’یہ بابراعظم کی دنیا ہے اور ہم اس میں رہ رہے ہیں‘

کراچی کے نیشنل سٹیڈیم میں پاکستان اور نیوزی لینڈ کے درمیان کھیلے جا رہے ٹیسٹ سیریز کے پہلے میچ میں پاکستان کے کپتان بابر اعظم نے ذمہ دارانہ بیٹنگ کرتے ہوئے اپنی سنچری مکمل کی ہے جبکہ قومی کرکٹ ٹیم کے سابق کپتان سرفراز احمد نے بھی ان کا ساتھ دیتے ہوئے وکٹ کے دوسرے اینڈ کو سنبھالا ہوا ہے۔

پاکستان کی انگلینڈ کے خلاف ٹیسٹ سیریز میں وائٹ واش کے بعد نیوزی لینڈ کے خلاف کھیلے جانے والے پہلے میچ میں جہاں شائقین کرکٹ کو سرفراز احمد کی چار سال بعد ٹیم میں واپسی پر خوشی ہے وہیں پاکستانی اننگز میں پہلے سیشن میں تین وکٹیں گنوا کر ڈگمگاتی بیٹنگ لائن اپ کو سہارا دیتے ہوئے کپتان بابر اعظم کی سنچری نے اس پر چار چاند لگا دیے ہیں۔

پاکستانی کرکٹ شائقین تو پہلے ہی بابر اعظم کے دیوانے ہیں ایسے میں جب انگلینڈ ٹیسٹ سیریز کے بعد انھیں کپتانی سے ہٹائے جانے کی چہ مگوئیوں کے درمیان وہ نہ صرف لڑکھراتی بیٹنگ لائن اپ کو سہارا دیتے ہوئے سنچری سکور کر دیں بلکہ اپنی نویں سنچری بناتے ہوئے وہ دنیا کے چار ٹاپ بیٹسمین میں بھی آ جائیں تو شائقین کی خوشی کی انتہا کا عالم آپ بخوبی سمجھ سکتے ہیں۔  

بابر اعظم کا سنچری بنانا تھا کہ سوشل میڈیا پر ان کے مداحوں نے ان کے کیریئر، ریکارڈ اور کارکردگی کے حوالے سے وہ قصیدے پڑھنے شروع کیے کہ نہ پوچھیں۔

فرید خان نامی صارف نے بابر اعظم کے سنچری سکور کرنے پر لکھا کہ ’بابر اعظم سال 2022 میں سب سے زیادہ رنز بنانے والے ٹیسٹ کھلاڑی بن گئے ہیں۔ انھوں نے جو روٹ کو بھی پیچھے چھوڑ دیا ہے۔ وہ پہلے ہی اس سال کے سب سے زیادہ رنز بنانے والے بین الاقوامی کھلاڑی ہیں۔ یہ بابر اعظم کی دنیا ہے اور ہم اس میں رہ رہے ہیں۔‘

https://twitter.com/_FaridKhan/status/1607299283493224449

ایک اور صارف نے ٹویٹ کی کہ ’ بابر اعظم نے چھکے کے ساتھ اپنی نویں سنچری مکمل کی، کنگ بابر کا ذکر کن الفاظ میں کریں۔‘

https://twitter.com/hesy_rock/status/1607306286852616192

ایک اور صارف نے بابر اعظم کی سنچری بنانے کے بعد ایک تصویر شیئر کرتے ہوئے لکھا ’ان کے چہرے پر سکون راحت کا ایک لمحہ ہے، چاہے کتنا بھی پروپیگنڈا چلا لو، چاہے کپتانی سے ہٹا دو، لیکن بابر اعظم کو رنز بنانے سے کسی کا باپ نہیں روک سکتا۔‘

https://twitter.com/AvinashArya09/status/1607305846979190785

جہاں ایک جانب صارف بابر اعظم کی تعریفوں کے پل باندھ رہے ہیں وہیں پاکستانی کرکٹ ٹیم کے سابق کپتان کو ’دلوں کا کپتان‘ کہہ کر مخاطب کر رہے ہیں۔

https://twitter.com/ImAbdullaha56/status/1607271663648874496

تجزیہ کار اور کرکٹ کے اعداد و شمار پر گہری نظر رکھنے والے مظہر ارشد نے کہا کہ ’تقریباً اپنے ڈیبیو کے 13 برس بعد سرفراز احمد اپنا پہلا ٹیسٹ میچ پاکستان میں کھیل رہے ہیں، وہ پاکستانی ٹیسٹ ٹیم میں چار سال بعد واپس آئے ہیں، ڈومیسٹک سیزن میں وہ اچھی فارم میں نظر آئے اور گذشتہ ماہ انھوں نے سندھ کے لیے 102 رنز بنائے۔‘

https://twitter.com/MazherArshad/status/1607233162760814595

جبکہ ایک اور صارف نے لکھا کہ ’سرفراز احمد کا سٹرائیک ریٹ شاہد آفریدی کے بعد سب سے زیادہ ہے، ان کی ٹیسٹ میں رنز کی اوسط 36 سے زیادہ ہے۔‘

https://twitter.com/wwasay/status/1607298976650493955

ایک صارف نے بابر اعظم اور سرفراز کو سال کی بہترین جوڑی قرار دیتے ہوئے لکھا ’واہ کیا سین ہے، سرفراز اور بابر سال کی بہترین جوڑی‘۔

https://twitter.com/saqlainjamil5/status/1607289293562851329

جبکہ بعض صارفین بابر اعظم اور سرفراز کی کپتانی کا موازنہ بھی کر رہے ہیں۔

https://twitter.com/_friendlycheema/status/1604827192315195393