جب سے پوری دنیا میں کرونا وائرس کی وبا عام ہوئی ہے اس وقت سے مختلف حلقوں میں یہ سوال زیربحث ہے کہ کیا یہ وائرس عذاب الہی کی ایک شکل ہے یا نہیں؟ اگر کرونا وائرس عذاب الہی کی ایک شکل ہے تو کیا اس امت پر عذاب آ سکتا ہے؟ اگر آ سکتا ہے تو پھر یہ کس قسم کا عذاب ہے؟ یہ اور اس سے متعلقہ بہت سے دیگر سوالات بالعموم بہت سے حلقوں کی طرف سے اٹھائے جاتے رہے ہیں۔ ان تمام سوالات کے جواب کے لئے یہ جاننا ضروری ہے کہ عذاب کسے کہتے ہیں؟ جب تک عذاب کی معرفت نہیں ہوگی۔ اس وقت تک ان سوالات کا نہ تو درست جواب دیا جاسکتا ہے اور نہ ہی سمجھا جا سکتا ہے۔ اس لیے سب سے پہلے عذاب کو سمجھنا ضروری ہے۔ عربی زبان کی مشہور لغات میں عذاب کے معنیٰ سزا، تکلیف، وبال جان یا ہر وہ چیز جو طبعیت پر شاق ہو اور اس سے اذیت محسوس ہو کے بتائے گئے ہیں۔ (المنجد)