عورتوں کو اور کتنے حقوق چاہئیں؟

اتنی زبان چلائے گی تو مار ہی کھائے گی۔ بیٹیوں کا اتنا بولنا اچھا نہیں ہوتا۔ اگلے گھر بھی جانا ہوتا ہے۔ یہ انفرادی نہیں اجتماعی سوچ ہے پاکستانی سماج کی۔ لیکن کسی سال کا بھی عورت مارچ ہو۔ وہاں مردوں کے حقوق کا رونا شروع ہو جاتا ہے۔ بھئی آپ مرد مارچ کر لیں۔ کسی اور نے مارچ کا انتظام کیا۔ عورتیں آئیں بات کی۔ آپ اپنے پلے کارڈ اٹھائے چل پڑے۔ ملاحظہ فرمائے پاکستانی مردوں کے بڑے بڑے مسائل۔

بریک اپ کے بعد مردوں کا کاٹنا بند کرو۔
شوگر ڈیڈی ڈھونڈنا بند کرو۔

شوگر ڈیڈی کی اصطلاح عام پنجابی عورت تو سمجھنے سے ہی قاصر ہے۔ لاہور، اسلام آباد یا کراچی پورا پاکستان نہیں ہے وجدان۔

دیہات کی عورت ازل سے فصل کی بوائی سے لے کر کٹائی تک ہر وہ کام کرتی ہے جو مرد کرتا ہے لیکن فصل کا پیسہ کس کو ملتا ہے۔ گھر کے مرد کو؟ کیوں۔ گھریلو کام کے لیے معاوضہ توبہ توبہ اپنے گھر کے کام کا بھی کوئی پیسہ لیتا ہے کیا۔ اپنے گھر کے کام میں جب پچیس کھانے والے اور پکانے والا دھونے والا صفائی والا ایک ہو تو معاوضہ تو بنتا ہے۔ عورت مارچ کی تاریخ پہ کچھ تو پڑھ لیں۔ کبھی تو اپنے ملک کی عام عورت کے شب و روز کی خبر لیجیے۔ ہر نیا دن ایک نئی اذیت لے کر طلوع ہوتا ہے۔ کل کا دن ہی لے لیں۔ سونے سے پہلے بی بی سی کی رپورٹ پڑھ لی۔ چکوال کی جبین بی بی جو چھبیس سال کی عمر میں مار دی گئی۔

پولیس جب تالہ توڑ کر اندر پہنچی تو شدید سردی میں کئی دن پہلے مر چکی جبین کی لاش اکڑی ہوئی ایک قمیض میں ملبوس پڑی تھی۔ اس کے جسم پہ کوئی اور لباس نا تھا۔ زمین پہ اس کی لاش کے اردگرد انسانی فضلہ تھا۔ پردے کی بدبو تھی کیونکہ اس علاقے میں پردے کا بہت رواج تھا۔ بچہ بچہ جانتا تھا کہ جبین ایک کمرے میں باندھ کر قید کی گئی ہے۔ کچھ لوگ سوکھی روٹیاں کھڑکی سے پھینک دیتے تھے جسے گھسٹ گھسٹ کر منہ سے چگ کر وہ زندہ تھی لیکن اس کا ہڈیوں کا ڈھانچہ وجود شاید سردی سے نا لڑ سکا۔ بھوک سے ہار گیا یا گندگی اسے کھا گئی۔ دو سال پہلے یہی جبین بالکل ٹھیک تھی لیکن باپ کے مرتے ہی اس کا برا وقت شروع ہو گیا۔ دو ہزار کنال زمین کا لالچ جبین کی جان لے گیا اور اتنی اذیت ناک موت جس میں آپ قطرہ قطرہ مر رہے ہیں آپ چیخنا چاہتے ہیں لیکن بھوک کی شدت نے قوتِ گویائی سلب کر لی ہے۔

کیا المیہ ہے کہ جائیداد کی خاطر امتیازی نمبروں سے بی ایس سی کرنے والی جبین کو اس کے اپنے ہی رشتے داروں نے مار دیا۔ آخر کیا حق چاہیے تھا اس عورت کو۔ زندہ رہنے کا؟ کھانے کا؟ ٹائیلٹ جانے کا؟ تعلیم حاصل کرنے کا؟ اپنا حقِ وراثت؟ لیکن یہاں تو سب عورتوں کو حقوق مل چکے ہیں تو کیوں یہ پاگل عورتیں ہر سال مارچ کرنے نکل پڑتی ہیں۔ این جی اوز کی اخلاق باختہ مادر پدر آزادی کی متلاشی گمراہ عورتیں۔ یہ وہ عورتیں ہیں جن کے باپ نے بھائی نے بیٹے نے شوہر نے ان کے پر نہیں کاٹے۔ زبان چلانے پر چپیڑیں نہیں ماریں۔ ان کو زندہ رہنے کا کھانے کا سوچنے کا جو حق ان کے گھر کے مردوں نے بن مانگے دیا وہ ہی حق وہ اس سماج سے مانگتی ہیں جبین کے لیے۔

لیکن واقعی اس مسئلے سے بڑا مسئلہ ہے مرد کا کٹ جانا۔ اور شوگر ڈیڈی سے پیسے اینٹھ لینا۔ اس پہ تو احتجاج بنتا ہے۔ کیونکہ شوگر ڈیڈی پندرہ سال کا چنا کاکا ہوتا ہے اس کے حقوق کا تحفظ ازحد ضروری ہے وجدان۔ ویوز سب کو ہی چاہئیں لیکن عورتوں کو یہ بھی حق دلانے کو بھی مارچ کرو کہ جس طرح انہیں پاکستان میں غیرت کے نام پہ کاٹ دیا جاتا ہے اور قانون بھی بے غیرت بن کر اسے پی جاتا ہے۔ عورت کو بھی اتنی آزادی دو کہ وہ بھی غیرت کا نام لے کر گھر کے مردوں کو کاٹ سکے۔ جہاں مرد کا ساری زندگی تیری ماں تیرا پیو تیری پیہن کا سیاپا نہیں مکتا۔ وہاں عورت کو بھی اتنا تو حق دو کہ وہ بھی مرد کی ماں بہن کر سکے۔ ورنہ یہ تماشا بند کرو کہ اس ملک میں عورت کو ہر وہ حق حاصل ہے جو مرد کے پاس ہے۔ کیونکہ واحد اشاریے جن میں پاکستان دن دگنی رات چگنی ترقی کر رہا ہے وہ ہے زچہ بچہ کے مرنے کی شرح اور صنفی امتیاز۔ باقی اپنے ویوز کا منجن بیچنا ہے تو کیا فرق پڑتا ہے ایک اور پاکستانی عورت مر گئی۔