پاکستان کے پہلے حکیم سعید کو تو اپریل 1971 ہی میں مارا جاچکا تھا

1979 میں جب میں یونیورسٹی کی تعلیم سے فارغ ہوا تو اُس وقت میری عمر بائیس سال تھی۔ میں مڈل کلاس گھرانے کا ایک ایسا نوجوان تھا جس کی آنکھوں میں آئندہ زندگی کے خوبصورت سپنے سجے ہوئے تھے کہ اب برسر روزگار ہو جانے کے بعد ایک خود مختار زندگی کا آغاز ہو گا بہرحال میں نے پہلی بار دفتر جانا شروع کیا تو شام کو پبلک بس سے گھر واپس جاتا تھا، وہ پبلک بس ”آرام باغ“ (جس کا نام تقسیم سے قبل رام باغ تھا) کے اسٹاپ پر کچھ دیر کے لیے رکتی تو میری نظر اکثر اس بورڈ پر پڑتی تھی جو سامنے سڑک کے کنارے ایک دکان پر آویزاں تھا اس بورڈ پر مجھے سب سے عجیب لفظ ”سادھنا اوشدھالیہ“ لگتا تھا۔ میری متجسس طبیعت نے اس کا کھوج لگا کر اس کی حقیقت اور تفصیل جانے کی کوشش شروع کردی، جس کے نتیجے میں ایک دلخراش خونچکاں داستان سامنے آئی۔ اس کہانی کے مظلوم ہیرو کا نام ہے ”جوگیش چندر گھوش“ جو متحدہ ہندوستان کی تقسیم سے کئی دہائیوں قبل یعنی 1887 میں ”برطانوی ہند“ کے شہر ڈھاکہ میں پیدا ہوئے تھے۔ آپ ایک اسکالر، آیور وید  پریکٹیشنر، کاروباری اور مخیر انسان تھے۔ جوگیش چندر گھوش نے 1908 میں صوبہ بہار کے شہر بھاگل پور کالج میں کیمسٹری کے پروفیسر کی حیثیت سے اپنے کیریئر کا آغاز کیا تھا۔

بھاگل پور میں گھوش نے ”آیوروید“ میں دلچسپی لینا شروع کر دی تھی۔ آیور ویدک علاج اور آیور ویدک دوائی تیار کرنے کے طریقہ میں کمال حاصل کیا۔ ”آیور وید“ بر صغیر کا ایک قدیم طبی نظام ہے۔ یہ نظام ہندوستان میں پانچ ہزار سال پہلے شروع ہوا تھا۔

لفظ آیور وید دو سنسکرت الفاظ ”آیوش، جس کے معنی زندگی ہے اور وید جس کا معنی علم ہے سے مل کر بنا ہے، اس لیے اس کے لغوی معنی ہیں“ زندگی کا علم ”۔ 1914 میں انہوں نے ڈھاکا میں“ سادھنا اوشدھالیہ ”کے نام سے ایک“ آیور ویدک دوائی اسٹور ”قائم کیا۔ سادھنا او شد ہا لیہ کی آیور ویدک دوائیں جلد ہی بہت مقبول ہو گئیں اور بنگال کے ساتھ ساتھ برطانوی ہند کے دوسرے حصوں میں بھی اس کی شاخیں کھول لی گئیں۔ اس کے علاوہ چین، شمالی امریکہ اور افریقہ میں بھی تقسیم کار ایجنسیاں قائم ہو گئیں۔ ایک وقت ایسا آیا کہ صرف بنگلہ دیش میں ان کی 68 شاخیں قائم ہو گئیں اور ان کی فارمیسی میں 450 اقسام کی دوائیں تیار کی جا رہی تھیں۔

جوگیش چندر گھوش ”لندن کی کیمیکل سوسائٹی (ایف سی ایس ) کے فیلو اور یو ایس کیمیکل سوسائٹی (ایم سی ایس ) کے ممبر بن گئے۔ انہوں نے بیماریوں کی وجوہات، آیور ویدک دوائی و علاج اور صحت کی سائنس پر متعدد کتابیں بھی لکھیں۔ انہوں نے جلد ہی آیور ویدک دوائیوں پر تحقیق اور تیاری کے لئے ایک کیمیاوی لیبارٹری بھی قائم کر لی۔

1914 میں قائم ہونے والی یہ لیبارٹری مشرقی بنگال میں سادھنا اوشدھالیہ اسٹور کی طرح اپنی نوعیت کی پہلی لیبارٹری تھی اور اس نے آیور ویدک دوائیوں کو فروغ دینے میں کئی دہائیوں تک شاندار خدمات سر انجام دیں۔ ان کی وسیع تر تحقیق اور مشق سے ہی دیگر ادویاتی نظاموں کے برعکس ”آیوروید“ بیماریوں کے علاج کے ساتھ ساتھ صحت مند طرز زندگی پر زیادہ دھیان مرکوز کرتا ہے۔ آیور وید علاج مکمل طور پر قدرتی جڑی بوٹیوں سے کیا جاتا ہے۔

ہندوستان 1947 میں تقسیم ہو گیا اور اس کے نتیجے میں ایک نیا ملک پاکستان وجود میں آیا جو دو خطوں پر مشتمل تھا۔ ان دونوں خطوں کے درمیان ایک ہزار میل کا فاصلہ تھا۔ پاکستان کا مشرقی خطہ مشرقی پاکستان کہلانے لگا اس کا صوبائی دارالحکومت ڈھاکہ تھا۔ جوگیش چندر گھوش ڈھاکہ میں ہی قیام پذیر تھے۔ لیکن آنے والی دو دہائیوں کے بعد پھر سے پاکستان کے دونوں خطوں کے درمیان تقسیم کا بھیانک عمل شروع ہوا اور اس نئی ہونے والی تقسیم کے دوران ہی ہماری کہانی کے اسکالر ہیرو کو ختم کر دیا گیا۔ واقعہ کچھ یوں ہے کہ 1971 میں بنگلا دیش کی جنگ آزادی کے آغاز کے ساتھ ہی ” فوج“ نے ڈھا کہ میں خاص طور پر ”ہندوؤں“ کی رہائش گاہوں پر چھاپہ مار کارروائیاں شروع کر دیں۔

”سادھنا اوشدھالیہ“ کے تمام ہندو ورکرز نے ہندوستان میں محفوظ پناہ کے لیے سرحد عبور کرلی اور فیکٹری کو چھوڑ دیا مگر ”جوگیش گھوش“ نے اپنی جنم بھومی کو چھوڑ نے سے انکار کر دیا اور تن تنہا اپنی اس بڑی فیکٹری میں رہنے لگے۔ چار اپریل 1971 کی صبح کو ”فوج“ کا ایک گروپ مقامی امن کمیٹی کے ایک ممبر کی سربراہی میں 71 دینا ناتھ سین روڈ، گندریہ ڈھا کہ میں سادھنا اوشد ہالیہ کی فیکٹری میں دفتر کی تلاشی لینے کے بہانے داخل ہوا۔ ان میں سے چار فوجیوں نے 48 سالہ ”جوگیش چندر“ کو اوپر کی منزل پر چلنے کو کہا، ساتھ ساتھ ان پر یہ الزام بھی لگایا گیا کہ انہوں نے ”آزادی پسندوں“ کو پناہ اور مدد بھی فراہم کی تھی اور یوں ان کو عمارت کی پہلی منزل پر ان کے اپنے چیمبر میں گولی مارکر ہلاک کر دیا گیا۔ چند گھنٹوں میں ہی ”سادھنا اوشدھالیہ“ کے دیگر اداروں سمیت پوری فیکٹری کو تباہ کر دیا گیا اور قیمتی سامان لوٹ لیا گیا۔

میں سوچتا ہوں کہ وہ عالم فاضل طبیب جس نے 1947 کے صد مے کو بھی جھیلا تھا لیکن ترک وطن کا خیال بھی کبھی دل میں نہیں لایا ہو گا کہ اسے اپنی اس زمین سے محبت تھی اور اسے اس طرح مار دیا گیا۔ وہ چاہتا تو آرام سے ترک وطن کر کے اپنی زندگی کو ان درندوں کے ہاتھوں قتل ہونے سے محفوظ بنا سکتا تھا۔ کبھی کبھی تو میں حیران بھی ہوتا ہوں اور پریشان بھی کہ عبدالکلام کو بھارت کا صدر بنا دیا جاتا ہے اور عبدالقدیر خان کو ہمارے یہاں بے عزت کیا جاتا ہے، یہاں پروفیسر ڈاکٹر ظفر عارف پراسرار حالات میں قتل کر دیے جاتے ہیں اور وہاں جامعہ ملیہ اسلامیہ یونیورسٹی کے وائس چانسلر ڈاکٹر ذاکر حسین کو بھارت کا صدر بنایا جاتا ہے۔ حکیم محمد سعید ہمارے ہی شہر کی ایک سڑک پر جیتے جاگتے انسان سے لاش بنا دیے جاتے ہیں اور بھارت میں ان کے بڑے بھائی ”حکیم عبد الحمید“ کو بھارت کے سب سے بڑے ایوارڈ ”پدم بھوشن“ سے نوازا جاتا ہے۔

آہ افسوس کہ یہاں پر جوگیش چندر جیسے با کمال عالم اپنے ہی ہم وطنوں کی طرف سے چلائی جانے والی گولیوں سے بھون دیے جاتے ہیں!