ڈاکٹر عمر عادل کی غریدہ فاروقی اور دیگر خواتین کے متعلق غلاظت سے بھرپور گفتگو

ہمارے بظاہر پڑھے لکھے لوگ بھی ذہنی اعتبار سے دولھے شاہ کے چوہے ہی ہوتے ہیں، بھلے کسی سبجیکٹ میں پی ایچ ڈی کر لیں یا سائنس گریجویٹ بن جائیں لیکن ان کی ذہنی سطح ہمیشہ انہی روایتی دھاگوں میں الجھی رہتی ہے جن کا ”آج“ کی دنیا سے دور دور تک کوئی واسطہ نہیں ہوتا بلکہ یوں کہہ لیجیے کہ وہ ایک طرح سے ماضی کے انہی گھسے پٹے راستوں کے راہی ہوتے ہیں جو اب غیر متعلق ہوچکے۔

ہمارے علاقے میں ایک پی ایچ ڈی سکالر پائے جاتے ہیں، ان سے شادی کے متعلق گفتگو ہو رہی تھی۔ دوران گفتگو ازراہ مذاق پوچھا کہ ڈاکٹر صاحب آپ کی عمر خاصی بیت چکی ہے، اب کوئی شادی وادی کا سوچ لینا چاہیے۔

انتہائی سنجیدگی سے فرمانے لگے کہ جناب! مجھے کوئی مخلص یا میرے ذہن کے مطابق کوئی موزوں خاتون نہیں ملی۔ میں نے پوچھا کہ جناب کا معیار کیا ہے؟

”جھٹ سے بولے کہ مجھے ایک ایسی خاتون چاہیے جو بھلے پرائمری ہو لیکن لالچی نا ہو، میرا اس سے شادی کرنے کا مقصد بس اتنا ہے کہ کچن اچھے سے چلائے، میرے ماں باپ کی خدمت کرے اور میرے بچوں کی دیکھ بھال اچھے سے کرے“

میں نے کہا حضور پھر یوں کہیے نا کہ آپ کو بیوی کے روپ میں ایک نوکرانی درکار ہے نا کہ ایک جیون ساتھی؟

کھلکھلا کر ہنس دیے اور انتہائی رعونت سے فرمانے لگے کہ عورت کو وہیں پہ رکھنا چاہیے جہاں کی اس کی اوقات ہو ورنہ آپ کی زندگی اجیرن بنا دے گی۔

دوران گفتگو پتا چلا کہ موصوف اشفاق احمد اور بانو قدسیہ کے بہت بڑے فین ہیں اور سلسلہ ”شہابیہ“ کے پیروکار ہیں اور وہ انہیں ایک حق گو روحانی بابا اور ملامتی صوفی سمجھتے ہیں اور انہوں نے مجھے راجہ گدھ میں سے کچھ حوالے بھی جڑ دیے۔

اتنی لمبی تمہید کا مقصد یہ بتانا مقصود ہے کہ بڑی بڑی ڈگریوں کے پیچھے اور بڑے بڑے چینلز کی اسکرین پر بہت چھوٹے لوگ چھپے ہوتے ہیں، جن کا ظرف اور ذہن کا دائرہ روم ٹمپریچر سے بھی بہت کم ہوتا ہے۔ جو صرف بھاشن بازی کی حد تک معتبر ہوتے ہیں لیکن سوچ انتہائی بدبودار اور غلاظت سے بھری ہوئی ہوتی ہے۔ اس قسم کے لوگوں کا سب سے خوفناک روپ وہ ہوتا ہے جب یہ موٹیویشنل اسپیکر بن کر مختلف جگہوں پر نصیحت
آ موز باتیں کرنے لگتے ہیں اور رجعت پسندی کو فروغ دیتے ہیں۔

اس طرح کے لوگ روحانی چٹکلے سنا کر نا صرف اپنی ڈیجیٹل مارکیٹنگ کو بڑھاوا دیتے ہیں بلکہ سامنے بیٹھے نوجوانوں کو سراب میں دھکیل کر ان کو لکیر کا فقیر بناتے ہیں، جو اپنی سوچ کو انہی روحانی بابوں کے آ گے بخوشی گروی رکھ دیتے ہیں، ساری زندگی کے لیے ان کی سوچ اغوا ہو جاتی ہے اور انہیں ادراک بھی نہیں ہوتا۔

ڈاکٹر عمر عادل جو آج کل کسی نا کسی پوڈ کاسٹ کی زینت بنے رہتے ہیں، ان سے کوئی تعارف تو نہیں تھا لیکن ہم سمجھتے ہیں کہ انہوں نے خواتین کے متعلق اپنی گھٹیا زبانی سے اپنا تعارف مکمل کر دیا ہے مزید جاننے کی ضرورت ہی نہیں ہے۔ یہ بھی اسی ”قمری سلسلہ“ کے سرخیل ہیں جن کی نظر میں خواتین کی حیثیت سیکشوئل ٹوائے سے زیادہ نہیں ہے اور یہ اس وجہ سے خود کو افضل سمجھتے ہیں چونکہ ان کی رانوں کے بیچ عضو تناسل ہے جو کہ ان کی نظر میں خواتین پر حاکمیت کی علامت ہے اور ان کو پوری کی پوری خاتون ٹانگوں کے درمیان میں ہی دکھائی دیتی ہے، باقی کے جسم، ذہن اور شخصیت میں انہیں کوئی خاص دلچسپی نہیں ہوتی۔

غالباً انہیں یہ لگتا ہے کہ ہر خاتون دستیاب ہوتی ہے جس کا ثبوت ان کا بننا سنورنا اور ہنس کے بات کرنا ہوتا ہے۔
اسی بدبودار سوچ کا اظہار ڈاکٹر عمر عادل نے ایک پوڈ کاسٹ میں کیا ہے۔

کہتے ہیں کہ جتنی بھی مشہور و معروف اینکرز ہیں وہ کسی نا کسی کی ”رکھیل“ ہوتی ہیں، یہ مشہور ہو کر اشرافیہ کے گھروں، گیسٹ ہاؤسز اور ریسٹ ہاؤسز کی زینت بنتی ہیں۔

یہ جتنی ”ٹپ“ ناچ رہی ہیں میری واشگاف باتوں کے بعد وہاں وہاں سے دھواں نکلے گا کہ سمجھ نہیں آئے گی ”
غریدہ فاروقی کا تو باقاعدہ نام لے کر ٹھٹھے اڑاتا رہا۔

عادل جی سے ایک سنجیدہ سوال ہے کہ جہاں کی یہ خواتین زینت بنتی ہیں وہاں کے طالبین یا مکینوں کے لیے جو ان کے منتظر ہوتے ہیں کے لیے کون سا شبد استعمال کریں گے؟

جو بن بلائے یا ایک فون کال پر رات کے پچھلے پہر کسی خاتون کے گھر اکیلے میں ملنے کے لیے پہنچ جاتے ہیں کیا ایسے پاک بازوں کے لیے ”دو ٹکے کے مرد“ ایسے جملے استعمال کیے جا سکتے ہیں یا یہ جملے صرف خواتین کے ساتھ خاص ہیں؟

جن مردوں کا خواتین کو دیکھتے ہی ناڑا ڈھیلا ہو جاتا ہے کیا وہ نارمل کہلائے جانے کے مستحق ہیں یا وہ ایک طرح کے نفسیاتی مریض ہوتے ہیں؟

جو خواتین کو دیکھتے ہی اپنا عضو تناسل کھجانے لگتے ہیں اور ایستادگی کی وجہ سے باؤلے سے ہو جاتے ہیں انہیں کون سا مرد کہا جائے گا؟

یاد رہے کہ اسی بدبودار سماج نے ایک معروف خاتون اینکر کو ”حجاب میں لپٹی طوائف“ تک کہہ دیا تھا۔

ابھی تو وہ آپ کے بقول مختلف ہاؤسز کی زینت بنتی ہیں، ڈریں اس وقت سے جب یہی خواتین آپ کی مردانگی اور پاکیزگی کے قصے چوکوں چوراہوں میں سنانے لگیں گی۔

ایک خاتون بہت کچھ جانتی ہے جس دن اس کے کندھے ”عزت و غیرت“ ایسی پہیلیوں سے آ زاد ہو گئے اس وقت بہت سے مکھوٹے دھلیں گے اور مردانگی کے پرسونا ماسک اتریں گے۔

آ خر میں اس طرح کی بدبودار سوچ رکھنے والوں کے سرخیلوں سے ایک تلخ سا سوال ہے کہ کیا وہ اپنی قرابت دار خواتین کے متعلق بھی ایسا ہی سوچتے ہیں؟