پاکستان میں انٹرنیٹ کی رفتار

پرانے زمانے میں طالب علم چراغ کی روشنی میں اپنا سبق یاد کرتے تھے۔ کاروباری معاملات قلم کے ذریعے لکھے جاتے تھے اور محفوظ کرلئے جاتے تھے۔ پھر زمانے نے کروٹ بدلی اور بجلی کی ایجاد سے سب سے پہلے روشنی کی ضرورت پوری ہو گئی اور پھر رفتہ رفتہ بجلی سے چلنے والے آلات ایجاد کئے گئے۔ جب ٹائپ رائٹر مشین ایجاد ہوا، جو بغیر بجلی سے چلتا تھا اور تحریر کی ضرورت کو کسی حد تک پورا کرتا تھا۔ آخرکار فوٹو سٹیٹ، لیبارٹریاں، ایکسرے، انجکشن، بے شمار ایجادات ممکن ہوئیں۔

ریڈیو، ٹیلی وژن اور کمپیوٹر کی ایجاد نے ایک طرف ابلاغ کی ضروریات پوری کردی تو دوسری طرف زندگی کی بے شمار دیگر ضروریات بھی پوری ہو گئیں۔ انٹرنیٹ کی ایجاد نے دنیا کو گلوبل ویلج بنا دیا اور رابطے کے ساتھ ساتھ تحقیق اور مطالعے کے لئے نئے راستے کھولے گئے۔ نئے نئے ویب سائٹس اور پروگرامنگ کے ذریعے اپنا ڈیٹا، معلومات اور معاملات کمپیوٹر کے ذریعے محفوظ کیے جانے لگے، جن تک رسائی کے لئے انٹرنیٹ کا سہارا لینا پڑا۔ دورِ جدید میں انسان کے لئے خوراک، ہوا اور پانی کے بعد سب سے بڑی ضرورت انٹرنیٹ بھی بن گیا ہے۔

ایسا لگ رہا ہے کہ انٹرنیٹ کے بغیر انسانی زندگی تاریک سے تاریک اور مشکل سے مشکل تر ہو جاتی جا رہی ہے۔ جب انٹر نیٹ بند ہوجاتا ہے تو جو کاروبار انٹر نیٹ کی بدولت ہوتے ہیں وہ بھی متاثر ہو جاتے ہیں اور دنیا سے رابطے منقطع ہو جاتے ہیں۔ موجودہ دور میں تجارت کے لئے انٹرنیٹ کا استعمال کیا جا رہا ہے اور بہت سے کاروباری لین دین اس کے ذریعے ہی ممکن کر دئے گئے ہیں۔ انٹرنیٹ کے اس بڑھتی ہوئی ضرورت کے پیش نظر دنیا کے ترقی یافتہ ممالک اس کو دور جدید کے چیلنجز کے مطابق بنانے کی کوشش کر رہے ہیں۔

ہم ابھی تھری جی اور فور جی کے پھیر سے نہیں نکلے ہیں کہ دنیا فائیو جی اور سیکس جی کے براڈ بینڈ اپنے عوام کو مہیا کر رہی ہے تاکہ ان کے طلبہ تحقیق اور مطالعے کے میدان میں آگے نکل جائے۔ دنیا کی ٹاپ کمپنیز اپنی مصنوعات انٹرنیٹ کے ذریعے دنیا کے کونے کونے تک پہنچا رہی ہیں اور انٹرنیٹ کے ذریعے اربوں ڈالر کما رہے ہیں۔ ان کا بچہ بچہ انٹرنیٹ کے ذریعے کمائی کرتا ہے اور دور جدید کے چیلنجز کا مقابلہ کرنے کی اہلیت رکھتا ہے کیونکہ ان کی ریاستوں نے ان کو مواقعے فراہم کیے ہیں۔

دوسری طرف وطن عزیز میں آئے دن انٹرنیٹ کی رفتار کم سے کم تر ہوتی جا رہی ہے۔ ارباب اختیار اپنی مصلحت کی خاطر عوام سے دیگر حقوق کی طرح یہ حق بھی چھین رہی ہے۔ سوشل میڈیا پر پابندی لگا کر وہ عوامی رابطوں کو منقطع کر رہے ہیں۔ ان کا خیال ہے کہ اس طرح کرنے سے عوام گوشہ جہالت میں چلے جائیں گے اور انہیں اظہار رائے کا موقع نہیں ملے گا۔ انٹرنیٹ کی موجودہ رفتار سے وطن عزیز کے تمام شعبہ ہائے زندگی تعطل اور جمود کا شکار ہیں۔

کاروبار بند پڑے ہیں۔ آن لائن کام کرنے والے تمام افراد انتہائی اذیت سے دوچار ہیں۔ ان کی آمدنی نہ ہونے کے برابر ہیں، جس سے وہ ذہنی اذیت میں مبتلا ہوچکے ہیں۔ تعلیمی میدان میں نئی تحقیق اور ترقی کی بجائے ہم تاریک دو رکی طرف چلے جا رہے ہیں۔ ہماری نئی نسل کے لئے نئے راستے بند پڑے ہیں اور وہ خود کو وطن عزیز میں غیر محفوظ سمجھ رہے ہیں کیونکہ ایسے حالات میں ان کا مستقبل خطرے سے دوچار ہے۔ ہم دیکھتے ہیں کہ ہمارے باصلاحیت اور قابل نوجوان وطن سے فرار ہی غنیمت سمجھتے ہیں۔

انٹرنیٹ کے بغیر انسانی زندگی ادھوری رہتی ہے کیونکہ یہ دور انٹرنیٹ کاہے اور انٹرنیٹ کے برق رفتار دور میں اپنے عوام کو تیز سے تیز تر انٹرنیٹ کی فراہمی حکومت کی ذمہ داری ہے۔ متعلقہ حکام اور اداروں کو اس ضمن میں کردار ادا کرنا چاہیے کہ عوام کو سوشل میڈیا تک رسائی کے لئے وی پی این اور دیگر غیر قانونی طریقوں کا استعمال نہ کرنا پڑے۔ دنیا کے ساتھ شانہ بشانہ چلنے کے لئے عوام کو سستا اور تیز ترین انٹرنیٹ کی فراہمی ناگزیر ہے۔ تیز انٹرنیٹ کے ذریعے ہماری نئی نسل تعلیم کے میدان میں ترقی کی منازل طے کر سکتی ہے اور ترقی کی دوڑ میں دنیا کی دیگر اقوام کے ساتھ شامل ہو سکتی ہے۔ ہمارا کاروباری طبقہ اپنی تجارت اور دیگر ضروریات انٹرنیٹ کے ذریعے پوری کر کے وطن عزیز کی معیشت کو بہتر بنا سکتے ہیں۔