’فخر کو ون ڈے سکواڈ میں شامل کریں ورنہ ہم پی سی بی ہیڈکوارٹر آ رہے ہیں‘

پاکستان کرکٹ بورڈ (پی سی بی) کی عبوری سلیکشن کمیٹی نے نیوزی لینڈ کے خلاف ون ڈے سیریز کے لیے پاکستان کے 22 ممکنہ کھلاڑیوں پر مشتمل سکواڈ کا اعلان کر دیا گیا۔

پی سی بی کی جانب سے جاری اعلامیے میں کہا گیا ہے کہ سلیکٹرز ٹیسٹ کے بعد شروع ہونے والی ایک روزہ سیریز کے لیے 16 رکنی حتمی سکواڈ کا اعلان نیوزی لینڈ کے خلاف دوسرے ٹیسٹ میچ کے دوران کریں گے۔

واضح رہے کہ پاکستان اور نیوزی لینڈ کے درمیان ون ڈے میچز نو،11 اور 13 جنوری کو کراچی میں کھیلے جائیں گے۔

سلیکشن کمیٹی کی جانب سے ممکنہ 22 کھلاڑیوں کی فہرست میں نئے ٹیلنٹ کو موقع فراہم کرتے ہوئے چھ ایسے کھلاڑیوں کو بھی شامل کیا گیا ہے جنھوں نے اب تک ون ڈے انٹرنیشنل میں ڈیبیو نہیں کیا۔ ان میں ابرار احمد، عامر جمال، احسان اللہ، کامران غلام، قاسم اکرم اور طیب طاہر شامل ہیں۔

جبکہ اعلان کردہ ابتدائی سکواڈ میں بابر اعظم، محمد رضوان، عبداللہ شفیق، حارث رؤف، حسن علی، امام الحق، محمد حارث، محمد نواز، محمد وسیم جونیئر، نسیم شاہ، سلمان علی آغا، شاداب خان، شاہنواز دھانی، شان مسعود، شرجیل خان، اور محمد حسنین شامل ہیں۔

اس ون ڈے سیریز میں جگہ بنانے والے شرجیل خان نے جنوری 2017 میں اپنا آخری ایک روزہ میچ کھیلا تھا۔

پاکستان کے پیسر شاہین شاہ آفریدی زخمی ہونے کی وجہ سے سکواڈ میں شامل نہیں ہو سکے۔

https://twitter.com/TheRealPCBMedia/status/1608157736784494592

پاکستان کرکٹ بورڈ (پی سی بی) جو پہلے ہی گذشتہ چند ہفتوں سے انتظامی ڈھانچے میں تبدیلی، سابق چیئرمین رمیز راجا کی عہدے سے برطرفی و الزامات، شاہد آفریدی کے چیف سلیکٹرز بننے پر تحفظات سے تنازعات کا شکار اور خبروں کی شہ سرخیوں میں ہے۔

مگر عبوری سلیکشن کمیٹی کی جانب سے 22 رکنی ممکنہ کھلاڑیوں کی فہرست آنے کے بعد تو جیسے اسے سوشل میڈیا پر امریکی طوفان ’بم سائیکلون‘ کا سامنا کرنا پڑا ہو۔

کیونکہ پاکستانی سوشل میڈیا صارفین کی جانب سے اس ممکنہ 22 رکنی سکواڈ کے نام سامنے آنے پر شدید ردعمل دیا جا رہا ہے۔

اس کی ایک وجہ اس سکواڈ میں فخر زمان، خوشدل شاہ اور افتخار احمد کو شامل نہ کیے جانا ہے۔

کوئی اسے عبوری سلیکشن کمیٹی پر’میڈیا کا دباؤ‘ قرار دے رہا ہے تو کوئی چیف سلیکٹر شاہد آفریدی کی جانب سے فخر زمان، خوشدل شاہ اور افتخار کو شامل نہ کیے جانے کے فیصلے کو سمجھ سے بالاتر قرار دے رہا ہے۔

https://twitter.com/aM_MirzaZaid/status/1608261683428089856

ایک صارف نے اس سلیکشن پر ردعمل دیتے ہوئے لکھا کہ ’ کوئی ٹیم بھی فخر جیسے کھلاڑی جس کی ون ڈے اوسط 45 اور سٹرائک ریٹ 93 ہو کو ڈراپ کرنے کا سوچ نہیں سکتی۔

’شاہد آفریدی یہ آپ کی طرف سے عجب و غریب سلیکشن کی گئی ہے۔‘

https://twitter.com/Shah_fizza4/status/1608159245001785345

مشاہد نامی ایک صارف نے بھی ایسا ہی تبصرہ کرتے ہوئے لکھا کہ ’فخر ون ڈے رینکنگ کا حصہ ہیں، ہمارا ٹاپ آرڈر امام، فخر اور بابر کے ساتھ سیٹ ہو چکا ہے اور یہ تینوں بہترین ہیں۔

’یہ ہماری کرکٹ کی تاریخ میں سب سے بڑی غلطی ہے۔‘

https://twitter.com/mushahid345/status/1608162726919999493

سوشل میڈیا صارفین فخر زمان اور افتخار احمد کو 22 رکنی سکواڈ میں شامل نہ کرنے پر کافی ناراض دکھائی دیتے ہیں۔ خیال رہے کہ انجری کے باعث فخر ٹی ٹوئنٹی ورلڈ کپ سے بھی باہر رہے تھے۔

ایک اور صارف نے اس کا اظہار کرتے ہوئے لکھا کہ ’صرف فخر ہی ٹاپ آرڈر میں جارحانہ انداز میں کھیلنے والے بلے باز ہیں، آل راؤنڈر خوشدل اور افتخار بھی اچھی آپشن ہو سکتے تھے کیونکہ اگلا ورلڈکپ انڈیا میں ہے مگر ان کا ورلڈ کپ پلان میں شامل نہ ہونا میری سمجھ سے بالاتر ہے۔

’اور مجھے کوئی حیرت نہیں ہو گی اگر تجربے کی بنیاد پر وہاب اور عامر بھی اس ٹیم میں شامل ہو جائیں۔‘

https://twitter.com/MaazMubeen1/status/1608175199425335297

مگر جہاں بیشتر صارفین اس 22 رکنی سکواڈ پر تنقید کر رہے ہیں وہیں کچھ ایسے بھی ہیں جنھوں نے پی سی بی کی سلیکشن کمیٹی کے فیصلے کو سراہا ہے۔

یہ بھی پڑھیے

’مجھے میرا سامان بھی نہیں لینے دیا، ایسا لگا جیسے ایف آئی اے کا چھاپہ پڑ گیا‘

شاہد آفریدی کے پلان پر ’ویل ڈن لالا‘ کی گونج مگر دور اندیشی پر حیرت

علیم ڈار کو ریٹائر ہونے کے مشورے، ’ان کے فیصلوں کو بدلتا دیکھ کر تکلیف ہوتی ہے‘

https://twitter.com/WorldsCricketE1/status/1608167937013329920

ماجد نامی صارف نے تبصرہ کرتے ہوئے لکھا کہ ’مجموعی طور پر ایک کافی اچھا سکواڈ ہے، اور اب یہ انتطامیہ پر منحصر ہے کہ وہ پاکستان کپ میں دوسرے سب سے زیادہ رنز بنانے والے کامران غلام، ٹاپ وکٹ ٹیکر قاسم اور ڈومیسٹک سیزن کہ بہترین بولر احسان اللہ سے کیسے فائدہ اٹھاتے ہیں۔

’اور شرجیل کو پاور اٹیک کے لیے کیسے استعمال کرتے ہیں۔‘

چند صارفین تو نیوزی لینڈ کے خلاف اس اعلان کردہ سکواڈ کو قبول ہی نہیں کر رہے جیسا کہ ایک صارف نے لکھا کہ ’میرے خیال سے اس ٹیم کا اعلان زمبابوے کے خلاف کھیلنے کے لیے کیا گیا ہے۔

’نیوزی لینڈ کے خلاف ابھی اعلان ہونا ہے۔ شاہد بھائی تھوڑا خیال کریں۔۔۔فخر زمان جو ون ڈے کا اچھا کھلاڑی ہے اس کو موقع دیں۔‘

https://twitter.com/SaqlainAbbas32/status/1608188537626677249

مگر کچھ منچلے تو اس اعلان کردہ ناموں پر کچھ زیادہ ہی جذباتی ہو گئے ہیں اور پی سی بی کو دھمکانے کی کوشش کر رہے ہیں۔

ایک صارف نے پی سی بی کو دھمکاتے ہوئے لکھا کہ ’فخر اور افتخار کو شامل کریں ورنہ میں اور میری ٹائم لائن پر موجود تمام صارفین پی سی بی ہیڈکوارٹر آ رہے رہے۔‘

https://twitter.com/boysplayedwell0/status/1608156850918199298