(WOW) سے وحید مراد

فلم سازی اور فلموں کی تقسیم کاری میں شغف رکھنے والے نے اگر کیمرے کے سامنے آنے کا فیصلہ کیا تو اس کے کیا نتائج برآمد ہوں گے، اس بارے میں عام طور پر فلم انڈسٹری کا کوئی فرد بھی کسی قسم کا قیاس کرنے سے قاصر تھا (اور شاید خود وہ شخصیت بھی) وگرنہ، اتنے وسائل کی موجودگی میں، اتنی سی پیش قدمی میں، بہ ظاہر کیا قباحت تھی۔ اسے مزاج کی احتیاط پسندی کہیے کہ پیشہ ورانہ سوجھ بوجھ، لمبی جست سے پہلے، خود کو سکرین پر جانچنا اور انڈسٹری کے داناؤں سے رائے لینا مناسب جانا اور سکرین کی تائید کے بعد ، وہ فیصلہ کیا جس کے لئے چند قریبی بہی خواہ (اپنی دوستی اور لگاؤ میں) ہمیشہ اکساتے رہے تھے۔

یہ علیحدہ بات کہ کسی کو (شاید) یہ توقع نہیں تھی کہ اس آغاز کے عقب میں مقبولیت، عقیدت اور فنکاری کا کیسا طوفان پوشیدہ ہے۔ نئے اداکار کا آنا، اپنی پرفارمنس کا مظاہرہ کرنا اور دیکھنے والوں کی نظروں سے غیر محسوس طریقے سے اوجھل ہوجانا، فلم انڈسٹری کے لئے کبھی کوئی غیرمعمولی واقعہ نہیں رہا۔ اس بار بھی اگر ایسا ہو جائے تو تعجب کیسا۔ یہاں تاہم تعجب کا سامان موجود تو تھا، مگر نئے مفہوم اور نئی تعریف کے ساتھ جس کی پرتیں آنے والے وقت میں خود کو ظاہر اور نمایاں کرنے کی منتظر تھیں۔

شاید تب بھی کسی کو یہ توقع نہیں تھی کہ ستاروں کی اس وسیع کہکشاں میں اسے یہ آب و تاب حاصل ہوگی کہ یہ نگاہوں کو اس قدر خیرہ کرے گا کہ برس ہا برس، اس تابانی سے جگمگاتے رہیں گے۔ روایتی توقع کے بر خلاف، نئی روایت اپنی جگہ بناتی چلی گئی۔ چھوٹے چھوٹے کرداروں میں سکرین ٹیسٹ پاس کرنے والا بڑی سکرین پر بڑے بڑے (آزمودہ) چہروں کے مدمقابل اپنی انفرادیت کے ساتھ ممتاز ہوتا چلا گیا۔

یہ انفرادیت یقیناً اپنے فطری اسلوب کی تخلیق تھی جس نے سکرین پر نئے رنگ بکھیر دیے۔ یکسانیت اور جمود کے درمیان زندگی اور شگفتگی کا ایسا شاہ کار سامنے آیا جس سے یہ سکرین اس سے پہلے یکسر ناواقف تھی۔ کانوں میں رس گھولنے والے نغمے اب قابل دید بھی ہونے لگے۔ ان میں وہ جدت آ گئی کہ انھیں جتنی بار دیکھیں، ان کی جاذبیت میں کمی نہیں ہوتی اور انھیں پھر ایک بار دیکھنے کے خواہش اُسی طرح برقرار رہتی۔ دلکشی کی اس نئی دنیا نے دیکھتے ہی دیکھتے فلم بینوں کو اپنا گرویدہ کر لیا۔

ہر نئے عکس کے ساتھ، اس تصویر کے رنگ گہرے ہوتے چلے گئے۔ فلم بینوں کی توجہ (اور تسکین) میں اضافہ ہوتا چلا گیا۔ نوجوانوں کو ایک رول ماڈل کی صورت ملی اور سب نے اُس (خوب) صورت سے اپنی صورت ملانے کی خواہش کو دن بہ دن گہرا ہوتا پایا۔ یہ شہرت اور اس طرز کی مقبولیت، درحقیقت فلمی تاریخ کے ایک نئے باب کا لکھا جانا تھا۔ وہ سنہری باب جس کے لئے یہ محسوس ہوا کہ اس کی مثال نہ پہلے تھی اور (شاید) نہ آگے ہو۔

زمانے کے سرد گرم دیکھنے کے بعد ہر کسی نے زندگی کے اس تھیٹر کو الوداع کہنا ہے اور اس انجام سے کسی کو فرار نہیں۔ سو اس کہانی میں بھی یہ موڑ آنا تھا اور نومبر کی تئیس (23) تاریخ اس اختتام کا عنوان بنی، مگر اس کہانی کے آغاز کی طرح اس کے انجام کے بارے میں بھی کسی کو (غالباً) یہ توقع نہیں تھی کہ اس کے عقب میں مقبولیت، عقیدت اور وابستگی کا کیسا طوفان پوشیدہ ہے۔

زمانہ کروٹیں لے چکا ہے۔ ٹیکنا لوجی بدل چکی ہے۔ نئے نوجوان مقبول چہرے منظر پر اپنی جگہ بنا چکے ہیں۔ چھوٹی سکرین جگہ جگہ عام ہو چکی ہے۔ لوگوں کی پسند اور ناپسند میں ماضی کے مقابلے میں بلا کی تبدیل آ چکی ہے۔ ان تبدیلیوں کے باوجود بڑی سکرین کا من چاہا چہرہ آج بھی نگاہوں کا مرکز اور دلوں کی دھڑکن ہے۔ اس پس منظر کا سب سے حیرت انگیز امر یہ ہے کہ، جو اپنی کم عمری کے سبب اُسے بڑی سکرین پر نہ دیکھ پائے، وہ چھوٹی سکرین پر اُس کی بڑی (اور دل موہ لینے والی) پرفارمنس دیکھ کر اُس کے دلدادہ ہیں اور عقیدت کی لڑی میں اُسی طرح پروئے ہوئے ہیں جیسے عہد گزشتہ میں بڑی سکرین کے شاہد اُس کے وارفتہ تھے۔ پرنٹ میڈیا کی محدودیت کی وجہ سے اتنی تصاویر اور شہ پارے تب ایک دوسرے کو شیئر نہیں کیے گئے جتنے تسلسل، تعداد اور تناسب میں ان دنوں دیکھے جا سکتے ہیں۔

سوشل میڈیا خود اس بات کا گواہ ہے کہ دلوں میں زندہ رہنے والے کیسے ہوتے ہیں۔ گوگل اپنے عہد سے پہلے کے ہیرو کو اپنی گرافکس (doodle) کی شکل میں سلام پیش کر چکا ہے۔ مشہور زمانہ سرچ انجن سے یہ بھی تسلیم کیا جا چکا ہے کہ جن بچھڑنے والوں کو اُن سے محبت کرنے والے سوشل میڈیا پر بہت زیادہ ڈھونڈتے ہیں، بلاشبہ وہ کوئی نہیں، وحید مراد ہیں۔

ایسے میں، پاکستان فلم انڈسٹری کے قابل فخر سرمایہ کے لئے، بجا طور پر، یہ کہنا تو بنتا ہے :
(WOW) سے وحید مراد!