عاصمہ شیرازی پر الزامات: ویب سائٹ کا ڈی این ایس کیا ہوتا ہے اور کیا یہ کسی دوسرے ملک کی طرف جھکاؤ کی ترجمانی کرتا ہے؟
عماد خالق - بی بی سی اردو ڈاٹ کام، اسلام آباد
حالیہ دنوں میں پاکستان کے سوشل میڈیا پر چند ولاگرز اور سوشل میڈیا صارفین نے ملک کے چند صحافیوں کو نشانہ بناتے ہوئے یہ دعوے کیے ہیں کہ ان کا جھکاؤ پڑوسی ملک انڈیا کی جانب ہے اور جن ویب سائٹس پر یہ صحافی پاکستان میں میڈیا کی آزادی کے متعلق رائے دیتے ہیں وہ انڈیا سے چلائی جاتی ہیں۔
ان دعوؤں کا انحصار ایسے شواہد پر کیا گیا ہے جس میں بظاہر ایسا لگتا ہے کہ اب ویب سائٹس کی ہوسٹنگ یا ان کے سرورز پڑوسی ملک انڈیا میں ہیں۔
سوشل میڈیا پر صحافیوں کے خلاف کیا دعوے کیے گئے؟
حال ہی میں سوشل میڈیا پر مخدوم شہاب الدین نامی ایک ولاگر نے اپنی ویڈیو میں پاکستان کے معروف صحافیوں کو نشانہ بناتے ہوئے یہ دعویٰ کیا کہ پاکستان میں میڈیا کی آزادی کے نام پر انڈیا کے نیٹ ورکس چلائے جا رہے ہیں۔
شہاب الدین نامی اس ولاگر نے پاکستان میں آزادی صحافت کے حقوق کے لیے آواز اٹھانے والی ایک غیر سرکاری تنظیم فریڈم نیٹ ورک کی ویب سائٹ کے ڈی این ایس کو انڈیا میں موجود سرور سے منسلک ہونے کا دعویٰ کیا ہے۔
اس کے ساتھ ساتھ ہی خاتون صحافی عاصمہ شیرازی کو نشانہ بناتے ہوئے یہ دعویٰ کیا کہ فریڈم نیٹ ورک کی جس ویب سائٹ پر وہ پاکستان کے میڈیا پر پابندیوں کے متعلق لکھتی ہیں یا اس سے منسلک ہیں وہ ویب سائٹ انڈیا سے چلائی جا رہی ہے۔
تاہم اب شہاب الدین کے ناقدین بھی ان کی ویب سائٹ کے ڈی این ایس کو انڈیا میں موجود ایک سرور سے منسلک ہونے کے دعوے کرتے دکھائی دیتے ہیں۔
بی بی سی نے اس ضمن میں آئی ٹی ماہرین سے یہ جاننے کی کوشش کی کہ کسی بھی ویب سائٹ کا ڈی این ایس ہوتا کیا ہے، اس کی کسی ویب سائٹ کے لیے اہمیت کیا ہے اور کیا اس کا کس دوسرے ملک میں موجود سرور سے منسلک ہونا اس کی طرف جھکاؤ کی ترجمانی کرتا ہے۔
ڈومین نیم سسٹم (ڈی این ایس) کیا ہوتا ہے؟
پاکستان کی سافٹ ویر انڈسٹری کی نمائندہ تنظیم پاشا کی سینٹرل ایگزیکٹو کمیٹی کے رکن اور آٹی ٹی ماہر بدر خوشنود کا کہنا تھا کہ آسان الفاظ میں یہ کسی عام ویب سائٹ کے آسان ایڈریس کی میپنگ سروس ہے یعنی یہ ایڈریس ڈیجیٹل دنیا میں ویب سائٹ کو اس کے ڈیٹا سرور کے ساتھ منسلک کرتا ہے۔
ان کا کہنا تھا کہ انٹرنیٹ کی دنیا میں یہ فرنٹ اینڈ سرور نہیں ہوتا اور یہ عام صارف کو نظر نہیں آتا جس کا مطلب کا ہے کہ ایک عام صارف کو یہ علم نہیں ہوتا کہ اس کی ویب سائٹ کا ڈیٹا سرور کہاں ہے اور اس کو منسلک کرنے والا ڈیجیٹل ایڈریس یعنی ڈی این ایس کیا ہے۔
ان کا کہنا تھا کہ اب کلاؤڈ ٹیکنالوجی میں تو ایک ڈیٹا کمپنیز کے سرور دنیا کے مخلتف ممالک میں ہوتے ہیں تاکہ صارف جہاں سے بھی اپنی مطلوبہ ویب سائٹ کھولے تو اس کے سامنے وہ فوری طور پر لوڈ ہو سکے۔
اس کو آٹو ڈیجٹیل رؤٹنگ کہا جاتا ہے اور ایک ڈی این ایس کسی بھی کم لوڈ والے ڈیٹا سرور سے منسلک ہو کر مطلوبہ ویب سائٹ کو کھول دیتا ہے۔
ان کا کہنا تھا کہ عام الفاظ میں یہ کسی بھی ویب سائٹ کے لیے ایک پی او باکس نمبر کا کردار ادا کرتا ہے۔
ڈیجیٹل رائٹس کی تنظیم بائٹس فار آل کے شہزاد احمد کا کہنا ہے کہ انٹرنیٹ کا نظام جتنا سادہ ہے اتنا ہی پیچیدہ ہے۔دنیا میں انٹرنیٹ کے نظام کو قائم رکھنے کے لیے مختلف بین الاقوامی ادارے اور تنظیمیں کام کرتی ہیں۔
انٹرنیٹ کی دنیا میں عالمی سطح پر ویب سائٹ کے ڈی این ایس کو رجسٹر کرنے کے حوالے سے ایک ادارے انٹرنیٹ کنسورشیم آف نیمز اینڈ نمبرز ( آئی کین) کام کرتا ہے۔ یہ ادارہ عالمی سطح پر کام کرتا ہے اور پاکستان بھی اس کا رکن ہے۔
ان کا کہنا ہے کہ کسی بھی ویب سائٹ کے ٹیکنیکل ضوابط یہ ادارہ طے اور لاگو کرتا ہے۔ ان کے تحت مخلتف ویب سائٹ ہوسٹنگ سروس فراہم کرنے والی کمپنیاں کام کرتی ہیں۔ ان کا کہنا تھا کہ ڈی این ایس اس ڈیٹا سرور سے منسلک کرنا کا ایڈریس ہوتا ہے جہاں آپ کی ویب سائٹ کا ڈیٹا رکھا جاتا ہے۔
اگر مذکورہ بالا معلومات کا عملی مشاہدے کیا جائے تو پاکستان کے بیشتر میڈیا اداروں کی ویب سائٹس کے ڈی این ایس بھی امریکا میں موجود ایک ڈیٹا سرور سے منسلک ظاہر ہوتے ہیں۔
ڈی این ایس کا دوسرے ملک کے ڈیٹا سرور سے منسلک ہوناسیاسی جھکاؤ کی ترجمانی کرتا ہے؟
بدر خوشنود کا کہنا تھا کہ ’میرے خیال میں یہ کہنا بہت مشکل ہے کیونکہ یہ اس کا بہت کم امکان ہے کہ آپ اس کا تعلق سیاسی جھکاؤ سے جوڑ سکیں۔‘
ان کا کہنا تھا کہ کسی ویب سائٹ کے ڈی این ایس ایڈریس کا کسی دوسرے ملک کے ڈیٹا سرور سے منسلک ہونا کسی بھی قسم کی سیاسی جھکاؤ کی ترجمانی نہیں کر سکتا۔
ان کا کہنا تھا کہ دنیا کی بڑی ڈیجیٹل کمپنیوں کے ڈیٹا سرور دنیا کے مخلتف ممالک میں موجود ہیں۔ جیسا کے ڈیجیٹل اوشن ڈیٹا سرور کمپنی ایک امریکن کمپنی ہے اور اس کا صدر دفتر نیویارک میں ہے۔ یہ دنیا میں کلاؤڈ سروس فراہم کرتے ہیں اور ان کے ڈیٹا سرور دنیا میں بہت سے ممالک میں ہیں۔
بدر خوشنود کا کہنا تھا کہ ڈیجیٹل ورلڈ میں تیزی سے ترقی آنے کے بعد اب دنیا بھر میں ایمازون، مائیکروسافٹ سمیت دنیا کی بڑی کمپنیاں اب نیٹ ورک اوپٹیمائزیشن کا طریقہ کار اپنائے ہوئے ہیں۔
یہ بھی پڑھیے
پاکستان مخالف پروپیگنڈا، انڈین نیٹ ورک بے نقاب
برسوں سے پاکستان کے خلاف ہرزہ آرائی کرتے گمراہ کن خبروں کے انڈیا نواز نیٹ ورک کا انکشاف
درجنوں پاکستانی فیس بک اکاؤنٹس ’مشتبہ سرگرمیوں‘ کے الزام میں بند
یعنی اب یہ کمپنیاں یہ جانچتی ہیں کہ کسی ویب سائٹ کی ٹریفک کہاں سے زیادہ آ رہی ہے اس کے حساب سے وہ ویب سائٹ کی لوکیشن اور ڈی این ایس کو اپ ڈیٹ کرتے رہتے ہیں اور اس خطے میں قریب ترین موجود ڈیٹا سرور سے منسلک کرتے ہیں تاکہ کسی بھی صارف کے موبائل یا کمپیوٹر پر مطلوبہ ویب سائٹ جلد از جلد کھل جائے۔
لہذا اس ٹیکنالوجی کے طریقہ کار میں اس بات کا امکان بہت کم ہے کہ آپ کسی بھی ویب سائٹ کے ڈیٹا سرور کے ساتھ منسلک ہونے کو کسی خاص ملک کی طرف جھکاؤ کا تعلق قائم کر سکیں۔
ان کا کہنا تھا کہ عام صارف کو ڈی این ایس کو ڈیٹا سرور سے منسلک کرنے کی سیٹنگز کا علم نہیں ہوتا یہ یہ ویب سائٹ ہوسٹنگ فراہم کرنے والی کمپنیاں کرتی ہیں۔
شہزاد احمد کا کہنا تھا کہ حالیہ دنوں میں سوشل میڈیا پر کسی ویب سائٹ کے ڈی این ایس ایڈریس کو لے کر جو باتیں سامنے آئی ہے وہ انتہائی مضحکہ خیز ہیں۔
’جس طرح سے انھیں ایک انویسٹیگیٹو جرنلزم کا نام دیا جا رہا ہے اس کو پڑھ کر صرف ہنسی آتی ہے۔ جس طریقے سے اسے سوشل میڈیا پر پھیلایا جا رہا ہے یہ انتہائی افسوسناک ہے کہ بنا کسی وجہ کے اشتعال پھیلایا جا رہا ہے، لوگوں کو بدنام کرنے کی کوشش کی جا رہی ہے، انھیں گالی گلوچ کا نشانہ بنایا جا رہا ہے۔‘
ان کا کہنا تھا کہ ’سادہ عوام تو یہ بات سمجھتے نہیں ہیں اور یہ بہت خوفناک ہے، کیونکہ انٹرنیٹ اس طریقے سے نہیں چلتا جیسے دعوے کیے جا رہے ہیں۔‘
ان کا کہنا تھا کہ جس طرح سے ڈیجیٹل اوشن کے بارے میں کہا گیا کہ اس کا ڈیٹا سرور انڈیا سے چلتا ہے اس کا قطعاً یہ مطلب نہیں کہ وہ صرف انڈین کمپنی ہے، اس کے دنیا بھر میں کئی ڈیٹا سرورز موجود ہیں۔
ان کا کہنا تھا کہ کسی بھی ڈیٹا سرور تک دنیا میں کہیں سے بھی رسائی حاصل کی جا سکتی ہے اور اس کا کسی سیاسی ایجنڈے یا اس ملک کی طرف جھکاؤ سے کوئی تعلق نہیں ہوتا۔
ان کاکہنا تھا کہ ایک ہی سرور پروائڈر ایک سے زیادہ ڈیٹا سرورز رکھتے ہیں اور جہاں سے انھیں لگتا ہے کہ وہ مطلوبہ ویب سائٹ کو قریب ترین سرور سے منسلک کر کے صارف کے لیے تیز سروس فراہم کر سکتے ہیں وہ اسے منسلک کر دیتے ہیں۔
ان کا کہنا تھا کہ ‘ہم عموماً لوگوں کو مشورہ دیتے ہیں کہ آپ آئس لینڈ یا دیگر یورپی ممالک میں رکھے گئے ڈیٹا سرورز سے اپنی ویب سائٹ کو منسلک کریں کیونکہ ان کی ڈیٹا پرائیویسی کے قوانین و ضوابط بہت اچھے اور صارف کی حق میں ہیں۔’
شہزاد احمد بھی اس بات سے اتفاق کرتے ہیں کہ ایک عام صارف کو اس بارے میں علم نہیں ہوتا کہ ان کی ویب سائٹ سے منسلک ڈیٹا سرور کس ملک میں موجود ہے۔
سوشل میڈیا پر ردعمل
مخدوم شہاب الدین کی جانب سے صحافی عاصمہ شیرازی کو نشانے بناتے ہوئے ان کے انڈیا کے ساتھ روابط اور فریڈم نیٹ ورک کی ویب سائٹ کے سرور کی انڈیا میں موجودگی کے دعوؤں کے بعد سوشل میڈیا صارفین بھی اس بارے میں اپنے رائے اور تبصروں کا اظہار کر رہے ہیں۔
آصف جوئیہ نامی ایک ٹوئٹر صارف نے مخدوم شہاب الدین کے دعوے کو غلط قرار دیتے ہوئے لکھا ’میں عاصمہ شیرازی کا مداح نہیں ہو نا ہی ملک میں لفافہ صحافیوں کو پسند کرتا ہوں۔ میں ایک سائبر سکیورٹی ماہر ہوں اور جو دعویٰ شہاب نے عاصمہ کے متعلق کیا ہے وہ درست نہیں ہے اور اسے جو معلومات ملی ہے اس نے اس کی غلط تشریح کی ہے۔ بتائی جانی والی ویب سائٹ کی ہوسٹنگ ڈیجیٹل اوشن نامی امریکی کمپنی کرتی ہے۔‘
جبکہ مخدوم شہاب الدین کو ان کی تحقیقاتی صحافت پر خراج تحسین پیش کرتے ہوئے ایک صارف نے لکھا ’ اس کو تحقیقاتی صحافت کہتے ہیں، شہاب کا بہترین کام۔‘
جبکہ ایک اور صارف نے شہاب کے دعوؤں پر کچھ اس طرح طنز کیا۔
جبکہ ایک اور صارف نے بھی شہاب کے دعوے کو غلط قرار دیتے ہوئے ٹویٹ کیا کہ ’عاصمہ شیرازی کے متعلق تمام دعوے ڈرامائی ہیں کیونکہ اگر آپ ویب سائٹ کی ڈومین رجسٹری میں جائیں تو یہ واضح ہے کہ یہ ڈومین پاکستان میں رجسٹر ہوئی اور اسے پرائیویسی کے لیے سنہ 2018 میں ماسکنگ کے لیے منتخب کیا۔‘
- کیا آئی پی ایل میں ’بے رحمانہ‘ بلے بازی کرکٹ کو ہمیشہ کے لیے بدل رہی ہے؟ - 25/04/2024
- مریم نواز اور پنجاب پولیس کی وردی:’کیا وزیراعلیٰ بہاولنگر کے تھانے کا دورہ بھی کریں گی؟‘ - 25/04/2024
- غزہ کی اجتماعی قبروں میں لاپتہ اہلخانہ کی تلاش: ’ہم اس بات کی اجازت نہیں دے سکتے کہ یہ چھوٹا سا معاملہ بن کر دب جائے‘ - 25/04/2024
Facebook Comments - Accept Cookies to Enable FB Comments (See Footer).