آہ! مولانا انیس احمد اصلاحی بھی رخصت ہو گئے

دور درشن، دہلی سے میرے دوست مالک اشتر نے فون کیا اور اطلاع دی کہ مولانا انیس احمد اصلاحی نہیں رہے۔ ظاہر ہے یقین کرنے والی بات نہیں تھی، لیکن دل کی جو کیفیت تھی، وہ بیان سے باہر ہے۔ بات ختم کرنے کے بعد انٹرنیٹ پر تحقیق کے لئے سرچ کیا تو حیرانی کی انتہا نہ رہی۔ مولانا سچ مچ نہیں رہے اور 22 اپریل 2021 کو انھوں نے داعیٔ اجل کو لبیک کہا۔ نہ جانے ہم کس عہد میں داخل ہو گئے ہیں جس میں اچھے لوگ مستقل رخصت ہوئے جاتے ہیں۔ یہ موت کی آندھی کتنے گلشنوں کو ویران کر دے گی، کچھ نہیں کہا جا سکتا۔

مولانا کے انتقال کی خبر سن کر جیسے دل ہی اچاٹ ہو گیا۔ ایسے تو ہر دن کسی نہ کسی کے مرنے کی خبر سینہ چیرے دے رہی ہے، مگر کچھ ایسے لوگ جن کی شفقت و محبت آپ پر سایہ فگن رہی ہو، دور ہو جائیں تو بڑی تکلیف ہوتی ہے۔ مولانا انیس احمد اصلاحی انہی لوگوں میں سے تھے۔ سادہ مزاج، قلندر صفت انسان۔ ان کے انتقال کی خبر سن کر نہ جانے کتنی باتیں یاد آئیں۔

مدرسۃ الاصلاح کا سنسان پڑا مہمان خانہ ہے۔ گرمیوں کا دن ہے، اکا دکا پرندے چیں چاں کرتے سامنے درختوں پر پھدک رہے ہیں، گئے زمانوں کا ایک بڑا سا پرانا پنکھا چھت پر ٹنگا ہے اور اپنے مریل انداز میں کھٹر کھٹر، کھٹر کھٹر چل رہا ہے۔ کھڑکیوں میں باہر خس کا ٹاٹ لگا ہے اور اس میں سے بھینی بھینی خوشبو آ رہی ہے۔ اندر ترتیب سے کچھ کرسیاں اور چار، پانچ چارپائیاں پڑی ہیں، ایک چارپائی پر مولانا لیٹے ہوئے ہیں۔ میں ایک افسانہ لئے مولانا کے پاس پہنچا ہوں کہ اصلاح فرما دیں۔ وہ کہہ رہے ہیں پڑھو اور ساتھ اصلاح کرتے جا رہے ہیں، ساتھ ہی الفاظ کی باریکیوں، نزاکتوں اور اس کی لطافتوں پر بھی اشارے کرتے جاتے ہیں۔

اس واقعہ کو برسوں بیت گئے لیکن مجھے ایسا لگ رہا ہے جیسے یہ کل ہی کی تو بات ہے۔ افسانہ مکمل ہوا تو مولانا نے کہا، اس میں کچھ چونکانے والی بات ہونی چاہیے۔ سنو! اس میں یہ اضافہ کرو۔ پھر استاذ نے خود دو تین سطروں کا آخر میں اضافہ کرایا، میں نے کہا ’عنوان کیا ہو‘ ؟ فرمایا ’ضمیر کی آواز‘ لکھ دو۔ میں نے وہ افسانہ ماہنامہ نور میں بھیج دیا۔ اتفاق سے وہ چھپ گیا۔ پہلی مرتبہ کسی تحریر کے چھپنے کی جو خوشی ہوتی ہے، میں اسے آج تک فراموش نہیں کر سکتا۔

مدرسۃ الاصلاح میں کئی اساتذہ بہت سخت گیرتھے، ان کی آنکھوں کی غضب ناکی ڈر پیدا کرتی اور اسی کو وہ اپنی شان سمجھتے۔ معمولی غلطی پر بھی وہ طلبہ کی اس قدر پٹائی کرتے کہ ان سے کچھ پوچھنا تو درکنار ایسے اساتذہ سے طلبہ بات کرنا بھی گوارا نہیں کرتے۔ مگر یہ مولانا کی خوبی تھی کہ ان کے ہاتھ میں کسی نے کبھی چھڑی نہیں دیکھی، نہ انھوں نے کبھی کسی سے سخت لہجہ میں بات کی۔

میں نے اپنے طالب علمی کے زمانے میں کبھی آپ کو خفگی کا اظہار کرتے نہیں دیکھا۔ وہ الفت و محبت کے پیکر تھے۔ نرم مزاجی اور شفقت ان کی طبیعت کا خاصہ تھا۔ وہ ہنسنے، ہنسانے اور دوسروں کو خوش کرنے والے انسان تھے۔ دیگر مولویوں کی طرح وہ کلاس میں کبھی کوئی مسلکی بات نہ کرتے۔ وہ خالص ادب کے استاد تھے اور ادب ہی ان کا اوڑھنا بچھونا تھا۔

ہمیں انھوں نے دیوان حماسہ اور عربی انشاء و ادب کا درس دیا، جب کہ دیگر کلاسوں میں وہ کلیلہ و دمنہ، محاسن الشعر اور تاریخ دول العرب و الاسلام کا درس دیتے۔ مولانا دیوان عرب کے حافظ تھے، حماسہ پڑھاتے ہوئے وہ کبھی کبھی وجد میں پوری پوری عربی نظم کا اردو میں منظوم ترجمہ کراتے چلے جاتے۔ فارسی اور عربی زبان و ادب کے ساتھ کلاسیکی اور جدید اردو ادب پر بھی ان کی گہری نظر تھی، جس کا اندازہ ان کے درس سے ہوتا۔ کہتے ہیں لٹریچر کے مطالعہ سے دل نرم ہوتا ہے۔ انسان کے اندر دکھ درد کو سمجھنے کی کی صلاحیت پیدا ہوتی ہے۔ مولانا کی نرم مزاجی، بذلہ سنجی اور ہمیشہ ہنستے مسکراتے اور مست رہنے کی صفت یقیناً ان کے اسی شوق کا نتیجہ رہی ہو گی۔

مولانا انیس احمد اصلاحی اچھے شاعر تھے۔ ان کی سخنوری پر رشک آتا تھا۔ انہیں اپنی تحریریں چھپوانے کا شوق نہ تھا۔ ان کی بہت کم ہی تخلیقات منصۂ شہود پر آئیں۔ جن میں سے کچھ مدرسۃ الاصلاح کے سالانہ مجلہ میں دیکھی جا سکتی ہیں۔ مدرسۃ الاصلاح میں جب بھی کسی اہل علم مہمان کی آمد ہوتی، سپاس نامہ اکثر مولانا ہی پیش کرتے۔ کوثر و تسنیم میں دھلی ہوئی ان کی زبان کا عالم یہ ہوتا کہ طلبہ کیا اساتذہ بھی سننے کے لیے بھاگے چلے آتے۔

کسی صاحب علم شخص کا انتقال ہوتا تو تعزیتی مجلس میں وفات پر لازماً خطاب فرماتے، خطبۂ استقبالیہ یا خطبۂ اختتامیہ اس خوبی سے پیش کرتے کہ دل میں اتر جاتا۔ سرائے میر کے طرحی مشاعروں میں اکثر شرکت کرتے اور محفل لوٹ لیتے۔ وہ جس موضوع پر لب کشا ہوتے حسن تکلم، خوبی ادا، صحت الفاظ، موزونی تراکیب، برجستہ اشعار اور علمی استدلال سے ایسا سماں باندھ دیتے کہ ’وہ کہیں اور سنا کرے کوئی‘ والی کیفیت پیدا ہو جاتی۔

مولانا کی بے تکلفی ان کی خصوصیت تھی، مرنجاں مرنج شخصیت کے مالک تھے۔ چائے خانہ، کینٹین، لائبریری، اسٹاف روم جہاں بھی جاتے، لوگ انہیں گھیرے رہتے۔ جیسے شمع گے گرد پروانوں کا ہجوم، شاید انہیں اس میں شانتی ملتی ہو، مولانا کی محفل میں اسی طرح دل آسودہ ہوتا، لوگ ہنستے، مسکراتے، کھلکھلاتے اور یادوں کی ایک کہکشاں لئے چلے جاتے۔

مولانا سنجیدہ سے سنجیدہ محفل کو بھی لالہ زار کر دیتے اور لوگ ہنستے ہنستے لوٹ پوٹ ہو جاتے۔ غالباً یہ مولانا امین احسن اصلاحی سیمنار کے وقت کی بات ہے، جب مدرسے میں پاکستان سے مولانا امین احسن اصلاحی کے شاگرد رشید خالد مسعود صاحب تشریف لائے ہوئے تھے۔ مولانا مسجد سے باہر نکل رہے تھے، کئی سینئر اساتذہ اور اسکالرز ان کے ساتھ تھے۔ کسی نے مزاح میں مولانا سے کہا مولانا ’آپ کی شلوار ٹخنے سے نیچے ہے‘ ۔ مولانا نے ہنستے ہوئے کہا، لوگ چاند اور مریخ میں کمندیں گاڑ رہے ہیں اور آپ شلوار کے نیچے ہی جھانکتے رہیے ’۔ اس وقت لوگوں کا ہنستے ہنستے کیا حال تھا مت پوچھیے۔

ایک عرصہ گزرنے کے بعد مولانا سے میری ملاقات جامعہ ملیہ اسلامیہ نئی دہلی میں 9 فروری 2017 کو ’اختر مسلمی فن اور شخصیت‘ کے موضوع پر ہونے والے سیمینار میں ہوئی، وہی کج کلاہی اور شیروانی جو برسوں پہلے دیکھی تھی، برقرار تھی۔ سیمنار میں انھوں نے صدارتی خطبہ پیش کیا۔ اس میں شرکت کرنے والے بہت سے طلبہ اور اساتذہ آج بھی اس گفتگو کو یاد کرتے ہوئے حسرت سے کہتے ہیں کہ ویسی عالمانہ شان والی گفتگو اس کے بعد سننے کو نہیں ملی۔

سیمنار ختم ہونے کے بعد ہسٹری ڈپارٹمنٹ کے سامنے باغ نانک میں بیٹھ کر میں نے مولانا کا بہت طویل انٹرویو ریکارڈ کیا، لیکن افسوس کہ اسے شائع نہیں کر سکا۔ اس کی وجہ یہ رہی کہ میرا ایک دوست مجھ سے میرا لیپ ٹاپ مستعار لے کر گیا اوروہ لیپ ٹاپ ہی چوری ہو گیا۔ اس میں میری بہت سی تحریروں کے ساتھ ساتھ وہ انٹرویو بھی شامل تھا، جو ضائع ہو گیا۔ جس کا صدمہ مجھے آج بھی ہے۔

اس انٹرویو کی روشنی میں کچھ چیزیں میں یہاں اپنے حافظے سے رقم کر رہا ہوں۔ مولانا کی پیدائش اعظم گڈھ کے ایک چھوٹے سے قصبے سرائے میر میں ہوئی تھی۔ اس کے بعد انھوں نے وہیں کے ایک معروف ادارہ مدرسۃ الاصلاح میں مکتب سے لے کر فضیلت تک کی تعلیم حاصل کی، پھر دارالعلوم دیوبند میں داخلہ لیا اور وہاں سے دورۂ حدیث مکمل کیا۔ بعد میں انہوں نے لکھنو یونیورسیٹی سے اردو ادب میں ایم اے کیا۔ اس کے بعد کچھ دنوں تک ایک انٹرنیشنل کمپنی میں ملازم رہے۔

پھر اسے چھوڑ کر محمد بن سعود یونیورسیٹی ریاض چلے گئے، جہاں سے انہوں نے زبان و ادب میں چار سالہ ڈپلومہ کا کورس کیا۔ وہاں سے تعلیم مکمل ہونے کے بعد مدرسہ الاصلاح میں بطور استاذ ان کا تقرر ہو۔ وہ استاد کے علاوہ ایک مدت تک مدرسہ کے نائب صدر اور صدر کے عہدہ پر فائز رہے۔ وہ جمعیۃ العلماء سے بھی وابستہ رہے، وہ جمعیۃ العلماء سرائے کے بھی صدر رہے۔ انھوں نے مدرسہ سے جاری ہونے والے سہ ماہی ’نظام القرآن‘ کے مدیر انتظامی اور انجمن طلبہ کے ترجمان مجلہ کے مشرف کی حیثیت سے بھی خدمات انجام دیں اور تاعمر اس ادارہ سے وابستہ رہے۔

جامعہ ملیہ اسلامیہ میں اسی موقع پر مولانا نے ایک واقعہ سنایا، ’شعر و شاعری سے زمانہ طالب علمی سے ہی دلچسپی تھی، اسی زمانہ میں ایک مرتبہ دارالعلوم میں ہم لوگوں نے ایک شعری نشست منعقد کی اور مولانا محمد سالم قاسمی صاحب (مرحوم ) کی خدمت میں یہ درخواست کرنے کی جرأت کی کہ حضرت اس نشست کی سرپرستی فرما دیں، مولانا نے کہا؛‘ ہم علماء کے لئے شعر و شاعری کو بڑھاوا دینا مناسب نہیں ہے اور آج تک کسی نے مجھ سے اس طرح کی بات کرنے کی جرأت بھی نہیں کی، تاہم انہوں نے اس پر پابندی نہیں لگائی اور نہ اس نشست کے انعقاد سے منع کیا، ساتھ ہی انہوں نے طلبہ کو اشعار میں اپنے ما فی الضمیر کی ادائیگی کی اجازت بھی دی، بھلے ہی انہوں نے سرپرستی قبول کرنے سے انکار کر دیا ’۔ افسوس ایک ایسی ہستی ہم میں نہیں رہی جن کے دم سے زبان و ادب کی محفل آباد تھی۔

مولانا طویل عرصے سے عارضہ قلب میں مبتلا تھے۔ ان کا علاج اسکورٹ ہاسپٹل سے ہو رہا تھا۔ آخری مرتبہ اس ماہ کے اوائل میں دہلی تشریف لائے تو ایک غزل سنائی، جس کے کچھ اشعار یہاں نقل کر رہا ہوں :

عظمت ماضی پہ کر دو اپنا مستقبل نثار
آنے والی نسل کو تم داغ رسوائی نہ دو
کٹ گئے بازو مگر ہمت سے رشتہ ہے ابھی
دوستو ثابت قدم کو طعن پسپائی نہ دو
تم غزل کیسے کہو گے، مرثیہ لکھو انیس
ساز غم انگیز کو آہنگ شہنائی نہ دو

2016ء میں مدرسۃ الاصلاح کی مجلس انتظامی کے رکن ماسٹر اشیاق احمد صاحب کے انتقال پر مولانا نے ایک نوحہ کہا تھا، اپنے دوست کی موت پر مولانا کی جو کیفیت تھی، ان کے انتقال پر آج ہم بھی نوحہ کناں ہیں:

کون ہے کس سے کہیں افسانہ رنج حیات
گم سکوت نا امیدی میں ہے ساری کائنات
اے اجل آ تجھ سے ہی ہستی کا یارانہ کریں
پر شراب مرگ سے رگ رگ کا پیمانہ کریں

اے اللہ! تو میرے استاد کے مرقد کو نور سے بھر دے اور جنت میں اعلیٰ مقام عطا فرما۔

• About
• Latest Posts

محمد علم اللہ جامعہ ملیہ، دہلی

محمد علم اللہ نوجوان قلم کار اور صحافی ہیں۔ ان کا تعلق رانچی جھارکھنڈ بھارت سے ہے۔ انہوں نے جامعہ ملیہ اسلامیہ سے تاریخ اور ثقافت میں گریجویشن اور ماس کمیونیکیشن میں پوسٹ گریجویشن کیا ہے۔ فی الحال وہ جامعہ ملیہ اسلامیہ کے ’ڈاکٹر کے آر نارائنن سینٹر فار دلت اینڈ مائنارٹیز اسٹڈیز‘ میں پی ایچ ڈی اسکالر ہیں۔ پرنٹ اور الیکٹرانک میڈیا دونوں کا تجربہ رکھتے ہیں۔ انھوں نے دلچسپ کالم لکھے اور عمدہ تراجم بھی کیے۔ الیکٹرانک میڈیا میں انھوں نے آل انڈیا ریڈیو کے علاوہ راموجی فلم سٹی (حیدرآباد ای ٹی وی اردو) میں سینئر کاپی ایڈیٹر کے طور پر کام کیا، وہ دستاویزی فلموں کا بھی تجربہ رکھتے ہیں۔ انھوں نے نظمیں، سفرنامے اور کہانیاں بھی لکھی ہیں۔ کئی سالوں تک جامعہ ملیہ اسلامیہ میں میڈیا کنسلٹنٹ کے طور پر بھی اپنی خدمات دے چکے ہیں۔ ان کی دو کتابیں ”مسلم مجلس مشاورت ایک مختصر تاریخ“ اور ”کچھ دن ایران میں“ منظر عام پر آ چکی ہیں۔

Latest posts by محمد علم اللہ جامعہ ملیہ، دہلی (see all)

• فرقہ واریت:ترقی پذیر ہندوستان کا ناسور! - 01/04/2024
• ہندوستان میں مسلم ووٹ کی بے وزنی اور اس کا حل - 28/03/2024
• ریزرویشن اور اقلیتوں کی نمائندگی - 28/03/2024