابق زندگیاں بسر کیں، کتابیں لکھیں، مناظرے یا مباحثے کرتے رہے ان میں سے کتنے ایسے ہوں گے جنہوں نے اپنے آبائی مذہب کو ترک کیا ہو گا یا شعوری طور پر اپنے مذہب کو پڑھ کر اختیار کیا ہو گا؟

سوال یہ ہے کہ جو ہوا سو ہوا لیکن جو ہمارے موجودہ علماء کرام ہیں اگر وہ کسی اور مذہب میں پیدا ہوئے ہوتے تو بالکل موجودہ پوزیشن کی طرح دوسرے مذہب کا بھی کچھ اسی انداز میں دفاع نہ کر رہے ہوتے اور دنیا کو بتا رہے ہوتے کہ ہم ہی قادر مطلق کے چنیدہ ہیں، ہمارے پاس حتمی سچائی ہے اسی لیے ہم ہی وارثانِ جنت اور دوسرے جہنمی ہوں گے؟

مذہبی رہنما یہ دعوے تو کرتے رہتے ہیں کہ لوگ دھڑا دھڑ مذہب میں داخل ہو رہے ہیں لیکن یہ کبھی نہیں بتاتے کہ کتنے فیصد مذہب بیزار یا سرے سے تارک ہو رہے ہیں، جب سے روایتی فکر کو علم الکلام کے دائرے میں لاکر سائنس و فلسفہ کے پہناوے کے ساتھ مفکرین تجدید جاوید احمد غامدی، احمد جاوید، محمد دین جوہر اور ذاکر نائک نے منظرعام پر لانے کی کوشش کی ہے اسی قدر سوالات کا حجم بھی بڑھنے لگا ہے۔

منقول کو معقول کے دائرے میں داخل کرنے کی قیمت تو ادا کرنی پڑتی ہے، اگر مذہب کو سائنس اور فلسفے میں ملا کر پیش کریں گے تو پھر مفروضہ، سوال اور مسلسل تجربہ و تحقیق، قبول و رد کا عمل جو سائنس یا جدید فکر کا جزوِ لاینفک ہے کی قباحتوں یا چیلنجز سے محفوظ کیسے رہا جا سکے گا؟

جب آپ علم غیب کے ساتھ لوگوں کو ریشنیلٹی و شعور اور سوچ بچار بھی سکھائیں گے تو پھر اس کے آفٹر ایفکٹس سے بھی تو جھوجنا پڑے گا، اب ایسا تو نہیں ہو سکتا نا کہ سوال پوچھنے والے کو پابند کر دیا جائے کہ وہ فلاں سوال پوچھے اور فلاں نہ پوچھے۔

یا سوال خالصتاً ٹو دی پوائنٹ ہو اور آپ اسے روایتی راہداریوں میں الجھا کر بہلانے کی کوشش کریں، ظاہر ہے مذہب میں تو سر تسلیم خم و یقین کا سکہ چلتا ہے، جب آپ زبردستی مذہب میں سائنس و فلسفہ کا دخول کریں گے تو سوال کرنے والے کو بھی پھر ایک دائرے میں محدود رکھ کر سوال پوچھنے پر مجبور نہیں کیا جا سکتا، نئی نسل کے سامنے مختلف فکری زاویے کھول کر آپ انہیں ایک زاویے تک محدود رہنے کا حکم صادر نہیں کر سکتے۔