دھرنے، دریائے سندھ اور وطن پرستی کا بیانیہ

سندھ میں دھرنے ہمیشہ سے متنازع منصوبوں کے خلاف احتجاج کی ایک نمایاں شکل رہے ہیں۔ حالیہ دھرنا بھی اس نظریہ کا ایک تسلسل ہیں۔ یہ تحریک اس وقت زور پکڑ گئی جب وفاقی حکومت نے دریائے سندھ سے چھ نئی نہریں نکالنے کا منصوبہ پیش کیا، جس پر ناقدین کا کہنا ہے کہ اس سے سندھ کے آبی وسائل اور زرعی شعبے کو شدید نقصان پہنچے گا۔

تاریخی طور پر سب سے پہلا تنازع تو اسی وقت سامنے آ گیا تھا جب بھارت اور پاکستان کے درمیان سندھ طاس معاہدہ کے تحت مغربی دریا (سندھ، جہلم، اور چناب) پاکستان کو دیے گئے جبکہ مشرقی دریا (راوی، بیاس، اور ستلج) بھارت کے حصے میں آئے۔

اس معاہدے نے پاکستان میں پانی کے نظم و نسق اور صوبوں کے درمیان تقسیم کی بنیاد رکھی۔ جس کے بعد پانی کی تقسیم کے حوالے سے صوبوں کے درمیان اختلافات سامنے آنا شروع ہوئے، خاص طور پر پنجاب اور سندھ کے درمیان۔ سندھ کا موقف تھا کہ پنجاب پانی کا حد سے زیادہ استعمال کر رہا ہے، جبکہ پنجاب کا کہنا تھا کہ زرعی ضروریات کی بنا پر اسے زیادہ پانی درکار ہے۔

اس سلسلے میں فریقین کے درمیان 1991 کا معاہدہ سامنے آیا جس کے تحت پانی کی صوبوں میں درج ذیل تقسیم کی گئی

پنجاب: 69 بی سی ایم (کل کا 48 %) ، سندھ: 60.14 بی سی ایم (کل کا 42 %) ، خیبر پختونخوا: 7 بی سی ایم (کل کا 5 %) ، بلوچستان: 3 بی سی ایم (کل کا 2 %)

تاہم، اس معاہدے میں پانی کی قلت یا ماحولیاتی بہاؤ کے کم از کم معیار کا کوئی ذکر نہیں تھا، جس کی وجہ سے صوبوں کے درمیان کشیدگی جاری رہی۔

سن 2000 سے اب تک کالا باغ ڈیم کی تعمیر ایک متنازعہ معاملہ رہا ہے، جس کی مخالفت سندھ اور خیبر پختونخوا کرتے رہے ہیں۔ ان کے خدشات میں پانی کی محرومی اور ماحولیاتی نقصان شامل ہیں۔ مزید یہ کہ پاکستان کو شدید پانی کی قلت کا سامنا ہے، جو موسمیاتی تبدیلی، آبادی میں اضافہ، اور ناقص پانی کے انتظام کی وجہ سے بڑھ رہی ہے۔ جبکہ پانی کی تقسیم کے حوالے سے اختلافات جاری ہیں۔

سندھ کا الزام ہے کہ پنجاب پانی چوری کر رہا ہے، جبکہ پنجاب کہتا ہے کہ اسے زرعی ضروریات کے لیے مزید پانی درکار ہے۔ پاکستان کا نظامِ تقسیمِ آب غیر موثر ہے، جس کی وجہ سے پانی کا بہت زیادہ ضیاع اور بین الصوبائی تنازعات پیدا ہو رہے ہیں۔

موسمیاتی تبدیلی پانی کی دستیابی کو متاثر کر رہی ہے، اور صوبوں کو نئے موسمی حالات کے مطابق خود کو ڈھالنے کے لئے تاحال کوئی موثر پلان نہیں ہے جبکہ کمزور طرزِ حکمرانی اور موثر اداروں کی کمی پانی کے بہتر نظم و نسق اور تنازعات کے حل میں رکاوٹ بن رہی ہے

خیرپور میں وکلا کا احتجاج جاری ہے جس سے سندھ اور پنجاب کے درمیان ٹریفک معطل ہو گئی، ان کا مطالبہ تھا کہ نہری منصوبہ منسوخ کیا جائے۔

سندھ کا موقف ہے کہ یہ منصوبہ سندھ میں پہلے سے موجود پانی کی قلت کو مزید سنگین کر دے گا، جس سے زراعت اور ماحولیات متاثر ہوں گے۔ مظاہرین کا دعویٰ ہے کہ یہ منصوبہ سندھ کے پانی کے حقوق کی خلاف ورزی ہے اور اس سے پنجاب کو فائدہ پہنچے گا جبکہ سندھ کے مفادات کو نقصان ہو گا۔

یہ امر بھی واضح رہے کہ پانی کی پہلے سے قلت کی وجہ سے دریائے سندھ کے ماحولیاتی نظام کو خطرہ لاحق ہے، نئی نہریں بنانے سے نہ صرف یہ شدت اختیار کرے گا بلکہ ان لوگوں کے روزگار بھی متاثر ہوں گے جو اس پر انحصار کرتے ہیں۔

مظاہرین کے مطالبات بالکل سلیس ہیں کہ یہ منصوبہ فوری طور پر منسوخ کیا جائے اور حکومت، سندھ کے آبی وسائل کے حقوق کو تسلیم کرے اور ان کا تحفظ کرے۔ مظاہرین پاکستان کے طاقتور حلقوں کی نگرانی میں کارپوریٹ فارمنگ کے خلاف بھی آواز اٹھا رہے ہیں اور اس کا فوری خاتمہ چاہتے ہیں۔

یہ تو تھی پانی کے مسئلے کی چیدہ چیدہ باتیں اب آتے ہیں حالیہ دھرنے پر جو کہ اس سے پہلے دیے گئے دھرنوں اور احتجاجات سے یکسر مختلف ہے۔

ایک مقامی ہونے کے لحاظ سے میں نے بچپن سے اب تک اپنے شہر خیرپور میں کئی ایک تحاریک کا بہت قریب سے مشاہدہ کیا ہے۔ 80 کی دہائی میں ایم آر ڈی ہو یا نئی صدی کے آغاز پر آئے آرڈی، پانی کے مسئلے پر تحاریک اور احتجاجات ہوں یا لسانی اور مذہبی فسادات ہوں سب دیکھا اور بہت قریب سے دیکھا۔

گزشتہ تمام تر تحاریک کا محور زیادہ تر سیاسی اور مذہبی جماعتیں رہی ہیں۔ خواہ وہ وفاق پسند ہوں یا قوم پرست، پر حالیہ دھرنا میری عمر کے افراد کے لئے ایک الگ تجربہ ہے۔ ہم آج اس سندھ کا آنکھوں سے مشاہدہ کر رہے ہیں جس کی رواداری، اخلاص اور دھرتی سے محبت کے قصے ہم نے سن رکھے تھے۔

یہ سندھ کا وہ فلیور ہے جس کی بات جب میں اسلام آباد میں بیٹھ کر کرتا تھا تو یار لوگ یقین نہیں کرتے تھے۔ پر تب بھی وہ یہ بات مانتے تھے کہ سندھی لوگ پاکستان کے باقی لوگوں سے زیادہ سیاسی شعور رکھتے ہیں۔ وہ پاکستان پیپلز پارٹی کو ووٹ دے کر گھر میں نہیں سو جاتے بلکہ اس کا محاسبہ بھی کرتے ہیں۔

کیا کہیں کوئی ایسا احتجاج دیکھا ہے جہاں مسلکی عناد پھیکا پڑ جائے اور مذہبی دیواروں کا کوئی وجود نہ ہو۔ ایک طرف شیعہ علما ہوں تو دوسری طرف سنی۔ کہیں سبیلیں لگی ہوں تو ساتھ میں صوفیانہ کلام۔ کیا موحد اور کیا ملحد، کیا ہندو کیا مسلمان سب یک زبان ہو کر دھرتی اور دریا کی بات کریں۔

جہاں لسانی منافرت منوں مٹی تلے دفن ہو چکی ہو اور سندھ کی تاریخ کا ایک بڑا اور موثر احتجاج کی پیشوائی ایک اردو اور پنجابی بولنے والا فرد کر رہا ہو۔ اور پھر بھی لوگ اس کے ساتھ ایک تصویر کھنچوانے کے لئے قطار میں کھڑے ہوں، اور اس کو اپنا ہیرو اور اپنا بیٹا کہہ رہے ہوں۔

جس تحریک میں دانشور، شعرا اور ادیب تو اپنا حصہ ڈالیں پر گدھا گاڑی والا اور مزدور بھی پیچھے نہ رہیں۔ لوگ اپنے اہل خانہ اور بچوں کو بھی ساتھ لائیں اور تپتے روڈ پر لگے اوون جیسے ٹینٹ کے نیچے ہاتھ والا پنکھا لیے بیٹھے ہوں۔

جی ہاں یہ سندھ ہے اور یہاں ایسا ہوتا ہے۔ یہ سندھ کا شعور ہی تھا جس کی کوکھ سے اس ملک نے جنم لیا۔ یہ وہ لوگ اپنی بات کرتے وقت بھی پنجاب کے ان غریب کسانوں کو نہیں بھولتے جن کے حصے کا پانی بنجر زمین کو آباد اور ان کی زرخیز زمین کو بنجر کرے گا۔ پر شاید کوئی پاکستان کو اتنا روادار اور متنوع دیکھنے کا متحمل نہیں۔

مجھے بس اتنا سمجھنا ہے کہ گرین انیشیٹو کے تحت کارپوریٹ فارمنگ، پہلے سے زرخیز زمینوں کو بنجر بنائے بغیر کیسے ممکن ہے جب پانی کی کمی پہلے سے سسٹم میں موجود ہے۔

سندھ کے ببرلو بائی پاس پر بیٹھے لوگ فقط سندھ کی زمین، ڈیلٹا اور دریا کی آبی حیات کا کیس نہیں لڑ رہے وہ پنجاب کے ان کسانوں کا کیس بھی لڑ رہے ہیں جن کے حصے کا پانی بنجر زمینوں کو الاٹ کیا جائے گا۔

اب کوئی سمجھائے کہ کیا یہ سوچ صوبائی عناد پر کھڑی ہے کسانوں کے پانی پر بنیادی حق کو مانا جائے اور پہلے سے زرخیز زمینوں کو بنجر بننے سے بچایا جائے؟ اور یہ کہ وطن پرستی آخر اور کیا ہے ِ؟ کیا صرف کچھ حلقون کے مفادات کا تحفظ ہی وطن پرستی ہے؟ کیا پاکستان کے کسان، اور دریا پر انحصار کرنے والی آبی حیات اور اس کے پانیون پر پلنے والے انسانوں کی فکر کرنا وطن پرستی نہیں ہے؟