عاطف اسلم کے گانے پر اعتراض: ’بھائی جو بھی ہو جائے۔۔۔انڈیا ہمیشہ آپ سے محبت کرے گا‘

سچ سچ بتائیے گا، آپ عاطف اسلم کے فین ہیں؟ اگر آپ نہیں بھی ہیں تو یہ تو ماننا پڑے گا کہ زیادہ تر لوگ ہیں۔ پاکستان میں بھی اور انڈیا میں بھی۔ نہیں؟ اچھا چلیں زیادہ تر نہیں تو کافی سارے تو ہیں ہی، ہے ناں؟

ویسے چاہے آپ فین ہوں یا نہ ہوں یہ تو پتا ہی ہوگا کہ وہ گذشتہ 24 گھنٹوں میں اچھے خاصے ٹرینڈ کرتے رہے ہیں۔ کہاں؟ ارے بھائی اور کہاں، ٹوئٹر پر! ایک نہیں، دو نہیں، تین نہیں، کئی کئی ٹرینڈز!

کیوں؟ چلیں بات شروع سے شروع کرتے ہیں۔ تو ہوا یوں کہ انڈین میوزک لیبل ٹی سیریز نے ہفتے کو اپنے یو ٹیوب چینل پر عاطف اسلم کا ایک گانا اپ لوڈ کر دیا۔ کون سا؟ دو ہزار انیس میں ریلیز ہونے والی فلم ’مرجاواں‘ کا گانا، ’کنا سونا‘۔

اب کچھ لوگوں کو یہ بالکل ’سونا‘ نہیں لگا، خاص طور پر مہاراشٹر نو نرمان سینا (ایم این ایس) کی چترپٹ سینا کے صدر امیا کھوپکر کو، جنہوں نے کہا کہ اگر ٹی سیریز نے گانا نہیں ہٹایا تو وہ ’بڑی کارروائی‘ کریں گے۔

پھر کیا تھا دیکھتے ہی دیکھتے #TakeDownAtifAslamSong ٹوئٹر پر ٹرینڈ کرنے لگا۔

اب آپ پوچھیں گے کہ لیکن کیوں۔ ایک تو آپ سوال بہت پوچھتے ہیں، اور سچ پوچھیں تو آپ کی یہی بات ہمیں بہت اچھی بھی لگتی ہے۔ آپ کے سوال اور ہمارے جواب!

خیر، وجہ یہ تھی کہ پلوامہ میں ہونے والے خودکش حملے کے بعد ایم این ایس نے میوزک کمپنیوں کو پاکستانی فنکاروں کے ساتھ کام کرنے سے منع کیا تھا۔ ساتھ ہی فیڈریشن آف ویسٹرن انڈیا سینے ایمپلویز اور آل انڈیا سینے ورکرز ایسوسیایشن دونوں ہی نے پاکستانی فنکاروں کے انڈیا میں کام کرنے پر پابندی لگا رکھی ہے۔

ٹوئٹر صارف شالینی نے ٹی سیریز کو ٹیگ کرتے ہوئے ٹویٹ کیا، ’کیا یہی آپ کی حب الوطنی ہے؟‘

اس طرح کے اور بھی بہت ٹویٹ شئیر ہوئے لیکن کچھ صارفین نے عاطف اسلم کا دفاع بھی کیا۔

شریس چندک نے لکھا کہ ’عاطف اسلم نے ہمیشہ بالی ود کو بہترین گانے دیے ہیں۔ وہ اپنے ملک کے اعمال کی قیمت کیوں چکائیں۔ ان کا گانا نہ ہٹائیں۔‘

لیکن کچھ لوگوں نے ایک سکرین شاٹ شئیر کیا جس میں پچھلے سال چھ اگست کو حج پر جانے سے پہلے عاطف اسلم نے اپنے ایک ٹویٹ میں کشمیر کے بارے میں بات کی تھی، اور اس وجہ سے ایم این ایس کے اس مطالبے کو صحیح قرار دیا۔

خیر بات بڑھتے بڑھتے انتی بڑھ گئی کہ آخر کار ٹی سیریز نے ایم این ایس کے سربراہ راج ٹھاکرے کو ایک خط لکھا جس میں انھوں نے گانا یو ٹیوب پر لگانے کو اپنی غلطی قرار دیا، معافی مانگی اور گانے کو ہٹا دیا۔

https://twitter.com/manaseit/status/1275724721506697222?s=20

ویسے تو بات یہاں تک پہنچ کر ختم ہو جانی چاہیے تھی لیکن کہانی میں ایک اور ٹوسٹ ہے۔ جہاں ایک طرف غداری اور پابندیوں کی باتیں ہو رہی تھیں وہیں دوسری طرف #IndiaLovesAtifAslam بھی ٹرینڈ کر رہا تھا۔

گنیش گرجر نے لکھا ’عاطف اسلم کی آواز کی جگہ کوئی نہیں لے سکتا۔ انھوں نے ہمیں کئی خوب صورت اور ناقابل فراموش گانے دیے ہیں۔ بھائی جو بھی ہو جائے، ہم آپ کے ساتھ ہیں۔ انڈیا ہمیشہ آپ سے محبت کرے گا، اور ہم ہمیشہ آپ کی حمایت کریں گے۔‘

چاہتے تو ہم آپ بھی یہی ہیں کہ محبتیں یاد رہیں، رنجشین فراموش ہوں، ہے ناں؟ واہ ویسے عاطف اسلم کے اگلے گانے کے لیے آئیڈیا اچھا ہے، نہیں؟