عالمی بینک کی جاری کردہ رپورٹ ”کلائمیٹ چینج پروفائل آف پاکستان“ میں کراچی کو موسمیاتی تبدیلی کے حوالے سے پاکستان کے خطرناک شہروں میں پہلے نمبر پر رکھا گیا ہے۔ ملک کی 1040 کلو میٹر پر پھیلی ہوئی ساحلی پٹی اور جزائر کے باسیوں کا گزرے کل سے لے کر آج تک کوئی پر سان حال تھا اور نہ ہے۔ ان باسیوں کی اکثریت ماہی گیری کے پیشے سے وابستہ ہے، لیکن اپنی آنکھوں میں بہتر زندگی کے خواب سجائے یہ لوگ اس امید پر ہر وفاقی، صوبائی اور بلدیاتی انتخابات میں ووٹ ضرور ڈالتے ہیں کہ شاید ان کے حالات زندگی تبدیل ہو جائیں، لیکن ان کی زندگیوں میں تا حال کوئی تبدیلی واقع نہیں ہو سکی۔ تا ہم، ان کی تعلیم، صحت اور ماحولیاتی تحفظ کے لیے کام کرنے والوں کی غالب اکثریت کی زندگیاں ضرور تبدیل ہو چکی ہیں۔